瘋狂鏡粉大戰食人喪屍: （13）

眨下眼，時間就嚟到投票結束前嘅一日。

呢日同時係教宗告別見面會嘅最後一日。

現場嚟咗接近一萬名方濟各，佢地全部都好唔捨得教宗。

「嗚嗚~~教宗，我地會全力投票支持你，唔會俾你走架！」

「你一定可以繼續留喺舞台，繼續為我地唱歌跳舞，帶歡樂俾我地！我地呢班方濟各會永遠支持你！」





「呢個唔係你嘅告別會，因為你一定會贏！所以教宗你要撐住啊！」

在場所有歌迷都喊曬口咁，向教宗表達出無比嘅支持。

教宗見到自己嘅歌迷咁支持自己，不禁都流下男兒淚。

「多謝你地咁支持我…我應承大家…無論結果係點…我都會記得每個支持過我嘅人…」佢一路講一路喊，喊到個妝都花曬。

總而言之，呢刻嘅場面非常感動。





同一時間，鏡團另外嘅成員，包括薑毛、雀巢安、I仁佢地都喺其他酒店嘅宴會廳，分別搞緊告別會。

場面同樣都係十分感人。

雖然每個鏡粉都唔希望自己嘅偶像退出娛樂圈，但現實係殘酷嘅，十二個人入面只有兩個可以留低。

亦都有可能一個都不留。

皆因喺一班反鏡人士嘅聲浪之下，投票除咗可以投十二個成員之外，後來亦都加入咗「十二個人全部foul走」呢個選項。





因此投票結果變得更加難預測。