實不相瞞，井型屋其實係鎮魂塔: 來自江叔的禮物
來自江叔的禮物
「細路，你係第一個發現？係幾點？」一位警察問。
我驚魂未定的答︰「八點三左右，我啱啱食完飯。」
警察邊聽邊筆錄，同時又問︰「你最後見佢係幾時？喺邊度？」
我還未冷靜下來，情緒依然不穩，但還是努力抑制着答︰「應該大約一星期前，喺佢屋企，二零零二室。」
警察追問︰「你住十五樓，點解會走上嚟二十樓？你同佢年紀都差一截，你哋好熟？」
「我同佢唔可以話好熟，但見過兩、三次，有啲偈傾咁，我上嚟揾佢係有嘢想問佢。」我說話的聲音還是顫抖的。
「你發現佢嗰時仲有無見到啲咩人，或者有無啲咩奇怪嘢？」警察再問。
我搖搖頭。
「好，我哋會再調查吓，如果有需要，我哋會邀請你返警署協助調查，又或者你記得啲咩都可以聯絡我。」警察給了我一張卡片。
根據法醫初步檢查，江叔已經死了約一星期，沒有表面傷痕，後來驗屍報告指出是死於心肌梗塞，失救致死，但這都是後話了。換言之，我是最後一個看到他的人，亦是第一個發現他的人。
我立即回想起那天他匆忙驅趕我的畫面，還有他鎖門後聽到的「啊」、「嗯」、「呀」、「喔」、「吖」等呻吟聲，現在回想起來的確有點古怪。
無論如何，江叔過身已成事實，我也不懂通靈請他上來問清楚，只是當中有兩個地方我弄不明白︰一，他如何在已經過身的情況下開門給我？二，他手中那張寫給我的遺書紙巾，上面寫的「T+二」代表甚麼？
當然，這兩件事我都沒有告訴警察。我離開二十樓，走樓梯回十五樓，卻在十八樓遇到很久不見的Tracy，她跑上來與我撞個正着。
「Tracy？有無事，有無撞親你？」我連忙上前扶起她，關心的問。
「阿曉？好耐無見，聽講係你發現江叔死咗？」Tracy上氣不接下氣的問，我這才記起他倆本是朋友，她這麼匆忙肯定是想見江叔最後一面，現在的她想必是傷心欲絕。
「嗯……係，sorry，你一定好唔開心，我……我會一直陪住你，令你開心返。」我不知哪來的勇氣說出這番話，而Tracy聽到我的宣言後，本身平靜的情緒也被我擊起千層浪，那強行壓抑的情感徹底爆發，哭成淚人撲進我的懷內。
我要首先澄清一點，雖然此刻的我如同在天堂，但這個結果並不是我的本意，只不過我也完全不介意罷了。
「佢有無留低啲咩遺書之類？」Tracy抽泣着說。
「係有一張嘅，但我唔明佢咩意思。」我把紙巾拿出來展示給她看。
Tracy一看到後有零點零二秒瞪大了雙眼，然後與我首次看到一樣，滿頭問號，完全不知道是甚麼意思。
「你有無咩頭緒？」我問。
Tracy雙眼在眼框內滾了一圈，答︰「無，咩都諗唔到。」
我聽到後有點失望，但也符合我的預期，便無奈的說︰「都係，我都估到。」
「不如畀我拎返去慢慢研究。」Tracy主動提出，我也不好拒絕，怎料她一觸碰紙巾，就像觸電般立即縮手，紙巾更自燃起來，我也立即放手任由它燃燒殆盡。
「你無事吖嘛？」我着緊的檢查Tracy的手，才發現她的手很寒冷，比我的更寒冷。
「無，無事，咩事都無。」Tracy立即收回雙手藏於身後，我看到她暗裏笑了一下，然後她說︰「都夜喇，我要行先，下次再見。」說畢她便奔下樓梯，我也即時飛奔追她打算送她回家，豈料她跑得實在太快，已經消失在樓梯間。
「每次都走得咁快嘅。」我心想，然後便獨自回家。
紙巾自燃如果是江叔事先施法的話，的確有可能辦到，畢竟他都說明只供我一人看，有其他人看到的話自焚也很合理。不過真的是這樣嗎？還是問問阿旻好了。
「荒謬！」阿旻冷冷的答︰「其實只係一個好簡單嘅化學原理。只要喺張紙巾上淋啲液態黃磷，因為佢燃點低，大約二、三十度室温就會燃燒，只不過而家咁凍，得十度左右，所以唔會燒着㗎，但你拎喺手，你嘅體温會慢慢傳過去，佢自然會到燃點，咁咪着火囉！」
