實不相瞞，井型屋其實係鎮魂塔: 那個女孩
那個女孩
「大哥哥，你有無事？」阿晴看到一拐一拐的我便問。
我對她微笑，摸着她的頭說︰「大哥哥無事，唔小心扭親啫。」
阿曦見狀也走過來扶着我，我也摸了他的頭說︰「乖，不過我自己得，你哋做自己嘢啦。」
由於摔了一跤，我一股勁便往洗手間走去，洗了澡換了套新的衣服，當我步出洗手間時，阿旻已經在門前等我。
「你上次咪話樓下十四樓有條友之前肺癌死咗，之後你見到佢嘅，係咪咁嘅樣？」她遞上了手提電話，螢幕上的相片正是那個男人，我不斷點頭，頭也差點脫骹。
「佢姓徐，之前好似因為單姦殺案被捕，後來無罪釋放。」阿旻說，或許她以為我不知道吧！
「嗯，我知，呢啲我已經查到，成件案有五個兇手，而被害嗰個係一個由細到大都人見人愛嘅女仔。」我不甘示弱，把所知的事告訴她。
阿旻聽到後豎起大姆指稱讚說︰「叻喎阿哥，估唔到你都查到啲嘢。不過呢五個兇手入面，除咗十四樓嗰個徐生，仲有一個係你同我都識嘅人。」
我眉頭一皺，以表情回答了她。
阿旻看到我的反應後也不打算賣關子，直接說出答案︰「一五零八王生。佢都係其中一個疑犯，唔知同佢之前返嚟有無關係。」
「哦，王生，仲以為你講邊個，王生我知佢應該有份，我啱啱撞到王太之後就記起張相入面好熟口面嗰個就係佢。」我搶着炫耀自己比她知得更多。
阿旻聽到後立即把手放在我額前，數秒後說︰「體温正常無發燒，但點解你會亂噏？又中催眠？」
「咩呀？」我一邊撥開她的手一邊說︰「你就發燒，我不知幾健康。」
「係健康就唔會見到王太喇，你自己睇吓。」阿旻再次把她的手提電話展示給我看，入面有一段很小的篇幅提到王太，標題是「洗刷污名 老伴不能相伴」。
我仔細閱讀內文，內容主要是圍繞王先生與王太，原來十年前王太已經過身，就是在王先生被拘留的時候。
「即係話，我哋全家一齊發燒？」我腦袋空白，甚麼也想不到。
「雖然我覺得呢個世界無鬼，但以而家嘅情況嚟睇，可能我哋嗰次真係撞鬼。」一向不相信靈異之事的阿旻也解釋不了王太現身借衣架之事。
或許是耳濡目染，這次竟然是我提出假設︰「可能係佢孖生姊妹呢！佢有都唔出奇㗎，我哋點知啫。」
「都有可能，或者真係佢孖生姊妹，係囉！一定係孖生姊妹，所以我哋唔係集體撞鬼。」阿旻說着說着便笑了。
無錯，這更加證明剛才鎮魂塔的事是夢一場。
王太之謎有解答後，阿旻便繼續說︰「畀王太件事sidetrack咗㖭，我揾你係想講徐生同王生，仲有單案，因為我揾到啲傳聞。」
「咩傳聞？」我好奇的問。
「關於每年都有人因為呢單案而死嘅傳聞。」阿旻逐個字吐出來，營造出一個緊張的氣氛。
四周的空氣凝住了，就像架起了一個結界般，外間的聲音都靜下，只有我和阿旻的呼吸聲。
阿旻續說︰「早排跳樓嗰個人你記唔記得？佢叫毛全彬，佢目擊到成單案嘅發生，但因為當時太黑而又距離太遠，認人時失敗咗，最後單案就告唔入。」
「乜原來係咁……難怪佢會畀人捉走……」我憶起之前問米時的情況自言自語道。
「你口噏噏咁，噏乜？」阿旻問。
