瘋狂鏡粉大戰食人喪屍: （1）

（故事純屬虛構，如有雷同，實屬巧合）


「鏡」，係當今娛樂圈最紅嘅男子組合。

佢地有一班瘋狂嘅fan屎，人稱「鏡粉」。

只要有「鏡」出現嘅地方，現場就必定有一大班「鏡粉」到場支持，風頭可以話係一時無兩。

只不過，呢隊當紅炸子雞，如今卻面對住一次重大嘅解散危機。





一個唔好彩，佢地甚至有可能永遠退出幕前。

究竟發生咩事？

咁就要由今年度一次音樂頒獎典禮講起。

喺一眾鏡粉嘅大力支持下，「鏡」基本上橫掃曬各大頒獎典禮嘅獎項。

當日喺頒獎典禮上，「鏡」嘅12位成員上台接受獎項，並即場獻唱。





身為偶像派男團，佢地最大嘅賣點並唔係實力，而係努力。

但唔知係咪因為身體抱恙，定抑或係場館當其時嘅冷氣太凍，凍親佢地嘅聲帶，導致到唱歌嘅表現比平時更為失準。

老實講，唱歌走音、跳舞甩beat呢啲其實早就見怪不怪，不過奇怪嘅係，喺同一時候，台下面發生咗一件極唔尋常嘅事。

「鏡」唱歌唱到中途，現場有一部分觀眾突然狂性大發，好似變咗喪屍咁，擘大個口周圍咬人。

開頭大家以為係主辦單位安排嘅特別節目，所以無一下子反應過嚟。





尤其係班鏡粉仲睇得好投入，不停吶喊歡呼，掩蓋曬身邊驚慌痛苦嘅尖叫聲。

直至後來場面越嚟越失控，在場人士先意識到事情嘅嚴重性。

台上嘅十二人立即停止表演，匿去後台暫避，至於台下嘅觀眾以及歌手則紛紛四處躲避。

由於頒獎禮有電台同電視同時轉播，因此除咗會場之外，喺其他地方收聽收睇嘅觀眾之中，亦都有人變成喪屍，到處咁咬人。

面對突發情況，警方即刻調派人手，保護市民，但由於喪屍數量眾多，而且分佈各區，所以一時之間就連差佬都搞唔掂。

正當所有人都以為情況會繼續惡化落去，點知一個鐘之後，嗰班失控亂咬人嘅喪屍，忽然間又恢復返理智，變返做一個正常人。

喪屍喺毫無預兆之下爆發，結果只係爆發咗一個鐘，跟住就喺毫無預兆之下回復正常。





成件事非常之離奇，大家都好想知點解啲人無啦啦會變成喪屍。

後來經幾位專家嘅分析研究，得出咗一個結論。

專家指出，人類大腦喺演化過程中，發展出某種對聲音同音樂嘅特殊感知力。

後來隨住文明嘅演變，呢種特殊嘅感知力會衰退或者退化，不過依然存在喺人嘅大腦之中，當遇到特定嘅情況就會被激發，並會驅使人類做出不尋常嘅行為。

專家嘅結論就係，當日「鏡」嘅歌聲正正就係唔小心觸發到人類退化嘅神經，導致一部分人精神失常，做出極暴力嘅行為。

雖然最後班喪屍自動回復返正常，但難保如果下次再聽到鏡團唱歌，又會觸發大腦嘅潛在基因，而再次變成喪屍。

因此，為免事件重演，坊間就有意見要求鏡團永久退出娛樂圈，以後都唔可以再公開演出。

但喺另一邊廂，鏡粉就極度反對，提出強烈抗議。





對佢地嚟講，喪屍固然可怕，只但係如果無得繼續追捧偶像，咁人生就會徹底失去意義。

正反雙方嘅意見對立，反鏡人士上街拉起橫額反對，一班鏡粉則上街舉起燈牌，表達對偶像嘅支持。

同時間，呢次喪屍事件亦都令一班政府官員好頭痕。

為咗避免同類嘅事情再發生，佢地漏夜召開咗一次特別會議，商討對策。