瘋狂鏡粉大戰食人喪屍: （37）

知唔知十二個鏡仔從此消失喺娛樂圈，邊個最開心？

咁就梗係其他唱片公司嘅高層同老闆啦。

華內、鷹皇、猩夢，三大唱片公司嘅老闆呢日聚首一堂，開香檳慶祝鏡仔正式收皮。

「都係阿羊你好嘢，咁都俾你諗到條絕橋，一嘢收曬班鏡仔皮！嚟！我一定要敬你一杯！」華內老闆主動同鷹皇老闆碰杯。

猩夢老闆就話：「諗返起嗰日班頒獎典禮啲喪屍都幾狼死，爭啲咬傷咗我地個『火火』！」





「雖然係有少少風險，但如果我地幾間公司都唔派人去，咁就做得太明顯啦！」鷹皇老闆一邊講，一邊搖動手上嘅酒杯。

「咁又係嘅，不過估唔到今次唔單止係班鏡仔，連佢地成間公司都收埋皮，我地會唔會做得太過分呢？」猩夢老闆問另外兩個老闆。

「同行如敵國，呢幾年佢地都搶咗我地唔少生意，要賺都賺夠啦，係時候俾我地賺返啲啦。」華內老闆飲一啖香檳回答。

「咪就係囉！唔好講咁多啦，今次咁高興，我地一於不醉無歸！」鷹皇老闆舉杯同大家開心慶祝。

事實上，喪屍之所以會爆發，其實全部都係呢三大唱片公司老闆搞嘅鬼。





當日喺頒獎典禮上，佢地派人喺會場嘅音響做咗手腳。

佢地喺音響入面，安裝一種會發出特殊聲波嘅發射器。

當日鏡一出場唱歌，佢地叫人啟動發射器，釋放出一種高頻聲波。

呢種高頻電波耳仔係聽唔到，但卻會喺無形之間影響人嘅大腦，造成嚴重嘅神經錯亂。

神經比較敏感嘅人會俾呢種聲波影響，因而做出極暴力嘅行為。





換句說話講，當日喺頒獎典禮上，令人變成喪屍嘅並唔係鏡仔嘅歌聲，而係呢種特殊嘅高頻聲波。

事後佢地三個唱片公司老闆，出高價收買咗幾個專家，叫佢地將所有責任推卸喺鏡仔身上，再搵PR公司造成一輪反鏡熱潮。

喺呢件事上，政府把關不力，信曬幾個專家嘅說話，將矛頭直指班鏡仔。

之後成件事越搞越大，班鏡仔及其附屬公司最後亦都因此而收皮。

「話時話，男團咁好搵，搞到我都想整返隊玩下，不過唔知改咩名好，你地有咩提議？」猩夢老闆問左右隔籬兩個老闆。

「不如叫『天堂鳥』？」華內老闆提議。

鷹皇老闆就話：「唔係呀嘛，咁老土，我就話叫『Long 9』，寓意長長久久呀嘛！」

「『Long 9』好喎！就叫呢個名啦！哈哈哈哈！」





「咁我都唔執輸，搞返女團玩下啦！」

「阿羊你想玩女渣下話？」

「咁都俾你識穿咗！我自隊一杯！哈哈哈哈！」

三人哄堂大笑，飲酒作樂。

從此以後，樂壇再無鏡仔，只有「Long 9」。



（全文完）