我和六合彩發生了一段不可告人的（性）關係: 【22】

「咩事呀你地？晨咁早喺度嘈住曬。」

「你咪話過，只要我地肯合作幫你贏個頭獎返嚟，無論有咩要求，你都會滿足我地？」4號問我。

「Er…我好似係有咁講過。」

「咁得啦，我同22號想去甲子園，你快啲帶我地去。」

「咩話？甲子園？」





「係呀！我地要去甲子園打棒球！」22號答我。

唔使問阿貴，呢兩條友一定係睇完套漫畫，以為自己係日本高中生，想打入甲子園。

我抹一抹啲眼屎，起身同佢地解釋：

「甲子園呢，其實係日本一個地方。每年日本都會舉行校際棒球比賽，只有入到決賽嗰兩隊，先可以喺甲子園度比賽。而我地第一唔係日本人，第二唔係高中生，所以係無機會去到甲子園架。」

佢地皺曬眉頭，好似唔係好明我講乜。





「總之我唔理，我一定要去甲子園！」

「我都要去！」

佢地兩個一齊喺度扭計。於是我就不厭其煩再解釋一次。

結果我一講就差唔多講咗半個鐘，跟住佢地先開始明我講嘅嘢。

「…只有高中生，先有機會去甲子園參加比賽，但如果想做高中生，咁就要讀書考試，而讀書考試就比死更難受，你係咪咁嘅意思？」





「無錯！就係咁！」我用最肯定嘅語氣回答4號。

22號問我：「可唔可以唔讀書考試，直接做高中生呀？」

「唔得！一定要讀書考試先可以升到中學！同埋做到高中生之後，都要繼續讀書考試！」

「下…咁慘呀…咁都係算啦…」

「拿，係你地話算架渣。」

「雖然甲子園可以唔去，但棒球我地一定打！」4號同我講。

「但你地唔係一個背脊有傷，一個大髀拉傷咩？不如抖下好過啦。」我話。

「其實我地啲傷早就好得七七八八。」22號一邊講，一邊同4號揮動手腳，





「係囉，你睇下我地，根本郁動自如！」

「咁好啦，咁我陣間就落街買個棒球返嚟俾你地玩。」

「哈哈！好嘢！」4號同22號拍手歡呼。

曬咗咁多口水，終於講掂佢兩個。

隨後望一望上下格床，36號同6號仲瞓緊。

另一邊廂，45號就依然喺廁所，醉到不省人事。

24號就…...咦？24號呢？唔見咗嘅！





我即刻問4號同22號，問佢地知唔知24號去咗邊。

4號同我講：「啱先有個女人敲門，佢話佢住喺隔籬，話想搵個人出去幫佢搬啲嘢，咁24號就出去幫手啦。」

「咁佢出咗去幾耐？」

「都好耐下架啦。」22號話。