我嘅大學生涯 (有甜): 虛偽

第二朝起身，我個頭痛到仆街。
 
我拎返部手機，時間黎到十點半，仲有一堆黎自阿蓉嘅wts。
 
阿蓉：「個嗰女仔邊個黎架？！！」
 
阿蓉：「你係咪同個女仔搞緊野...？」
 
阿蓉：「點解你要咁對我呀...？」
 


阿蓉：「我唔明...我有咩做得唔夠好呀...？」
 
阿蓉：「我個心好痛呀...」
 
阿蓉：「我只係想好好咁同鍾意嘅人一齊...係咪我迫得你太緊...？」
 
我不斷嘗試打電話比佢，但佢唔聽，甚至熄埋機，wts仲block埋我。
 
我無叫醒Candice就直接著返衫走咗，只係留咗啲錢係張枱到比返酒錢同酒店錢佢。
 


雖然走咗，但係我都唔知可以去邊到搵佢，而我又唔識佢啲朋友。
 
過咗幾日佢都仲未解鎖我，我用細帳dm佢都block埋。
 
到咗今日，我嘗試偷偷地咁去佢上堂嘅課室搵佢。
 
我入到個課室，因為呢班接近一百人，所以無乜人會理你。
 
好快我就搵到阿蓉，但佢無留意到我，只係睇緊手機。
 


佢個樣無乜精神，睇落去好憔悴，兩隻眼好空洞，有啲似乙骨憂太個種無神。
 
直到我坐咗係佢隔離，佢望一望係邊個，然後好驚訝咁望住我。
 
阿蓉：「點解你會係到...？」
 
我：「我專登走堂黎搵你。」
 
阿蓉：「我唔想見到你。」
 
佢拎袋走，因為我地個位好近門口，所以佢直接就衝咗出去。
 
我亦都衝出去捉住佢，佢用力想鬆開我隻手，但我用力捉緊佢。
 
阿蓉：「放手呀！」


 
我：「對唔住呀，個晚我飲醉酒先會搞啲咁嘅野咋，你原諒我啦好無？」
 
阿蓉：「飲醉酒大哂？你咁講我飲醉酒去殺人都得啦！」佢繼續用力鬆開我。
 
我：「你比多次機會我啦，我發誓我唔會再飲酒，你唔好嬲我啦。」我用力攬住佢。
 
阿蓉：「點解...點解你要咁對我...我到底做錯啲咩...」
 
佢隻眼輕輕咁流咗一滴淚水落地下，呢滴淚水因為地心吸力而墜落，宣告住佢對我嘅信任已經跌哂。
 
我：「你無錯，係我衰咸濕，我...我之前已經好鍾意搞野...所以先會咁...」
 
阿蓉：「所以你就可以忽視我感受...？我唔同你搞...你就去同其他人搞...？」
 


我：「對唔住...對唔住...」我已經內疚到除咗講對唔住之外都唔知可以講咩。
 
阿蓉：「你答我...你最愛嘅人...係咪我？」佢兩隻濕到好似舊海綿嘅眼無力咁望住我。
 
我：「一直都係。」
 
我扚起佢下巴錫咗落佢個嘴到，然後我就好似夕陽武士係最後個幕比孫悟空上身咁對個女仔講咗句，
 
我：「我愛你。」
 
就連我自己都分唔清呢句我愛你係講真定講假，又或者真同假都唔重要，人地信就夠。
 
阿蓉無再嬲我，只係希望我以後可以修心養性，唔好再亂咁flirt女。
 
但要我呢種人去修心養性根本係無可能，就好似要一個毒犯唔再吸毒一樣，無十年八年都做唔到。


 
正如我之前所講，我一直都扮緊蔡煒燕，佢做咩我做咩，佢花心我花心，佢風流我風流。
 
其實好似Bella同Emily所講一樣，扮下扮下先發現，真正嘅我好似已經唔見咗。
 
同大家都一樣，係其他人面前都扮緊另一個角色，永遠都唔會將真正個面比人睇。
 
你可以話咁樣係虛偽，但事實就係每個人都係假，你夠膽講你對每個人都係同一個樣？
 
至少我唔夠膽。
 
所以我已經分唔清自己係用緊蔡煒燕嘅角色去愛人，定還是魏煒燕嘅角色去愛人。
 
魏煒燕係一個內向又毒嘅人，根本就無人睇得上眼，但唔緊要，我可以用蔡煒燕嘅人格，去扮演一個男神級又好Charm嘅靚仔。
 


呢個情況可以用四隻字去形容，精神分裂。
 
以前嘅我，一直都徘徊係燕同埋真實身份之間。
 
同你地一齊嘅時候，我都唔知你地鍾意嘅到底係燕定係真實嘅我。
 
所以咩都好似玩玩下咁。
 
個人沉澱返幾年之後，請容許我好似張家輝咁講句。
 
燕就係我，我就係燕。
 
阿蓉：「我有野想送比你。」佢係個袋到左摷右摷，終於比佢搵到兩隻戒指。
 
阿蓉：「一隻你嘅，一隻我嘅，好平架咋，我係旺角20蚊買返黎。」
 
我：「做咩？咁快就想同我結婚喇？」
 
佢拎起我隻左手，將隻戒指套落我隻無名指到。
 
阿蓉：「我淨係想你知，無論你去到邊，都有我呢個女朋友係到等你。」
 
所謂物輕情義重，即使只係20蚊嘅戒指，卻代表住我對你嘅愛唔止20年，200年，2000年。