「無，我口乾所以口擘擘啫。」我撒了一個連三歲小孩都不會相信的謊，可是阿旻並沒有拆穿，只是繼續她的話題。
「只不過，」阿旻頓了一頓，話鋒一轉，以凝重的聲音說︰「成件案最關鍵嘅女受害人，喺任何報導入面都無提過，呢一點真係好奇怪。」
我馬上想起大廈互助委員會室內那本堆積了塵的文件夾，然後說︰「唔係喎，之前盧老太帶過我去大廈互助委員會室，佢嗰本文件夾入面有相關剪報，剪報入面有提過受害人姓梁，應該都有簡單介紹佢，不過啲字太濛，我睇唔清楚。」
阿旻聽到後雙眼發光，拉着我出門，要往委員會室看看那些剪報。
「冷靜啲，我哋都無鎖匙點入去？而且啲人都唔會貿貿然畀我哋兩條友入去啦，我哋都唔係委員。」我制止着她的衝動。
豈料阿旻沒有理會，一股勁便拉着我走，為了讓她徹底死心，我也只好跟她一起去。
到了地下的委員會室前，單位內燈火通明，其他的委員都在裏面，阿旻想也不想便敲了門，應門的是一個留着鬍子的中年男士︰「請問你哋想揾邊個？」
「我哋係十五樓嘅住戶，想問吓盧老太過世之後，佢嘅嘢由邊個負責？」阿旻氣定神閒的問，相反，在她身旁的我卻神經繃緊。
鬍子男先是呆了一呆，然後四周張望，結結巴巴的答︰「十五樓盧老太呀……嗯……嗯……我諗……應該……好似暫時未有。」
「咁呀……唔緊要，佢之前咪有份嘢留低嘅，我係嚟拎返嘅。」阿旻說得理所當然，沒有半點遲疑，非常有說服力。
「哦……好呀，你入嚟拎啦，不過我唔知佢放咗喺邊，你哋自己摷，佢成日都話份嘢唔可以離開呢度。」鬍子男說完便讓出門口讓我們進內，之後便打算回到座位。
我見狀立即對他大吼︰「閂門！」
鬍子男被我嚇壞了，不，應該是全場的人也被我嚇壞了，紛紛放下正在做的事，安靜的看着我，這當中包括阿旻，全場鴉雀無聲，我當下也即時意識到剛才的反應有點過猛，連忙道歉。
「哦，呵呵，唔駛道歉，我哋都慣哂。」一位架着銀色金屬眼鏡、盤了一個髻的老婦笑着對我說，其他人也都爆笑起來，我也只好跟着一起尷尬的笑，一時之間，單位內充滿歡笑聲。
看到我如此尷尬，老婦便解釋說︰「細路，你啱啱嘅反應就同盧老太一模一樣，令我哋好懷念，呵呵。」
啊！幸好這一刻的安靜是正面的，否則我也不知道要如何化解這尷尬情況。不過話雖然是這樣說，但受眾人注視的我依然感到十分尷尬。
「阿哥，快啲過嚟幫手揾。」阿旻看出來了，她再次將我從水深火熱的尷尬中拯救出來。
我立即跑去幫忙，走到放文件夾的地方，幸好他們把文件夾放回原處，省卻了尋找的功夫。
「揾到，我哋走。」阿旻拿着文件夾大步離開。
我一手抓住她，小聲說︰「呢本嘢唔可以離開呢度，都唔可以影相，只可以喺度睇。」
「如果唔係呢？」阿旻問。
「如果唔係……如果唔係……」我答不出任何答案，因為盧老太壓根沒說會有甚麼後果，只是說「王」在尋找它。
「咁即係無事喇？阿哥，咪生人唔生膽，我哋快啲走好過。」阿旻說完，再跟其他委員道謝後便離開，我也尾隨她一起走了。
一開門，迎面吹來一陣寒風，把剛才的擔憂都吹散了，畢竟已經十二月，天氣也終於轉冷了。
