用AI圖寫故仔(續): 十五．毛屌王之怒
出去舒展完一輪筋骨，馬克又再無日無夜咁努力喺遊戲之中，終於爬到70級。佢喺衝破60級大關之後，就發現解除等級限制嘅只有自己，而佢召喚出嚟嘅手下，係同其他正常遊戲角色一樣，最高等級只有60。原本諗住成隊隻隻首領級實力嘅計劃就告吹喇，但係70級嘅馬克帶住嘅呢隊獸人隊伍實力絶對超班。單以數值計，佢哋係比唔上好多副本中嘅大佬，不過馬克本身技術好不在話下，仲要每次可以根據情況用唔同嘅打法同陣型，唔似遊戲角色咁千篇一律，所以無論對住遊戲角色定係玩家隊伍都係無往而不利。
隨住馬克嘅等級不斷上升，佢越嚟越大膽，同其他玩家嘅衝突都開始增加，由以往只係喺副本中襲擊玩家，到而家不時喺副本外面嘅遊戲世界現身挑戰其他玩家。當然佢都唔係天下無敵，唔會去好多人聚隻嘅城市或者村落挑機，主要都係喺野外伏擊玩家小隊，有時亦會捉咗隊伍中嘅女玩家，用惡意程式逼佢哋開啟官感同步，然後淫辱佢哋一番。呢啲消息自然會喺玩家之間傳開，隨著發生嘅次數越嚟越多，喺玩家群組之間成為討論嘅話題，漸漸有人開始要求遊戲公司作出交代。
而九賽啲職員係有苦自己知，個遊戲根本做唔到偵測錯誤同反作弊，佢哋唔知道呢個奇怪嘅獸人集團究竟點解會出現，亦無辦法作出修改。但係根據責任不在我方嘅原則，佢哋只有推缷返責任俾啲玩家，要佢哋睇真係咪自己設定嘅問題，仲有唔會就個別遊戲角色作出回應。
喺九賽嘅會議室之中，客戶服務部嘅主任報告：「投訴越嚟越多，我班同事真係無辦法再拖落去。再交唔出一個解決方案，啲玩家真係會棄game㗎喇。」
坐喺主席位嘅露茜目光橫掃向技術部嘅吉米，吉米背脊一陣涼，只係搖搖頭：「從玩家嘅報告同我哋職員喺遊戲中嘅觀察，果隻獸人係叫做大舊炳嘅低級角色，但係佢等級升到異常咁高，而且行為嘅模式同普通嘅AI好唔同。因為系統未修復到，我哋唔知道佢究竟係點樣變成咁，亦無辦法修復到呢個異常角色。」
露茜勉強忍住脾氣，手掩住額頭沉思咗一陣：「好，既然修補唔到，咁就同班玩家講呢個係一個新加入嘅功能嚟啦，一於係咁！」
會議室之中一片嘈雜聲，七嘴八舌都話咁樣唔行，遲早出事諸如此類。露茜終於爆發：「咪嘈！我話係咁就係咁啦！而家我係總經理定你哋係總經理呀？公司老闆係我老豆定係你哋老豆呀？」見到咁，班職員即時又變返鴉雀無聲。
九賽跟住出嘅公告，連馬克都俾佢嚇咗一跳。佢哋宣布連串事件係一個遊戲更新嘅先行測試，而家呢個叫做「毛屌王之怒」嘅更新終於正式上架。根據九賽嘅描述，馬克喺遊戲之中從此就被認定成一隻神出鬼沒、滿身獸毛，周圍殘殺同強姦玩家嘅凶惡獸人「毛屌王」，而且仲配備最新型嘅AI，務求為遊戲玩家提供全新嘅挑戰。咁樣嘅解釋，只要稍為會用腦嘅人都唔會信啦？但係當馬克再登入遊戲，就不得不相信呢個世界蠢人真係多的是。
當馬克喺遊戲世界中行咗一陣，就撞到一隊正喺度做任務嘅玩家，而當佢哋見到馬克，就興奮大叫：「毛屌王呀！」然後拋低手上嘅任務，對馬克發起攻擊。呢班盲毛對馬克嘅事一知半解，以為佢得自己一個，當見到馬克召喚出一班手下，就知道瀨晒嘢。三兩下手腳，馬克就收拾咗佢哋。真係人怕出名豬怕肥，自從九賽將馬克宣傳成毛屌王之後，專登嚟搵佢挑機嘅玩家就不斷出現，一般都係五六人，並唔會對馬克構成太大嘅威脅，但係就相當阻手阻腳，有時亦會令佢手下有啲傷亡，影響到佢之後打副本嘅速度。
