一覺瞓醒，你竟然同我講香港有喪屍2-雙龍: Zombie 12：CCTV.

由於不想冒險，所有人都沒有想要往樓下查看的意思，而是打算用監視系統播放這幾天的經過，只不過監視系統的主機設在拳館的辦公室裡。
 
「個CCTV係咪真係睇到㗎？前兩日成個世界都冇電，仲錄到咩？」洪家星問道。
 
「冇電嗰陣個後備電會自動著，但係我都唔知可以錄到幾耐㗎，嗰陣個哥仔話就算跳電都可以用㗎！」寒一鳴解釋。
 
「諗嚟都冇用，直接去睇吓咪知囉，順便睇吓有咩可以搬上嚟用。」寒天龍說。
 
三人再度出發往一樓拳館，途中胡炎陽打算按門鈴查看租客的狀況，但被其餘兩人阻止。
 




「睇咗CCTV先啦！」洪家星按著胡炎陽已伸出快按到門鈴的手輕聲說道。
 
三人來到一樓，打開門後就已經發覺有種奇怪的感覺，但就是說不出個所以然，總之三人都有同感。
 
由於還是太陽正猛烈的時間，透過窗外的陽光已經好足夠照亮整個地方。環視了一圈後，室內並沒有發現有人闖入的痕跡，但玻璃窗外卻印著好幾個血掌印，而且玻璃窗明顯有好幾道淺淺的裂痕。
 
胡炎陽率先走進辦公室，熟練地按下電腦鍵盤的空白鍵，真的如賣家所提及的一樣，電腦螢幕瞬間亮起，連同監視系統也發出了一些「咔嚓嚓」的運作聲。緊隨其後的二人此刻也走到了胡炎陽的身旁，盯著電腦螢幕目不轉睛等待著他接下來的操作。
 
「點呀？」寒天龍心急問道。
 




「等陣啦！要Login返先可以睇㗎！」
 
胡炎陽把錄影時間調回去兩日前，螢幕上共有八個小視窗，分別是每一層的樓梯間、天台入口和拳館室內各一個。把時間調到去下午五點多的時候，四樓的大門被打開了，畫面顯示有兩個租客正踏出家門，門後有好幾個人影貌似歡送著這二人。
 
「應該係嗰兩公婆喇，個老公死咗，噉佢老婆去咗邊呢？」寒天龍指著螢幕問道。
 
螢幕顯示這兩人由四樓走到一樓，然後在拳館門口不停扭動門把，屢試不果後，便走到唐樓入口處鑽出去大街。
 
見謎底解開了，胡炎陽便把速度調成十倍速繼續看，直到螢幕時間顯著零晨兩點多。男租客喘著氣，神色慌張左右回望了幾秒後，嘗試鑽回唐樓內。但不知道看到什麼駭人的東西，突然就轉身跑離現場。
 




畫面一直播放著入口處，只是遲遲都未見有什麼驚人的東西出現，胡炎陽本想把速度條再調快一點，但洪家星卻突然按住了他的手。
  
「等陣先，你哋睇吓呢邊。」
 
倆人順著洪家星手指的方向看去，螢幕上顯示著四樓的小方格出現了一個小男孩的身影。男孩畏首畏尾，深怕吵醒其他人似的，看起來格外的小心。
 
「個細路好熟口面……叫咩話？康仔？豬仔？」寒天龍疑惑道。
 
「係宏仔！噉即係出去嗰兩公婆係財哥財嫂……」胡炎陽仔細觀察後解釋。
 
「咁矇你都睇得出？四樓好似有兩個𡃁仔同一個𡃁妹㗎？」寒天龍再問。
 
一旁的洪家星突然衝口而出「原來……個Cam咁矇㗎！好唔安全㗎喎！」
 
兩人並沒有理會他，胡炎陽再指了指螢幕上男孩頭戴的鴨嘴帽說「佢成日走嚟拳館門口睇我哋打拳，一定係佢！你睇吓佢件衫先，我送俾佢㗎！」




 
「我鬼知你送件衫俾人咩！照你噉講，佢哋即係財哥財嫂啦！但係財哥死咗喎！俾人咬死咗喇！」寒天龍這次肯定地說。
 
三人面面相覷，沉默了好幾秒。為了盡快得知宏仔的行蹤，胡炎陽再次按下播放鍵。畫面顯示宏仔從四樓慢慢走到唐樓入口處便停了下來，可能是障礙物堆疊太高的關係，宏仔顯然看不到街上的狀況。他一邊跳，一邊伸高雙臂嘗試抓住洞孔的邊框，經過幾分鐘的嘗試後才成功爬到出去。
 
「照咁睇，佢成家都出晒去，不如再睇埋落去。」洪家星提議。
 
畫面一直快轉到隔天的晚上，財哥抱著宏仔再次出現在唐樓的入口處，他明顯要硬推宏仔進內，但卻被一個女人抓個正著，還硬生生咬了一口他的手臂。見勢色不對，財哥便抱著宏仔向前快跑，不知逃到哪裡去。
 
「噉様睇嚟，嗰日睇到嘅應該就係佢又跑返嚟，然後俾人咬死。」寒天龍回想著當天的狀況。
 
「噉你嗰日唔去救佢？」胡炎陽有點怪責地斥罵道。
 
「點救？落去分擔佢俾人咬嘅痛？」
 




「連政府都冇人嚟，我哋呢啲小市民又點會有能力去救人呀？」洪家星附和。
 
事實的確是這樣，而且根本就沒有義務去救人，胡炎陽心裡其實非常清楚這一個道理，那只不過是衝口而出的一句話而已。念在跟宏仔有點交情，心裡確實擔憂著他的安全。