「原來仲有咁嘅操作，即係都唔係啲咩神怪嘢嚟。」我茅塞頓開、恍然大悟。
「你聯想到啲乜？」我把「T+二」寫出來問。
阿旻也沒有頭緒，此時爸爸和媽媽也過來湊熱鬧，看到我寫的字謎，紛紛給出答案。
「咪係V囉，T後面兩個字母就係V。」爸爸說。
媽媽不認同，她說︰「呢個我認為就好似『李+x』咁，係一個人名，『T+二』應該係田嘉兒或者田家義之類嘅同音字。」
意想不到的是，阿曦和阿晴也來湊熱鬧，他們說︰「係咪仁字？定係王字？」
「仁王？打機咩？」我笑着說。
「係啊，我睇你之前玩嗰隻game。」阿曦說。
「係囉，好簡單，『T+二』咪就係仁王。」阿晴也說。
「如果係咁簡單，咁點解唔直接寫出嚟，而要咁分開寫？」阿旻提出質疑，然後發表了自己的見解︰「除非係有咩特別message所以要咁寫啦。」
「即係話三個字各自都有自己訊息？」媽媽問。
「我就覺得係各自有自己訊息之餘，合起嚟都有一個訊息，即係要分兩part嚟解讀。」爸爸好像對解暗號很有心得。
「T+二」如果真的分兩部份來解讀的話，究竟是甚麼呢？江叔知我正在幫助Tracy調查五狼案，他給我的訊息理應是與這有關，但應該如何解讀才對呢？
「T係Tracy姐姐，T、R、A、C、Y。」阿晴笑呵呵的說。
「Tracy姐姐係仁王。」阿曦也興奮的道。
Tracy係仁王？不，Tracy係王！難道這便是江叔留給我的訊息？但哪有可能，Tracy又怎會是王呢？王是鎮魂塔最惡的鬼，Tracy明明是人，怎會是鬼？雖然她真的「鬼火咁靚」。況且退一萬步來說，就當她真的是鬼，她那麼弱不禁風，一點霸氣也沒有，怎麼能當王呢？不不不，一定是我想錯，T是另有其人，或者是另有意思，現在這思路是錯的。
「喂，你諗緊咩？」阿旻看穿了我的內心，小聲問道。
「無，無諗啲咩，咪諗緊句嘢有咩意思。」我心虛的答。
「話說，呢句嘢係邊個畀你？」阿旻問。
「江叔囉。」我爽直的答，然後才想起她應該不知誰是江叔，所以補充道︰「住二十樓嘅，Tracy個friend，不過佢啱啱被發現已經死咗一個星期。」
「咁睇嚟T for Tracy唔係無可能。」阿旻冷靜分析說︰「佢係你哋嘅common friend，佢臨死前留message畀你，寫得咁簡約唔係無理由。不過『+二』會唔會係代表除咗佢仲有兩個人？」
我沒有回答，因為我也沒有答案，本身想問江叔的事情也無從稽考，現在謎團越來越多，我也很混亂。
江叔為何安排刁小姐與萬先生冥婚？江叔如何在已過身的情況下開門給我？「T+二」又是甚麼意思？
真希望我懂得任何通靈的方法，好讓我能向江叔問個明白。
就這樣，我帶着這些謎團進入夢鄉。不是有很多名人也在夢中得到答案嗎？或者我也可以透過潛意識幫助解決這些難解；又或者江叔會報夢給我，替我解答疑問。
只不過事與願違，我很久沒有一覺睡到天亮，期間連夢也沒有發過一個，所以那些問題一個也沒有解決。
「喂，哥哥仔，過嚟。」刁太的聲音由鐵閘外傳來，我打開了鐵閘問︰「有咩事啊刁太？」
「我突登拎嚟畀你，我個女今朝叫我畀你㗎。」刁太遞了兩本日記給我，並說︰「呢兩本係佢嘅日記，不過有啲嘢我睇完都唔太明。」
我道謝後接過日記，刁太便離開了。
「趁仲有一日假，今日睇哂佢先。」我在房裏坐下後為自己訂下這個目標，坦白說，我自己唸書也未有這個動力，大概要在模擬試前才拿得出這種狀態。
這兩本日記還很簇新，不像保存了十多年，當我打開第一本看第一篇便完全明白，因為日期是上年一月，這都是她作為鬼時所寫的日記。
我看得很快，因為裏面很多都是記錄日常，直到我看到九月。
「二零XX年九月OO日 晴
今日是中秋節，老公一如既往要巡邏，留下我和兩個BB，幸好有媽媽一起過節。
今年的燈籠同樣很美麗，今年被詛咒的男孩不知下年還會不會是他點燈籠呢？」