我們回家後，便埋首於文件夾不同的剪報中，盼望從中可以更了解大廈的歷史，不過花最多時間的始終是五狼姦殺案的剪報。
「剪報入面好清楚寫咗個女仔姓梁，而且啲background都寫得算清楚，點解上網嗰啲會cut哂？」阿旻百思不得其解，不斷核對剪報和網上報紙的差異。
「都係人為㗎喇，只係唔知佢點解要咁做啫。」我說了一句廢話。
「最衰無相，唔知個女仔咩樣……」阿旻努力找不同不果，轉而尋找另外的線索。
「剪報同網上都無，不過聽王太講，佢係大廈嘅開心果，人見人愛，肯定好多人都對佢有印象，一定有相。同埋篇報導話佢阿爸一直揾兇手，所以揾到佢阿爸都會揾到相。」我嚴肅的說。
「王太？你幾時見過佢同佢傾過偈？」阿旻對於我說的話異常敏感，每每找到我的錯處。
我語塞了，因為那次「見面」只在我的夢境，不過為了不失身為哥哥的霸氣，我理直氣壯的說︰「我啱啱返嚟之前撞到佢，問起佢佢講嘅。」
「大哥哥、姐姐，」此時阿曦和阿晴來到我們身旁，看着文件夾然後說︰「許婆婆話佢有同個女仔影過相。」
坦白說，他倆的出現令我有種如釋重負的感覺，因為若阿旻再追問下去，恐怕我便會穿崩。不過對於他們口中的「許婆婆」，我一時之間想不到是誰，但還是問了句︰「許婆婆？咁你哋可唔可以幫我借張相？」
他倆乖乖的點了頭，然後離開了房間，此時阿旻說︰「佢哋口中嘅許婆婆係咪嗰個許婆婆？」
此刻的我才如夢初醒，不過許婆婆已經過身多時，那護士假扮的又怎會知道這些瑣碎事？大概是他們胡言亂語罷了。
如是者，對於阿曦和阿晴的童言，我和阿旻均採取只聽不信的策略，當他們只是悶得發慌，或者只是想和我們玩而說的戲言，我們的大方向依然是問街坊拿相片，不過應該問哪家哪戶才對？
「隔籬井好似都有幾個老人家，試吓問佢哋，佢哋可能喺度住得耐啲，會知道啲嘢。」阿旻想了一會便說，這想法我也同意。
我們坐言起行，立即出發往另一面井，其實我特別不喜歡另一面井，因為它永遠都比較陰森恐怖，令我混身不舒服。
「唉，可以嘅話真係唔想過嚟。」我嘟着嘴說，十足一個耍脾氣的小孩。
「點解？」阿旻邊找目標單位邊回答。
我解釋說︰「因為呢面永遠都暗啲、涼啲、恐怖啲，明明同一座樓，兩面井分別咁大，有咩鬼都一定喺呢面產生。」
聽到我的答案，阿旻回頭白了我一眼，沒好氣的說︰「白痴呀你？我有時真係唔明點解你成績會咁好，但平時就成個低B仔咁。」
「咩呀？你先係白痴同低B，咁都feel唔到。」我也不客氣的反擊。
「其實阿哥，你喺度住咗都差唔多半年，究竟有無睇清楚兩面井㗎？我哋嗰面井得二十層高，呢面井有二十四層高，咁暗啲、涼啲都好合理啫，你話你仲唔係白痴同低B？」我聽得出阿旻已經快不知怎樣跟我溝通了。
「吓？係咩？」我此刻才驚覺原來兩面井的樓層有不同，但作為哥哥，總不能認輸，於是繼續嘴硬硬扛道︰「我梗係知，點會唔知？但呢面的確係恐怖啲，佢係幾多層樓都改變唔到呢個事實。」
阿旻雙眼反到了宇宙，繼續沒好氣道︰「同你講多都嘥氣，快快脆脆揾個目標問完就走啦！」
我們繞了一圈，最後決定還是到零四室找張師奶，畢竟是媽媽的熟人，開口應該會容易一點。
