轉新工唔小心勾引咗個同事: 十二、收留

我同Matt嘅關係目前到而家都未有人發現，雖然Chris察覺到我哋有時會close咗少少，但佢都只係善意提醒我要小心啲，同埋間中同我講下Matt壞話，不過我哋三個喺公司相處期間仍然維持到一片融洽嘅表象。而我老公繼續返夜更，無瑕去管我究竟夜晚係返歸定係去幽會，只要喺佢在場嘅時候我做返佢老婆，我唔擔心會咁易出事。

又一個工作天嘅早上，我如常喺大圍月台尾等車。呢一個係我同Matt約開會合嘅位置，佢喺上水上車，再通知我應該上邊架車。
「你架車到未？」不過唔知點解，今日佢冇預先同我講架車去到邊，我唯有預返大約嘅時間上車。

今朝車廂異常地多人，我嘗試搵下Matt嘅身影，但逼到我完全郁唔到。正當我想打俾佢嘅時候，突然感覺到身後有人愈企愈埋，甚至去到完全貼緊我下身嘅程度，我下背已經可以感覺到對方嘅體溫同呼吸……會唔會係Matt呢？但細心啲去感受，呢個人好似係有肚腩。我每行前一小步佢就繼續逼近我，唔通要俾佢咁樣痴住成程車？
「唔好意思，先生借借，我女朋友。」突然Matt拍咗一拍我膊頭，將我喺人群之中拉咗去車尾角落，然後用身體將我同其他人隔開。
「你冇事嘛？」佢語帶緊張咁反覆細問，驚我冇咗忽肉咁。
「冇啊……你做咩唔覆我啊？」老實講，我都唔知頭先嘅經歷算唔算得上係非禮，唯有忍咗佢算喇。
「Sorry我都係見到你之前啱啱收到你message，而家我喺度喇。」佢雙手將我環抱，我可以成個人被佢身體包覆住，好似俾一隻好巨型嘅毛公仔攬住咁，好舒服。


「錫返啦好冇？」其實我冇嬲，不過呢啲時候梗係要扮下受委屈等佢氹返我。佢邊輕掃我頭髮送上濕吻，軟綿濕潤嘅嘴唇，淡淡嘅薄荷牙膏味，另一隻手仲趁我唔防避嘅時候移到我胸側，用手心輕輕撫摸。
「好多人喎……」晨早流流就又錫又摸，仲要喺東鐵車廂，會唔會太刺激？
「冇人睇到架。」佢嘅氣音輕到恍如羽毛掠過耳邊，令我身體忍唔住變得熱燙，只可以任由佢放肆。

「差唔多落車喇。」以前返工都唔覺原來一程車嘅時間係咁短，行出車廂就意味住我同Matt就要做返普通同事。我哋習慣咗喺車廂內道別，然後佢比我更早返到公司。
呢排Mandy放緊假，大家手上嘅大project都已經完成晒，聽日又係公眾假期，打工仔無心工作係基本啦，悠悠閒閒扮下工又一日。我夜晚仲約咗朋友睇演唱會，所以一搭正六點我就即刻拎袋走人。正當我睇完騷返到屋企門口，我居然搵唔到條鎖匙！！！我不斷喺門口好努力咁摷手袋，真係冇帶到，睇嚟應該係我換手袋嗰陣唔記得擺返落去……

「喂？」雖然明知老公返緊工，但我都冇辦法一定要向佢求助。
「做咩？」
「我冇帶鎖匙啊……」講出嚟我都覺得自己白痴，咁大個人仲會漏帶鎖匙……


「我返緊工喎……定係你返你阿媽度先？」老公係做紀律部隊，絕對冇可能交到條鎖匙俾我。
「阿媽條鎖匙係喺同一抽……」我開始諗今晚我可以去邊度過夜。
「瞓一晚酒店？問下有冇朋友可以收留你？……唔講喇我要收線喇，你小心啲啊。」佢俾咗幾個提議我，然後就留俾我自己搞掂。



「喂……唔好意思……你可唔可以收留我一晚？」我打咗俾Matt。