難道是指我？
接着是十月的一篇。
「二零XX年十月O日 晴
又一個人跳樓了，我認得他是很久前的街坊，終究還是逃不了。老公，你要加把勁，我永遠支持你。」
這應該是指毛全彬。
「二零XX年十二月OO日 陰
收藏的秘密終究還是被揭開，被詛咒的男孩這一步不知是否明智？但害了一條生命是無容置疑的，但願那本『理應銷毀的書』不會被找到。」
這很明顯是說盧老太的死和那本文件夾。
接着我便翻開第二本，這本只寫了兩篇，因為是今年的，而今年到現在也只過了三天，只是感覺特別漫長。
「二零XY年一月O日 晴
今日被詛咒的男孩竟然找上門，幸好太陽還未下山，否則我也會被拖累。
不過最後媽媽還是把事情告訴了他，他真的是希望之人嗎？我應該把我的事告訴他嗎？」
這不就是昨天發生的事嗎？看來刁小姐也有秘密，或許我的猜想是正確，看來有必要再去與她見一次面。
我拿着筆記走到一六二二室，向刁太道明來意後，她便請我進內，然後讓我在全黑的房間裏待着，數分鐘後，刁小姐也進來了。
「刁小姐，上次嚇親你唔好意思，我叫阿曉，係今年嘅調查員，我諗你都曾經係。」我沒有轉彎抹角，而是簡單直接跟她說。
刁小姐沒有太驚訝，反而帶着欣賞的目光對我說︰「你果然比我聰明，無錯，我係第二任，不過任務失敗咗。」她的聲音在房間迴盪，好像有點空洞。
「所以就被『王』殺死？」我問。
「無錯，係詛咒，同時都係約定。」刁小姐語調平靜，看來她已經看開了。
「約定？」我不解。
「係我同紫茵嘅少女約定，即係嗰啲不能同年同月同日生嗰種低能無聊約定，但我哋嗰種就嚴肅認真好多，所以我到而家都無後悔同怨恨。」刁小姐回憶着說，嘴角還微微向上蹺，原來不是看開，而是約定。
我忍不住問︰「既然『王』係紫茵，你同佢咁好姊妹，點解你仲會背叛佢，同其中一隻害死佢嘅狼冥婚？」
想不到這個問題竟然戳中她心底的傷疤，她的情緒也隨之激動起來︰「咁係肥江想保護我！因為紫茵佢開始暴走，佢完全變咗第二個人，佢想將我留喺鎮魂塔做佢其中一個奴隸，好似其他鬼咁！」
她口中的肥江大概就是江叔罷，但這又令我產生了另一個疑問︰「咁點解江叔，即係肥江，唔係幫你投胎，而係留你喺度？投胎咪一了百了。」
刁小姐合上眼，試圖使自己冷靜下來，待恢復平靜後說︰「係我任性要求，同時都係我媽苦苦哀求嘅結果，起初肥江都擔心我會唔安全，後尾就諗到冥婚呢個辦法，仲特登揾同紫茵有仇嘅萬生嚟做對象，咁就肯定可以保護到我。」
「原來係咁，只不過無理由紫茵唔知你喺度㗎，佢統治成個鎮魂塔，實好輕易就揾到你。」我再次發問。
「阿曉，我唔知你去過鎮魂塔未，其實鎮魂塔都會受現實世界左右。你可以簡單理解成鎮魂塔就係呢座樓嘅另一個時空，不過只要個單位係有人住，咁喺鎮魂塔入面就會受到驅靈網保護，即使係最惡嘅『王』都闖入唔到。而肥江仲雙重保障特製埋呢間房，只要我入咗嚟閂埋門，就可以完全隔絕我嘅氣息，咁就無鬼知我喺度。」刁小姐詳細解釋，也多虧了她，我才終於知道為何鎮魂塔內部份單位會有保護罩──驅靈網──在門外保護。
「況且，」刁小姐還有後續︰「我住緊嘅呢個時空就係現實世界，而唔係鎮魂塔嘅世界，所以上次你先可以見到我。」
那就一切都很清楚了，然後我便問她那時調查的結果，以及第五狼的線索。
「恐怕要令你失望，我嗰時連有第五隻狼都唔知，甚至連一個凶手都揾唔到，我只係查到盧太有本文件夾有齊大廈入住以嚟嘅大事件剪報，但佢從來無畀我睇過。」刁小姐語調中帶點慚愧，看得出雖然紫茵想要她做奴隸，但她還是為未能幫到好姊妹而心有不甘。
「咁你老公，我可唔可以見埋佢？佢救過我兩次，我想當面多謝佢，順便問吓佢。」我大膽要求。