「咦？你哋係？」聽到敲門聲的張師奶前來應門。
「張師奶，你好，我哋係隔籬井馬太嘅仔女，我哋有啲嘢想請教吓你。」阿旻禮貌的說。
「哦……有咩幫到你哋？」張師奶和藹的答。
「想問你有無聽過十年前嗰單五狼姦殺案？」阿旻單刀直入。
「啊！有呀！不過應該係四狼唔係五狼，我諗你哋係講呢單。」張師奶一聽便知道，證明這件事在當時真的很轟動，然後她語調聲線一轉，非常警戒的問︰「你哋問嚟做咩？」
「哦，無，我哋諗住調……」阿旻突然大力跺在我的腳上，疼痛使我說不到下半段話。
阿旻趁機說︰「其實我哋有份專題研習功課要做，題目係我哋嘅屋企，我哋睇咗好多資料、新聞，覺得呢單案夠哂爆而且又唔係棟棟大廈都有，於是決定用佢嚟做題目，可惜揾得到嘅相關報導少之又少，所以就想問吓班街坊攞啲第一手資訊咁囉。」
「原來係咁，」聽得出張師奶已經放下了一半戒心，但她還是嘗試誘導我們轉換題目︰「其實我哋呢度都仲有嘢係好有特色㗎，好似話每年農曆七月十四嘅盂蘭勝會神功戲啦，又或者每年籌款我哋都係屋邨組頭三甲啦，呢啲都唔係棟棟大廈有，係我哋嘅特色。」
阿旻笑着說︰「呢啲都係嘅，但唔夠爆無咩吸引力，我哋想做單最爆嘅，一次過打大佬拎個好成績。」
雖然是笑着說，但其實她的笑容裏藏着一絲絲的殺氣，這正是笑裏藏刀的具現化，而從張師奶表情的變化亦能看出她感受得到，不再試圖誘導我們，乖乖屈服。
「咁你哋想問啲咩？」張師奶平靜的問。
「四狼係邊四個？點解有啲話係五狼？個受害人又係邊個？」阿旻簡單直接，不再轉彎抹角。
「其實單案到最後都無捉到真正兇手，四狼都只係謠傳，但當時傳得最犀利嘅係一五零八王生、一四二四徐生、二四一零萬生同四二二廖生，可惜嘅係徐生同萬生都已經過咗身，王生又搬走咗，廖生都變到精神失常，單案亦都無咗後續報導，得返四二一梁生堅持揾真兇。」張師奶把所知都告訴我們︰「至於五狼就真係未聽過，亦都無報導提過，我諗係啲人同其他case混淆咗，呢啲好似叫孟德拉效應？而受害人係住四二一嘅，係由細到大都人見人愛嘅女仔。」
「你會唔會有佢嘅相？」阿旻問。
張師奶想了一會，然後說︰「有，好似有一張，不過要摷，等等我。」
接着便是長達十分鐘的等待，幸好結果還是美好的。
「呢張，不過嗰時佢仲好細，應該六歲左右，佢同我仔差唔多年紀，成日喺公園一齊玩。」張師奶憶述。
我們拿過照片仔細觀看，但由於是多年前的菲林照，而且沒有特別保存，照片已經開始失色泛黃，最關鍵的小女孩樣子更加因為照片沒有放進相簿導致黏在一起，在分開的過程中部份黏在另一張照片上而模糊不清了。
「唔該哂張師奶，我哋可唔可以影低佢？」阿旻問，張師奶點頭示意，我們在不同角度拍了數張照片便還給張師奶，然後與她道別。
接着我們有默契的同時提議到四二一室找梁先生，可是他剛好不在家，所以我們便到旁邊的四二二室找廖先生問個明白。
廖先生因為精神失常，妻子已經離開了他，而且他膝下無子女，所以現在是獨居的。
「廖生，我哋係義工，嚟家訪㗎。」阿旻對着緊閉的木門邊拍邊大喊，不過沒有人應門。
