靈怪檔案Z

澳門，葡京酒店門外。 

——踏、踏、踏 欄杆開外聚住三個男人，一字排開、清一色——神色凝重。 

「36、24、36，望落有Ｄ，但玲瓏浮凸嘅背後，衣物呈現嘅軟硬度極之咁唔尋常，絕對有理由懷疑佢入面墊足幾塊PAD，實情係——飛、機、場嚟嘅！」其中一個尖耳猴腮、望落經已岩岩巉巉，講野更加九唔搭八嘅男人率先開聲。 

介紹返，佢係我尼世仔以嚟，見過最荒謬嘅人，亦係我曾經嘅中學同學——坤哥。 

點解係曾經？ 因為未嚟得切畢業，佢經已比人踢咗出校。而多得佢帶挈，我亦一度帶住幾個大過，係被人踢出校嘅邊緣彈出彈入，真係諗返起都......，想屌鳩佢。 





乜叉野學校夜晚有僵屍、隔離班成個馬雲咁嘅樣嘅女同學其實係外星人，有人暑假偷偷地用冰粒實施完美犯罪...... 

或者你會話，信嗰個都白痴。
冇錯，我同意。但佢就係有種魔力，
可以令身邊嘅人通通變做白痴。 

——佢就係咁撚荒謬嘅人。

 ————————————————— 





「嘩！大佬，咁都比你睇得出，勁啊！」而格離尼位咁捧場嘅肥仔，叫「傻強」，係我嘅另一位中學同學，亦係當年坤哥一眾「信徒」入面、最忠誠嘅一位。

 ——當然，亦係比人跣得最甘嘅嗰個。 

傳聞，當年坤哥因為衰得太多壇野，比人踢咗出校，之後就消聲匿跡。 而「傻強」亦係冇耐，因為衰「非禮」、入咗男童院半年。尼件事困擾咗我好耐，因為以我認識嘅「傻強」，佢絕對唔係會做啲咁嘅野嘅人，但係重遇之後，我一路都唔敢問返佢當年尼件事。 

亦可能，係因為有第件、更加荒謬嘅事搞緊我，搞到我......分心不暇。

 ——坤哥，永遠唔會令我失望。 





佢話佢當年表面係比人踢出校，實情係比國家特務組織睇中咗，成為一位暗中解決各類「靈怪事件」嘅「特種幹探」，而最近為咗偵查一單連環殺人案，需要向我地尼班舊同學「籌旗」，係葡京「贏大錢、釣大魚」。 

我扒開個銀包，望住入面僅餘嘅兩蚊銀仔，唏噓咁扯咗啖煙。

畢業之後，我走咗去當差。 

話就話薪高糧準，但衰在爛賭、爛滾，久而久之就爭落咗周街街數。本來諗住月頭可以鬆吓、點止一個唔留神，又瀨咗坤哥尼一野。

強忍一槍「啪瓜」坤哥嘅衝動，我擰轉身，諗住當尼輪時運高、冇見過尼兩條友就算數。

——「喂，四眼你去邊？我未講完阿，哩！你見唔見條女行路『外八』、望落零舍豪邁咁啊？你以為職業病？咁你就錯喇！阿強，你都望真啲！」突然，坤哥一手推前「傻強」個頭，隊到佢幾乎跌出欄外。 

「見唔見佢喉嚨椗，嗰粒約隱約現嘅喉核？又見到、唔見到佢裙底上五吋、下五吋，嗰啲量如狒狒咁多嘅腳毛？佢一定係一個唔記得剃腳毛嘅死～人～妖！」

 ——「咦，係喎！」 





見住「傻強」發自內心敬佩嘅神情，我尼一刻只想消除哂同尼兩位舊同學相關嘅——所有記憶。 

係冇錯......係所有。