【愛情】拜托，別再見: 08

對我來說，宜家每日都係假期，不過我都會將鬧鐘較喺朝早9點，可以用嘅時間好似會多啲

喺坐喺餐枱前等緊媽媽煮好早餐嘅期間，我拎住手機等程栩顥覆message，佢都係一向早起嘅人嚟

喺對話框上方嘅聯絡人名稱只有「木羽」兩個字，都已經唔係好記得係幾時set咗呢個名，不過我平時叫佢都係叫全名

「你今日有咩做？」佢秒讀秒回

「冇，就喺屋企頹廢一日」我喺最後再加一個笑喊表情，「你今日有咩做？」





「打算去書店，之前買嗰本書睇完啦」

喺我打緊字要覆佢嘅時候，佢又send咗句：「你要唔要一齊去？當出去行下呼吸下新鮮空氣」

「都好」我諗咗一諗就答應，「幾點等？」

「2點，照舊巴士站等」程栩顥回覆，我望一眼時間，都仲有成個幾鐘

⋯





「你要買咩書？」我跟喺程栩顥身後行

我平時基本上都唔行書店，因為我都唔係啲中意睇書嘅人，所以對我嚟講行書店冇咩特別

「未諗好呀⋯」程栩顥一臉專注咁望住架上嘅小說，睇啱就拎落嚟望下，「所以先打算過嚟睇下有咩有興趣嘅書⋯你睇唔睇？」

「唔啦，我買完番去都唔會睇⋯」我搖搖頭，只係跟喺佢身後行

我隨手拎起一本散文掀開一頁嚟睇，散文嘅字句好容易就可以戳中心事，係因為心事太普遍定係作者已經體會過人生百味？





程栩顥企喺離我唔遠嘅位置，低頭專心睇捧喺手上嘅書，睇起嚟已經完全沉醉喺文字嘅世界中

我仍然同佢保持住一樣嘅距離，只係企喺同一位置默默觀察，望住佢好輕易咁融入咗周圍環境

平日嘅佢都唔係啲好嘈嘅人，同我地一齊嘅時候會多嘢講好多，都會講笑打鬧，但如果我地唔喺佢隔離，佢就會變到好安靜，開口都懶嗰種安靜

「揀好啦？」我為咗唔好嚇親專心嘅佢，我放輕咗腳步行到佢隔離

「嗯？」程栩顥轉頭過嚟，似乎都係窒咗一窒，「未呀，再睇下先⋯行啦。」

「以為你睇啱咗啱啱嗰本。」我跟喺佢隔離行

喺佢停落嚟嘅時候抬起頭望下每個印喺書脊上嘅書名，雖然我都唔會真係買嚟睇，但係見到有趣嘅都會望多兩眼

「係唔係好悶？」程栩顥突然笑起嚟問咗我一句





「冇特別悶。」我笑道，「我今日只係出嚟散步～」

對我嚟講今日只係出嚟呼吸新鮮空氣嘅日子，平時我盡量都唔想出街，但如果有人約我嘅話我都會出去行下嘅

企喺書架前左睇睇右睇睇嘅途中忽然感覺到個肚咕嚕咕嚕咁響，我喺出門口之前淨係食咗一塊麵包

「你餓唔餓？」我拍一拍程栩顥嘅手臂問

「你有冇食嘢？陣間洗唔洗食嘢？」佢將另一本書從架上拎落嚟，打開掀咗幾頁

「我出嚟之前食咗一塊麵包，有少少餓，不過都Okay，未到好餓。」我望住佢從書架上又拎咗一本書落嚟，「你睇埋先啦～」

「好呀，我今朝早都淨係食咗梳打餅。」程栩顥將手上拎住嘅小說合上，「我揀好啦，行啦。」





「揀好？」我有啲愕然，因為佢本書先啱啱拎落嚟，「你可以再睇下都得。」

「唔洗啦，就呢本啦。」程栩顥將拎起手中嘅書微微舉一舉起示意，「等我比埋錢就去食嘢啦，你睇下食咩。」

我企喺外面等佢，佢行到我面前嘅時候將新書小心翼翼咁放入袋，我伸手捏咗掛喺佢袋上面嘅公仔一下，佢嘅袋上面成日都會掛住一個毛公仔，每一個袋都有，我通常都會喺見到嘅時候伸手捏一下

「諗好食咩未？」程栩顥喺我鬆開毛公仔同時問我

「想食茶餐廳，照舊食茶餐廳。」我指住地面示意餐廳喺樓下

程栩顥冇太多意見，瞬間就同意我嘅提議；我地一齊落番樓下嘅茶餐廳食個晏晝，呢間茶餐廳有新鮮出爐嘅蛋撻同麵包，一到門口就可以聞到蛋撻同麵包嘅香味

我地喺窗邊嘅兩人枱卡位坐低，我睇咗陣餐牌都諗唔到食咩好，最後喺思考咗好耐之後都係叫咗一份餐蛋治再加多個蛋撻

「邊個啱啱話自己唔餓，宜家又食蛋撻又食三文治？」程栩顥大概係望到落單嘅記錄，望住手機笑出聲





「啱啱經過門口聞到蛋撻味，真係好香⋯！」我將餐牌放番喺一邊同時解釋起嚟，「突然間好想食蛋撻。」

我嘅蛋撻先到，果然想食嘅嘢即刻食到係好幸福嘅事，我咬咗幾啖就食完成個蛋撻

「紙巾。」程栩顥抽咗張紙巾遞比我

「你之後會揀住Hall定係點？」我問佢

「我？我都未諗好，不過我冇特別想住Hall，應該都係住屋企。」程栩顥一臉平靜，睇起嚟係真係冇住Hall嘅打算，「你會住Hall咩？」

「我？我冇打算。」我搖搖頭，「今朝收到遠菁message，佢話想出去玩。」

「佢想玩咩？」程栩顥笑問





「咁佢又冇講喎⋯只係話想趁仲未開學再出去玩。」我拎起手機睇番今朝早遠菁send比我嘅message

「佢成日都想出去玩，你成日都去番工。」程栩顥講出同某個人完全相反嘅說話

「你話我成日番工，潘煦言話我成日唔番工⋯」我喺大腦中思考呢句矛盾嘅說話，無奈咁笑問道，「到底我係成日番定成日唔番？」

「上次撞到嗰個男仔？」程栩顥嘅眼珠左右轉轉，「一聽就知佢成日都番工。」

「真係，所以成日都話我唔番。」我望住店員將我嘅三文治放低喺枱，又將程栩顥叫嘅麵餐放低

「佢係想你同佢一齊番咋掛。」程栩顥平靜咁將浸喺熱水入面嘅叉拎出嚟

唔知程栩顥係點樣瞬間可以諗到呢個觀點，不過潘煦言又真係有講過一齊番開心啲之類嘅說話

「但我唔中意成日番，成日都番工嘅話，你地約我就好難出嚟。」我搖搖頭解釋，「我都覺得暑假係要休息要玩。」

「講得好啱～」程栩顥笑起嚟，佢笑起嚟嘅時候眼睛都係彎彎嘅，「所以唔洗成日番工，玩多啲啦！」

所以佢係真心笑定敷衍笑一眼就睇得出，眼睛係唔可以講大話，同佢嘅氣質同人設本來就好合適

「陣間要去邊？要唔要再去對面商場嘅書店睇下？」我問佢，「可以再望下。」

「都好，陣間去啦。」佢冇思考太多就答應咗




IG Link: https://www.instagram.com/nd_cotttoncandy/?hl=zh-tw