我嘅大學生涯 (有甜): 抱歉

我從小拳石口中得知阿念會係今日返黎香港，但係唔知幾點鐘機。
 
於是我一早就起咗身去機場，我驚佢早機返而我趕唔切去接佢機。
 
我好似人地整咗個牌，寫住「阿念對唔住，阿燕會改過」。
 
我由朝早等到晏晝，由晏晝等到夜晚，期間有段時間等到瞓著咗。
 
好彩嘅係，宜家終於比我等到一個正常樣嘅女仔，隔離仲有佢爹哋媽咪陪住。
 


我：「阿念！！」我舉起張牌再大叫，而佢地三個亦都望咗過黎。
 
從表情上黎睇，等我模擬一下佢地嘅對話。
 
爹哋：「阿念，個嗰男仔叫緊你？」
 
阿念：「我唔識佢架，我地行啦。」
 
媽咪：「唔係喎，佢一直望住我地喎，個牌仲寫住阿念對唔住，阿燕會改過。」
 


阿念：「都話我唔識佢囉，唔好理佢啦。」
 
媽咪：「係咪因為佢激嬲你呀？」
 
爹哋：「人地都咁有誠意黎接機，你比面爹哋同佢傾幾句啦，我地係前面等你。」
 
然後佢地就推咗阿念過黎，而阿念只係勁唔情願，一路過黎一路怒睥住我。
 
我：「阿念。」
 


阿念：「有咩就快啲講。」
 
我：「我黎係想親口同你講對唔住，我對我嘅行為無任何藉口，但係我真係好對你唔住。」
 
阿念：「講完啦嘛？」佢拎轉身準備走。
 
我：「我唔知我可以點樣補償返比你，亦都唔知點先可以得到你原諒，或者你同我講，我做啲咩你先會原諒我。」
 
阿念：「好呀，你宜家同我係機場到褸跑十個圈，我就原諒你。」
 
我諗咗一諗，因為宜家機場都好多人，但始終係我欠佢嘅，上一上新聞應該好小事姐，香港人咁善忙，應該好快就唔記得。
 
我除咗自己件衫，準備除埋條皮帶個陣，佢衝上黎禁停我。
 
阿念：「哇你傻咗呀！真係除架？！」


 
我：「只係褸跑就肯原諒我已經係對我好仁慈。」我繼續嘗試除條皮帶。
 
阿念：「停啦停啦！我原諒你啦！著返衫先啦！」佢即刻捉實我隻手。
 
我：「真嘅？」
 
阿念：「係呀，快啲啦！啲人望住我地啦！」
 
我著返衫，同佢一齊行去佢屋企人個到。
 
媽咪：「哇你地頭先玩咩玩到係街除衫呀？」
 
阿念：「佢以為我凍，想除件衫比我著姐。」如果係我一定唔知點兜。
 


爹哋：「不過你都幾有我女心架喎，咁夜都黎接佢機。」
 
我：「小事姐，同埋主要係我激嬲佢，我點都要等佢返黎親口同佢道歉。」
 
媽咪：「人地咁有誠意黎道歉，阿念你就原諒人地啦。」
 
阿念無出聲，只係握實拳頭輕輕打落我個膊頭到。
 
呢晚之後，阿念話佢原諒咗我，但我地以後都唔好再搵大家。
 
事實上佢已經對我好仁慈，換轉係其他人嘅話，我宜家可能已經係差館到坐。
 
至少念茲在茲，我會好好咁記住。
 
Emily：「哇，食咗人地個豬都可以無事，我都要寫個服字。」


 
我：「點都好，我宜家會再小心啲咁處理人際關係。」
 
Emily：「你同蔡煒燕都係有種魅力係到，明明做嘅野幾仆街幾衰都好，但人地永遠都嬲你地唔落。」
 
我：「係咩，你之前咪問過我想成為一個點樣嘅人，我開始想做返個好人。」
 
Emily：「好人？咩叫好人？點為之係個好人？」
 
我：「唔傷害人就係一個好人。」
 
Emily：「因為傷害得太多人，宜家良心發現，唔想再傷害人。」
 
Emily：「乜你以為咁樣就可以上返天堂架啦咩？無意思架，就好似坐過監嘅人淨係可以做啲低階嘅工，就算佢地做返幾多好事都好，都一樣無人會認同或者接納返佢地架。」
 


我：「夠啦，唔好再煩住我，你淨係想引我入魔。」
 
Emily：「哈哈，我一早就同你講過，你同我地一樣永遠都得唔到真愛。」佢笑住咁消失係我視線範圍。
 
我開返眼繼續聽Professor教書，好似睇戲咁轉咗另一個畫面，已經唔知佢又教到邊張slide。
 
係我隔離嘅明仔亦都一早進入安眠狀態，開始懷疑出出地事，印象中下個月就開始考試。
 
而我接近無聽過書咁滯，一係走堂，一係上堂但睇手機涼冷氣。
 
不過其他course要做嘅野大部都做哂，至少唔會好似啲人講咩sem頭不努力 sem尾徒傷悲。
 
「提醒事項：阿蓉生日」