《可逆告白式》: 序

《可逆告白式》 序
首先好榮幸可以寫作者序，序係好特別嘅章節，可以投放多啲個人情感，講啲自己想講嘅嘢，交代故事嘅背景等等，所以我都好希望可以解答大家嘅疑問或者俾信心大家。
我會由背景講起
故事將會係愛情故。相信睇到呢句嘅你哋會問：你自己都冇經驗，寫乜鬼吖，不如算啦！
我會答，冇經驗，唔代表我冇用腦諗。我有用腦諗過好多畫面，呢啲畫面都足夠俾我寫一個好嘅故事。有支持者都實有Haters，但係只要做好自己就夠，我希望寫個自己滿意嘅故事。而呢個故事，都會係寫俾未來嘅自己，提醒自己。
佢記述嘅係好單純嘅純愛走向，見到張Poster都知係同學校有關啦，呢邊我就賣個關子先，但係成件事並唔順利。
只有艱難得嚟嘅嘢，我哋得到先會珍惜，失去咗先識心痛，人可能就係咁犯賤嘅生物。
而寫一個圓滿嘅故事係我嘅渴望，我好想完整俾大家睇下《可逆告白式》嘅真正面貌。
咁講返少少寫作動機，2023年2月26號，我寫咗《逃出夜半的順利商場》嘅第1章，都即係佢嘅雛形版本，得到唔錯嘅迴響。之後我一路努力寫每個章節，又試圖將章節間連結，穿針引線，都喺每個新章節一直嘗試全新嘅玩法/世界觀，呢個係好冒險嘅寫法。
好遺憾，呢個作品未可以完成，未可以一直跟住我去到我大個投身社會，但係做出嚟嘅過程我一直樂在其中。無論係諗劇情定影海報嘅過程，我都學到好多，聽到唔少人嘅意見，俾人一次又一次追稿，都意識到自己有好大改善空間。




《可逆告白式》將會係我希望可以做到尾嘅新作品
佢以純愛做基礎，係愛情故，希望強調係人物/事件細節，仲有反映社會情況，都要學點事半功倍，改善以往缺陷。
新作品劇情仲未定好，仲喺發想階段，但係第1章已經有啲諗法出嚟。
我都意識到我喺各方面設計要再進步，諗下故事點設計先可以吸引人，相信呢啲都會喺《可逆告白式》解決。
原本我仲想將《逃出夜半的順利商場》做《可逆告白式》嘅副線，但係有啲新樽裝舊酒唔夠創新，同企劃太難嘅感覺。
而且我之前同大家講《順利商場》會免費推出俾大家睇，嚟緊《可逆告白式》都會一樣。
但係喺0收益下，我嘅表現未如預期，都係我一直冇信心或者決心寫落去嘅原因。所以小弟喺呢度想請求大家多多支持，Share 出去俾身邊嘅人睇，寫得差都唔怕直接指出改進嘅地方，寫得好就都Like下同繼續追落去啦(無論好壞都最好係咁)。有問題歡迎留言問我！
好快，我哋第1章見。

浪子回投




2024年8月28日