我嘅大學生涯 (有甜): 拋棄
一下子同Bella，Hidy，麻呼劃清界線，緣來緣盡 ，唔知下一位會係邊個。
Emily：「翻版燕，你覺得咩係愛？」
我：「尊重下先？乜撚野翻版燕呀。」
Emily：「咁係呀嘛，個名又叫魏煒燕，係人都知你偽造出黎架啦。」
我：「你鍾意點講就點講啦，不過確實有人話過我好似佢，但永遠都成為唔到佢。」
Emily：「佢又無講錯喎，你做到佢嘅話一早就做咗。」
我：「我唔明喎，佢有嘅野我都有，我係一個靚仔，又有大把女，有咩分別先。」
Emily：「重點唔係呢樣，你咁講咁我同全部人都無分別啦，個嗰都有眼耳口鼻。」
Emily：「重點係你個心想變成一個點樣嘅人，係咪真係想成為一個淨係食女屌閪嘅人？你可以諗下。」
我：「咁你呢，你又想成為一個點樣嘅人？」
Emily：「我答你唔到喎，因為我個心已經穿咗個窿。」佢指住自己個心口。
Emily：「諗下自己到底想點啦，下下跟住人無意思，人做乜你做乜，同隻狗又有咩分別。」
佢講完就走咗，望住佢好落寞嘅背影，好想知佢到底經歷過啲咩。
嘛，比佢搞到我都唔知自己到底想點，惟有好似陳蕾所講，如若迷失請謹記回家。
阿蓉打電話比我。
阿蓉：「阿燕...好似有人跟住我...」
我：「吓！咁你宜家係邊？！」
阿蓉：「我係學校出面條天橋到呀，佢由DDD跟到我去CCC，宜家仲跟埋出黎係我後面...」
我9秒9咁跑過去條天橋到，阿蓉已經比一個男仔不斷迫近，佢個樣好驚，兩隻手捉實自己個背囊。
當個男仔笑淫淫咁想摸佢嘅時候，我衝埋去一野撞跌個男仔，個男仔起返身見勢色唔對即刻跑走。
我：「你無事呀嘛？」
阿蓉：「我無事，好彩有你係到咋。」佢攬住我再講。
我：「擔心死我啦，我好驚你比人食咗呀。」
阿蓉：「都係你衰囉，唔好好保護我。」
我：「係係係，我以後日日係你隔離保護你，上刀山落油鑊都在所不辭。」
阿蓉：「嘻嘻。」佢真係好似細路女。
望住佢嘅笑容，唔知點解我個心有一種我唔識得形容嘅感覺。
我真係鍾意咗佢？
拜託，這只是我的幻想。
Player最驚就係自己成為動情個嗰，我唔想鍾意人，鍾意人永遠都無好結果。
阿蓉：「不如我地走堂去睇戲囉？」
我：「你好曳喎，但我鍾意。」
我地去咗睇年少日記。
最後係戲院出返黎之後，阿蓉哭成狗，而我無乜太大感覺。
我相信好多人都會喊，一個咁細嘅小朋友已經體驗一種無助得黎又無法改變嘅絕望，比佢老豆暴打，比佢老母放棄，比佢細佬無視。
我唔係無感覺，唔多唔少都會有種心酸，但我無辦法好似阿蓉咁樣哭成狗。
唔知有幾多人同我一樣，一開始睇以為大過咗個嗰男主角其實係阿哥黎，我以為係佢大過終於做到佢想成為嘅老師，然後去幫返啲想自殺嘅中學生。
但結果係細佬黎，佢因為阿哥嘅死而終於醒覺，算係幫佢阿哥完成心願。
阿蓉話阿哥真係好慘，天資唔夠細佬聰敏就比佢老豆老母放棄，仲要自覺就算無咗佢，佢地一家三口根本就唔Care，仲會繼續生活落去，特別係個一句「我不是甚麼重要的人」，無辦法唔令人心悒。
同我一樣喊唔出嘅人，我相信都係因為我地無經歷過呢啲野，未必真係完全拎得到個共鳴。
情況就好似幸福嘅人，永遠都唔知唔幸福嘅人係點。幸運嘅人，永遠都唔知不幸嘅人係點。幸存嘅人，永遠都唔知死去嘅人係點。
我對女仔個喊樣一直都無抵抗力，見到佢喊我個心都唔好受，唔好問我點解Bella喊又無乜反應，個陣我已經光速逃離現場。
我摸一摸佢塊面，再抹走佢啲眼淚。
阿蓉：「如果我做咩都唔好，讀書唔叻，打機唔勁，你會唔會好似佢老豆咁唔要我。」
「求下你…唔好唔要我…我求下你…」
我：「唔會，我咩都唔要，淨係要你一個。」
如果我當初有咁講，佢係咪就唔會自殺？
我到宜家都不斷問自己點解個陣可以咁仆街。
之後同佢食埋夜晚個餐我就送佢返屋企，係巴士到佢挨我膊頭到睇風景。
Hidy：「做緊咩呀？」佢wts我。
我：「送緊女朋友返屋企。」
Hidy：「咁啱嘅，我都比男朋友送緊返屋企喎。」
我：「係你應該同佢傾計而唔係搵我。」
Hidy：「同佢日日都傾架啦，佢唔厭我都厭。」
我：「你大把兵仔可以傾啦，喂咪住先，定你當我都係兵仔。」
Hidy：「笑死，你知唔知我Set你聯絡人做咩名，係我最愛嘅燕燕。」
我：「你就黎21歲啦，改啲名仲成個小學生咁。」
Hidy：「你由我啦。」
阿蓉：「同緊邊個傾計呀？」佢突然講野嚇到我成個人震一震。
我：「哦無，我阿媽咋嘛，佢問我幾時同佢食飯。」
阿蓉：「話時話，你中學個陣係點架？」
我：「乜我嘅過去重要咩？」
阿蓉：「咁同得一個人一齊就要了解佢嘅過去嘛，唔係架咩？」
我：「你咁講有道理，但係每個人都有私隱架嘛。」
阿蓉：「係，但係我好想了解你呀。」
我：「我唔想講呀，你唔好迫我啦，好無？」我有啲不耐煩咁講。
阿蓉：「好好好！我唔迫你...你唔好唔要我呀...」佢用力捉住我隻手。
被拋棄嘅感覺一直都唔好受，你扔低我自己一個人，咁我仲可以去邊？
我：「我無話唔要你呀，唉，到站落車啦。」
送走佢之後我終於有得靜下。