讓我當你的籃板球女友好嗎？: 第二十五章
「喂喂？？你又唔係到？」
「喂？樹？」
「喂喂？樹！」
我驚醒過來。
我望一望手錶，現在是晚上八點多了。
「喂！喂！」阿威仍在另一頭不斷叫著。
「你繼續幫我搵！我而家黎！」我說罷便立即收線，打算轉身就出門。
阿曦卻站在我的臉前說：「你要走啦？」
「係……對唔住。」我邊穿鞋子邊說。
「去搵嗰個日本女仔？」
「係，原來一直搵唔到佢，我擔心佢有事。」
「點解個個都要走……？」她突然像個小孩發脾氣的坐在地上哭了起來。
「唔係，唔好咁，阿威搵唔到佢……」
「點解要走？唔好走啦好無？佢都有人搵緊佢啦，你去左都未必有用……」
「對唔住……唔得，今日係我約左佢，而家搵唔到佢，係我責任黎！」
「可唔可以留低……你仲中意我架嘛……係咪？」
「可能……對唔住阿曦，我好後悔咁做，
我唔知嗰刻我係出於同情定係放唔低，
但我好清楚呢一刻，就算我放唔低，都只係以前既回憶，
將回憶同現在重疊左，對唔住……係我唔夠成熟。」
「我應該中意既係木下。」我補了一句。
「木下木下，成日都係佢，提住既都係佢，講到佢好好咁……」
她喘著氣望著我說：「你被佢玩左都唔知……你究竟知唔知道，當初我地會分手，都係因為佢咋！」
？
我不明白。
她到底在說什麼。
我們分手關木下什麼事，不是阿曦自己決定的嗎？
她看我一副不解的樣子，繼續說：「當初唆擺我同你分手既，就係木下呢個人。」
我不相信。
「你只係佢其中一隻兵咋！蠢到死！」
我不相信。
我身體本能上不停在搖搖頭……
「唔會！木下唔係啲咁既人黎……」我笑出來說，
我也不明白我為什麼會笑出來，好像聽了什麼好笑的說話，
可是這一笑，卻把我肺裡什麼掏空出來一樣，有種空空的感覺。
「點解你到呢個時候仲要執迷不悟，信住嗰個女人！我呃你做咩？」她大叫起來。
「如果你唔信！我同你一齊去搵佢，同佢當臉同質！」
她拉起我的手就走，我很被動的被她拉著走，腦海卻不停回想一些片段。
當初，我跟阿曦分手的那一天，木下跟阿曦是一起回家的……
木下好像跟阿威很熟悉的樣子……
我感覺到頭有點暈和痛，用手按了一按，不敢再去想。
不會的，我相信木下的。
雖然與阿曦一同出來有點超出我的預期，不過能成功出來就好，當務之急是要找到她。
我首先打了一通電話去她的家，因為她爸爸媽媽從來很晚才回家，所以只有她聽電話的可能。
而確實沒有人接實。
我再試了十多次，還是沒有人接聽。
確定她不在家了，我們便乘著的士往海洋公園去。
我又打了電話給阿威，可是他仍未找到。
到了海洋公園已經九點多，不少人都趕著離開，散去的人流眾多。
我們來到門口，果然沒有木下的跡影。
「你終於到左？」一轉身，便看見喘著氣、滿頭大汗的阿威。
「未搵到？」
他點點頭，看得出他走得蠻辛苦的。
「我已經係附近加埋入左去海洋公園搵，都唔見佢……希望佢只係走左唔返屋企……」
「對唔住，辛苦你……到我去搵就得。」我感到很愧疚的說。
阿威此時說：「我可以繼續，我去嗰邊，分頭搵下。」
我點點頭，然後便分開去找。
我們到了門口的附近、車站，到處都不見她的跡影。
「到底去左邊……」
此時，我眺望到離門口一段距離、遠處的一個不顯眼草叢堆中坐著一個身影。
難道？
我們馬上趕過去，走近一看，果然……
果然是木下！
本來正低著頭的她，感覺到有人腳步前來的聲音，緩緩的抬頭一看便瞥見我。
「阿……樹？」她第一眼看到我時，立即起了笑顏，
剛想說話，眼睛忽然卻注意到我身旁的阿曦，
把說到出口的話吞回肚裡，很清晰地看到她的笑容呆住了，然後慢慢的退卻。
「對唔住啊！我今日有啲事黎唔到，妳又未有手機，
我本身叫左阿威黎通知黎，點知搵唔到妳，
要妳等咁耐……對唔住對唔住啊。」我極度抱歉的說。
「唔洗啊，我……」木下說到一半，
阿曦忽然開口說：「好啦，而家搵到佢啦，咁你可以問清楚佢啦！」眼神充滿著憤怒。
木下疑惑的望著我們。
「你唔想講，我可以幫你問。」她轉頭望著木下問：「妳認唔認，係妳唆擺拆散我地？」
「嗰時我感到好迷惘，對於我同阿樹既關係，因為我成日令佢唔開心。
然後身邊既美寶就係咁同我講，叫我分手，唔好再繼續傷害阿樹。
而你嗰時，亦無啦啦接近我，問我阿樹既野。
分手嗰日仲鼓勵我，話如果無心就無謂再拖。
最後美寶同我講左啦，係你指使美寶咁講，想專登拆散我地，
只係因為你對阿樹有興趣！我有無講錯？你呢個咁假既人？」
「等個個都以為你好好，其實你只不過不停咁收兵！」
「妳認唔認？講啦！」阿曦說著說著，不禁竟然自已哭了起來，
轉頭抱著我大哭。
我不忍把她推開。
木下本來愣住了，然後眼神有點恍惚的望著阿曦，再慢慢的望著我。
她的眼神……有一種的我不知怎形容感覺……
木下，
我不相信妳會這樣做的。
對吧？
說一聲不是吧！
終於，木下緩緩的開口了，可是她說的是：「無錯……你講得岩。我的確係存心拆散你地，想收阿樹做兵。對唔住……我估唔到對你地傷害咁大。真係對唔住。」然後她向著我們鞠躬道歉。
「你終於係認啦咩！」阿曦滿臉眼淚的說。
「好對唔住……對唔住……」她仍然低著頭說。
「賤人！全世界都被妳呃左！」阿曦罵著。
而我此刻已經不知道她們在說什麼。
我整個人都被抽空的感覺，空氣變得很稀薄，完全呼吸不到一樣。
「係……真既？」
我們的回憶都是虛構的嗎？
木下抬起頭，眼睛泛著淚水望著我。
她點點頭。
她忍著淚水在眼眶打滾說：「對唔住……係我貪玩……」
「我……我唔會再打擾你地……對唔住。」
苦的澀的甜的酸的懷念的 我們回不去了