瘋狂鏡粉大戰食人喪屍: （7）

諗諗下，阿華、志偉同Eric發覺其實做喪屍都幾過癮，心思思想再做一次。

橫掂做人做得咁辛苦，做隻喪屍話唔定係一種解脫。

於是佢地上網想搵返當日鏡嘅表演片段，諗住用鏡嘅歌聲，再刺激一次大腦，令自己再次變成喪屍。

可惜嘅係，相關嘅影片以及鏡過往嘅表演片段一早就俾人ban曬，網上面根本搵唔到。

佢地有啲失望，之後又嘗試上網開po，睇下有無人肯share當日嘅片出嚟，





結果片都係搵唔到，不過就俾佢地誤打誤撞，喺網上面結識到一班志同道合嘅人。

呢班人都係做喪屍做上癮，同樣都係想諗辦法再變成喪屍。

呢一日，佢地成班人約出嚟party room度唱k。

阿華一嚟就問在座五十個人，邊個自認唱歌唱得最難聽。

跟住有一個M字額四眼哥哥舉手。





佢自告奮勇，聲稱自己五音不全，所以主動拎起支咪，對住大家高歌一曲。

「你當我是浮誇吧~~~誇張只因我很怕~~~」

呢個四眼哥哥忘我演唱，佢嘅歌喉可以話係嚇死人。

然而佢已經唱到喊驚咁，但係在座嘅人，卻並無因為佢嘅歌聲而變成喪屍。

「真係奇怪，明明你已經唱得咁難聽，仲難聽過薑毛佢地，但點解我地都無變成喪屍嘅？」Eric有啲疑惑。





「不如你試下唱一唱鏡佢地嘅歌？」志偉向四眼哥哥提議。

四眼哥哥點一點頭，隨即唱咗一首當日鏡喺台上唱嘅歌曲《焫著》。

「焫著焫著焫著焫著焫焫著著~~~」

佢唱得甩曬beat走曬音，連歌詞都唱到一舊舊，但依然無辦法令自己以及其他人變成喪屍。

隨後佢地在座咁多人輪流唱咗一次，同埋又搵返以前嗰啲歌手嘅走音片出嚟睇，可惜無一樣嘢起到作用。

照咁睇嚟，只有鏡仔獨一無二咁失準嘅歌聲，先至能夠觸發到大腦潛在基因，令佢地變成喪屍。

係咁嘅話就弊啦，因為嚟緊嘅全民投票會投走十個鏡仔，假如投走咗唱得最難聽嗰啲，咁佢地以後咪無機會聽到嗰班人唱歌，繼而再無機會變成喪屍？

有見及此，佢地拿拿臨放低支咪，圍埋一齊，傾下點樣好好運用手頭上嘅選票。