刁小姐搖搖頭說︰「佢只可以趁鎮魂塔有鬼入或者出嗰時先可以偷走出嚟，我都唔知幾時有機會，始終佢係被鎮魂塔收嘅惡鬼，唔係喺呢個時空。」
聽起來她也挺淒慘，要守活寡，還是應該說是守死寡？總之就是那個意思好了。
「只不過，有啲嘢我諗同你講應該有用，關於我生前遇過嘅事。」刁小姐說。
「係咪你日記所寫，猶疑緊講唔講畀我知嘅你嘅事？我洗耳恭聽。」我猜想，不過無論好說甚麼，我也會聽。
「嗯，喺我受詛咒嗰段時間嘅經歷。」刁小姐把她那一年內的事向我娓娓道來︰「紫茵係我所識最純最乖最聽話嘅人，沒有之一。由細到大都係咁得人歡心，無論作為子女、學生、同學、朋友都係完美嘅存在，亦都係咁，佢招嚟咗好多haters，全部都係女生，不論年齡，但佢都依然係用最好嘅一面去面對呢班人，期望有一日會化解到對佢嘅誤解。但事發之後，我受佢委託開始去調查，先發覺原來基本上無乜人真心鍾意佢為人，大部份人都覺得佢好假好嘔心，或者係咁所以佢先黑化啩……不過我想講嘅係，聽啲人講，喺佢生前同四個男人關係特別密切，去到會互相去屋企作客嘅程度，同我所認識嘅紫茵好唔同。當時我為咗求證就去問佢，點知佢話唔記得，之後我就明查暗訪，最後先發覺完全係生安白造，不過紫茵已經信以為真，仲將呢幾個人當係兇手，要向佢哋報復。」
「等陣先，即係根據你嘅調查，其實嗰幾個人唔係兇手？」我大驚，因為事情竟然有意外的發展。
「我唔敢講，始終我未查得到就已經到期限，又或者入面有都唔定，但未必個個都係，不過唔知幾時開始又變多咗一個出嚟，成件事變到越嚟越複雜。」刁小姐沮喪道。
「五狼我係聽盧老太講嘅，佢話係『王』同佢講，但喺鎮魂塔入面嘅鬼都係無咗生前記憶，會唔會其實成件事都係一個報仇，有心人特登畀錯誤資訊，幫佢植入假記憶？」我回想當初的情景，再大膽假設。
「唔排除有咁嘅可能，因為警察查完都話佢哋四個係無罪。」刁小姐說︰「不過關於第五隻狼，我有一個人選，就係七零一室嘅游生，我係幾年前打聽返嚟。」
「啊？」我隨便做了一個反應，證明我正在專心聆聽。
「呢個游生聽講係精神有啲問題，但紫茵無歧視佢，所以游生就當佢女神咁，之後中間唔知發生咩事，後來佢對紫茵就有好大嘅恨意。」刁小姐把所知的事盡量告訴我。
「不過我有一個地方唔明，過咗咁多年，『王』都一早已經知係邊五個人，點解仲要繼續揾人查？直接揾嗰五個人報仇咪了結哂成件事囉！最多我喺佢面前重提多一次係邊五個就可以解除詛咒，反正個委託只係要我揾到兇手。」我突然想到這個問題。
「哈哈哈哈，竟然有個咁嘅漏洞被你發現到，都話你醒，不過唔知呢。」刁小姐笑了，但我不曉得她是因為覺得我聰明還是自作聰明而笑，只是留下一句︰「時間唔早，再夜就到我有危險。」然後便匆匆結束會面離開，留下我獨自在房間。
我跟刁太道別後便回家，不過我並未停止思考剛才的對話內容，阿旻看到我便嘲諷道︰「阿哥，你做乜諗嘢？成個『諗樣』出哂嚟喎。」
「你就『諗樣』，我係諗緊啱啱同刁小姐嘅對話。」接着我便把整件事完整告訴她。
「全息影像嚟啦好明顯，喺間黑房，你以為得你同『佢』，但其實只得你一個，你被人呃咗喇。」阿旻一聽便說出了破綻︰「佢係咪半透明，唔實在？佢講嘢啲聲係咪唔似由佢口中發出咁？同埋點解要喺全黑房先？」
我思索着她的問題，又好像很有道理。
「咁我第一次上一六二二嗰時見到嘅又點解釋？」我問。
「你確定嗰時唔係全息影像？而且咁就更加可以證明佢真係全息影像，第一次明明可以日光日白都見到，點解第二次要全黑房？」阿旻一句說話便正中紅心。
有道理！現在再回想初次見面的情景，又好像不太現實，那時的人和物好像有點不實在，應該真是全息影像。那麼刁太大費周章所謂何事？剛才見面的說話是事實嗎？
我帶着這些疑問難以入睡，可想到翌日便是下學期的開學日，只好強逼自己上床，最終卻意外地很快熟睡。