「廖生，你喺唔喺屋企？」我也嘗試叫喊，但都是沒有回應。
正當我們打算離開之際，單位內傳來了拖動椅子的聲音，東西擲在牆上的聲音，還有打架纏鬥的聲音。
「你聽唔聽到？」我問阿旻，阿旻也點點頭，於是我們繼續拍門。
「廖生，我哋知你喺入面，你開門畀我哋，我哋係嚟幫你㗎。」阿旻繼續游說，但單位又再次回歸平靜，甚麼聲音也沒有。
「點算？」我以眼神問阿旻。
「報警！」阿旻以口型回答我。
「吓？會畀人告浪費警力喎！」我打破沉默說出來。
「我哋話聽到入面有怪聲，好似有賊咪得。」阿旻把手指放在嘴前示意我不要大驚小怪。
於是我拿出手提電話按九九九，一個即使沒有電話卡也可以接通的電話，可是現在卻偏偏接不通。
「九九九唔通喎……」我拿着手提電話難以置信的對阿旻說，她也拿出自己的手提電話試一次，也接不通。
「好唔尋常……」我惶恐道︰「呢度一定有啲嘢阻住我哋，唔想我哋查落去。」
阿旻白了我一眼再說︰「唔好又講埋啲咩鬼神論，呢個世界無鬼，只係咁啱呢度有干擾啫。」
「咁我哋走去第二度試吓再打。」我提議，可是無論我們走到哪，九九九的電話依然是接不通，甚至連網上報案的網頁也變成「404not found」，種種跡象顯示，有一股神秘力量正阻撓我們查明真相。
「不如算喇，我哋放棄報警呢個念頭，喺其他街坊口中攞多啲料好過，四樓作為受害人住嘅嗰層，一定有好多人有印象，可以畀到啲唔同答案我哋。」我再提議，阿旻也採納了。
如是者，我們挨家挨戶去問，但都得不到滿意答案。
「點解呢層啲人一係就唔喺度，一係就新搬嚟，完全無一個人知道受害人嘅嘢，有無咁啱呀？」我忍不住大發牢騷。
「呢層無咪問埋三樓同五樓，我總唔信全部都係咁。」阿旻不服輸的說。
「其實會唔會係佢哋一齊夾埋咁講？」我提出假設。
「都可能係，但我哋都無佢哋符㗎，唯有問埋其他樓層㗎啫。」阿旻雖然有點不服氣，但也束手無策。
此時，四二二室的木門緩緩打開，一個瘦骨嶙峋、一頭白髮和白鬍子、身有陣陣異味的男子在鐵閘前向我們招手，目測他應該七、八十歲。
我們立即跑到他跟前，他卻只說了三個字︰「我無癲。」然後便關上門，我們還未來得及反應，便再一次被拒於門外。
我們縱然無奈，但也無法做些甚麼，不過皇天不負有心人，我們還在消化他那句話的時候，他隔着門再對我們說︰「個女仔，無死到，唔係我，我幫佢。」之後便回歸平靜，只餘下我倆滿頭問號的站在門前，任我們如何敲門，也再無回應。
那女孩真的沒死嗎？但報紙如何失實，總不會把生和死也胡亂報導吧？而且由張師奶和盧老太的反應看來，絕對是死了。那他為甚麼說沒有死呢？
我們帶着滿肚子的疑問回家，還未想得明白，阿曦和阿晴便手持照片很熱烈的歡迎我們。
「大哥哥、姐姐，乜你哋咁遲㗎。」阿曦有點不滿的說。
「許婆婆揾到張相畀我哋喇，你哋睇吓。」阿晴把照片遞給我們。
我接過照片一看，相中人是七、八歲左右，一個非常標緻的女孩子，我總覺得有點眼熟，可是始終說不出是誰，不過現在總算有點眉目，今天的努力可沒有白費。
只是這張照片，為甚麼由護士假扮的許婆婆能拿得出來？