F4嗰年，我的太陽出來了: 我頭先踩到佢

【盧愷玥視角】

——————————————————

中四開學嘅第一日。

「各位同學，無論你係中幾，都請你盡早開始溫習，唔好等到中六嘅時候先發憤！」

個老屎窟校長年年都淨係識叫人讀書，呢句嘢我已經聽咗四次⋯⋯





「大佬啊，佢幾時先講完啊？年年都淨係識叫人讀書，講嘅嘢全部都一樣，好心佢就換吓份稿啦⋯⋯」

打咗個喊路，望向坐喺隔離嘅蓮姐。「蓮姐，好彩你同我一齊入咗精英班咋，再唔係我就冇人可以煩喇！」

蓮姐，本名雷泳嘉，英文名叫 Evelyn ——即係伊芙蓮啦，所以我同啲 friend 都會叫佢蓮姐。

「唔止，我哋學號仲要連埋一齊！親愛嘅盧同學，恭喜你，你今鋪真係可以攞正牌煩住我⋯⋯」蓮姐反咗個白眼。

「哎呀，唔好咁啦！你咁好人，唔好嫌我煩啦！」只見佢又反咗個白眼。





呢個時候，周圍嘅人突然開始拍手，一望，個死人校長終於講完嘢喇！「Yes！佢終於講完喇！」當我諗住唔會有人嘈住，可以瞇埋眼休息一下嘅時候，突然醒起一樣嘢⋯⋯

「係喎！我仲要去攞獎！」

冇辦法，我只好起身，急急腳咁行去台前面排隊。喺我排緊隊嘅時候，行嚟我前面嘅人越嚟越多，於是我就要係咁褪後讓位畀佢哋佢哋，結果一個唔小心⋯⋯

「啊，sorry！」

我踩到後面嗰個人⋯⋯柒到喊⋯⋯我feel到我塊面紅曬⋯⋯





「哦，冇事冇事。」 見佢個樣冇乜嘢咁，應該係唔介意我踩到佢嘅⋯⋯但係佢做乜望實我對眼？哎，唔好再望住我啦，好瘀皮啊⋯⋯

咦，但係，乜佢個樣咁熟面口嘅？

/ 

「本校女子排球隊喺西區中學校際排球比賽（高級組）中奪得冠軍，而家有請女子排球隊代表上台領獎，佢哋分別係6B班李芯桐、5A班唐曉儀、5B班高沚雅同4C班盧愷玥。」

上台、鞠躬、同嘉賓握手、望住相機、等 camman 倒數「三、二、一！」、影相。

搞掂食碗麵，落台！快啲返埋位坐低先。

「我哋明浩嘅男子籃球隊喺西區中學校際籃球比賽（高級組）亦都取得咗驕人嘅成績，勇奪冠軍！」

聽到台上面個司儀咁講，我突然有感而發：「天主教明浩中學」喺學界都幾出名。我哋學校雖然係 band 1，但學業成績就唔算得特別好。不過，我哋學校喺體育上面都幾犀利⋯⋯唔係我自己讚自己，而係我哋都幾常攞獎咁。





死喇，點解好似作咗段明浩版城大潮文出嚟咁嘅？天主教明浩中學是一所歷史悠久、隊伍齊全、學術實力雄厚、中學文化鮮明，在世界具有重要影響力與競爭力的綜合性中學⋯⋯黐線咩，唔好再諗喇！快啲返埋位先，畢竟我仲要睇吓頭先我踩到嗰個人到底係邊個⋯⋯

「而家請男子籃球隊代表上台領獎，佢哋分別係6C班劉家永，6D班蘇澤光，5D班王清，同埋4C班曾天陽。」

嗯，佢叫曾天陽？個名好似幾熟吓，好似喺邊度聽過⋯⋯

認真啲睇吓佢個樣，對眼幾有神，個鼻好挺，嘴就中規中矩；皮膚意外地幾白，而且腳長長咁⋯⋯嗯，都幾靚仔，身材比例又好，會係我鍾意嘅 type。

「嗰個曾天陽呢，我頭先喺台下面踩到佢⋯⋯」

死，無意中爆咗句心理獨白出嚟㖭⋯⋯

聽到我咁講嘅蓮姐當堂成個人望住我呆咗⋯⋯於是我係咁 fing 佢隻手，「喂喂喂喂，唔好咁驚訝先，醒啊！」





「人哋好多 fans 㗎，希望你冇俾佢哋睇到啦，再唔係佢哋一陣圍埋嚟打你！」

「黐線咩？你唔好講得咁誇張啦！我見佢都冇乜嘢咁。」想講啲咁嘅嘢嚟嚇我？蓮姐你太天真了！

「得喇得喇，我講笑啫⋯⋯」蓮姐無奈地兩手一攤。「但試過有幾個女仔同時鍾意佢，呢點係真嘅。」

「哇，佢咁受歡迎，咁佢肯定有女朋友啦！」

「錯，佢而家冇！」

「咁神奇？係因為佢唔想拍拖，定因為佢係 gay ⋯⋯」雖然我知咁樣笑人嘅取向（尤其係個三唔識七嘅人）唔係幾好，但係我爭啲就笑咗出聲。睇佢個樣都唔似係孿㗎喎⋯⋯

「咁應該唔係，據說佢 f2 有同其他學校嘅女仔拍過拖，不過幾個月就散咗。」

我岌咗岌頭，繼續分析：「咁即係佢對我哋學校啲人冇興趣啦！呢啲人似會係喺出面識一堆女仔，然後喺嗰堆女仔裏面搵啲 target 出嚟嘅⋯⋯」





「Fuckboy！」我同蓮姐異口同聲答咗個答案出嚟，搞到我哋忍唔住笑，仲笑到震曬。

/

「Fuck ⋯⋯對唔住，我唔應該話佢係 fuckboy ⋯⋯」

壓力山大。點解佢會喺我正右邊。

蓮姐唔喺我後面，因為我已經係呢行坐最後一個嗰位。親愛的蓮姐喺隔籬嗰行。

蓮姐，你叫我點樣自己一個對住曾同學。

蓮姐，點解你要拋棄我。





蓮姐，你係渣女，你係垃圾。

我可以點樣渡過呢個高中生涯。