但係馬克今日遇到嘅呢一批玩家有啲唔一樣，佢哋總共八個人，啱啱好係兩個小隊，陣型排得相當好，而且睇穿咗馬克會無視仇恨值向後排人員攻擊嘅習慣，互相掩護同靈活走位。再睇清楚，佢哋全部嚟自一個叫「藍蠍子旅團」嘅公會，難怪會配合得咁好，應該係平時夾開，有備而嚟。馬克一方人數上係佔咗上風，但係一時三刻又無辦法快速解決對方，不斷你來我往。正當馬克打得興起嘅時候，再有一個人趕到加入戰團，係一個叫做艾格妮斯嘅女魔法師。
「會長！」幾個玩家一齊同女魔法師打招呼。原來係呢個公會嘅會長，睇嚟今次係呢個公會計劃好要動員討伐馬克，亦即係佢哋口中嘅「毛屌王」。本來對方多一個人，亦唔見立即就會形勢逆轉，但係馬克認得呢個艾格妮斯，係遊戲中相當有名嘅高手。馬克喺競技賽之中都算頂尖分子，但係用主要角色對住佢都係輸比贏多。咁一來係馬克嘅戰士角色對住遠程攻擊兼可以控場嘅魔法師係比較蝕底，但係亦證明咗艾格妮斯嘅技術都真係非常好。
今日又遇見呢個棘手嘅女魔法師，的確唔係好兆頭，艾格妮斯一邊指揮班會員，一邊用範圍魔法提供火力掩護。馬克班手下同班玩家雖然同樣係60級，但係全部都係戰士，比起有唔同職業嘅隊伍，實力點都係有所不如。佢哋主要係靠70級而且技術高超嘅馬克彌補不足，但係慢慢都係由攻勢變為防守一方，體力亦漸漸陰乾。
「火雨流星！」艾格妮斯唸出咒語，一陣火雨就落喺獸人手下頭上，又有一隻不支倒地。馬克避開咗火雨，趁住艾格妮斯出招之後，立即衝刺撞前，諗住殺佢一個措手不及。點知艾格妮斯早有準備，一個冰箭減慢馬克嘅動作，再用閃現技能退開拉遠距離。馬克都唔係省油的燈，減速效果一完，就向住艾格妮斯嘅方向作出二段衝刺，可惜已經前無去路，俾兩個補位嘅肉盾擋住咗，後面嘅補師同遠攻亦好快就位，呢次突擊落得功敗垂成。
喺嚴密嘅陣型同訓練有素嘅團隊合作之下，艾格妮斯佢哋逐漸將馬克包圍，而馬克喺苦戰之下，亦擊殺咗對方四個人。手下已經全部戰死，馬克身上亦傷痕累累，艾格妮斯依然從容不逼，從遠處向馬克發出死亡宣告：「毛屌王，今次你係咁先喇。我要所有人都知道，我哋『藍蠍子旅團』喺第一個擊殺毛屌王嘅公會！看招，雷光箭！」艾格妮斯唸起咒語，一個雷球聚集喺艾格妮斯手中，準備飛彈而出射向馬克。馬克喺包圍網之下無處可逃，莫非今次真係玩完？
正當馬克絶望咁等待最後嘅時刻，一陣箭雨突然從天而降，並無做成傷害，反而係令周圍煙霧彌漫。馬克記得呢一招係弓箭手嘅「煙雨亂射」，可以喺大範圍內放出煙霧彈咁嘅濃煙，不過呢招係不分敵我，包括出招嘅人本身視線都受影響，所以用起嚟要相當小心。出招嘅似乎並唔係艾格妮斯一方，可以見到佢哋都出現一陣騷動，究竟係邊個出招？唔通係有人突然加入戰團？
點都好，馬克知道機不可失，趁住呢場混亂，向住艾格妮斯嘅相反方向全力衝刺。馬克根本睇唔到前面有乜嘢，班玩家亦因為濃煙嘅關係睇唔清楚現場情況，俾馬克撞開其中一個，衝出咗包圍網。馬克脫離包圍之後，隱約見到一個攞住長弓嘅女性身影急步離開，莫非就係佢出手？馬克無時間諗咁多，唔理三七二十一，一直向前狂砲，拉開同班玩家嘅距離，然後轉入隱蔽嘅森林之中逃亡。到濃煙終於散去嘅時候，艾格妮斯已經再見唔到馬克嘅踪影。
「會長，追唔追上去？毛屌王應該未回得切血，就差最後一步咋。」
艾格妮斯低頭諗咗一陣：「唔好追，分散咗去搜索只會俾佢逐個擊破，唔分散又無辧法搵勻咁大地方。唉，今次就算啦，來日方長，我哋第日組隊再嚟過。」
班會員喺一片失望之中，七嘴八舌討論究竟係邊個嚟阻手阻腳，最後當然都無結果，開始用道具回城，今日嘅討伐亦宣告一段落。馬克就搵到一個安全嘅地點，等到離開戰鬥狀態之後再登出遊戲。佢反覆思量，都係諗唔到究竟幫佢脫身嘅弓箭手，究竟係何方神聖。