時空判官：夢別離 (粵) - 一個夢令我擁有創/滅世能力: 四 (下)

「「我有用你唔知，我嘅力量冇辛咁好玩，同工作相關嘅我都可以變出嚟，例如手提電話、棍、衫或溜冰鞋。」亞超彈一彈手指，一台手提電話便出現在她手裡，開啟手機螢幕，螢幕背景是亞超的自拍照

「厲害！厲害！或者你應該變錢去買一個餐吃！」月琦大力拍打亞超的手背，不讓她再拿薯條

「我唔知你地嘅貨幣點換算。」亞超把手收起

「或許你部手提電話可以幫你換一個薯條餐。」月琦說完，忽然一名女中學生走過來她們桌旁去

「請……請問你呢部手機係……係唔係喺呢度拾到？」女中學生有點膽怯的問：「佢……同我唔見嗰部好似。」





月琦二人目光轉到剛才亞超變出來的手機身上，手機現在變成了粉紅色手機，還掛有一個可愛掛飾。亞超開啟手機畫面，螢幕背景正是女中學生與她朋友的相片。

「係，我本想搵你，但唔知你去咗邊。」亞超把手機交給女中學生

「Thank you！我……我冇其他嘢多謝你，呢個外賣本身買俾屋企人，唔嫌棄嘅話，請收下。」女中學生放下外賣，拿走手機便離開了

「你最好小心講嘢。」亞超高興的打開外賣，果然是薯條餐

「好，而家不如講下你地嘅考驗係咩？」





「我係收集一套遊戲卡，一共十六張，分別係『信任』、『自主』、『進取』、『勤勉』、『身分』、『親密』、『創建』同『圓滿』。儲卡期間，我被迫進入八個唔同嘅遊戲場景完成遊戲。當時嚟我世界嘅兩個人，一個勁樂觀，一個勁悲觀。」辛首先回答，然後手伸出籠外示意亞超給薯條他。突然，月琦頭刺痛起來，辛伸出籠外的手被拉回去，他生氣問：「使唔使咁呀？」

「我唔係特登！咁亞超呢？」月琦分享數條薯條予辛陪罪

「我被迫接咗五份job，收咗五份文件。第一份要我短時間內搵出炸彈位置，第二份要我同一班人完成任務，第三份要我保護重要人物，第四份要我帶寶物逃出密室，最後一份係要我同唔同人做訪問。幫我嘅係一個七歲嘅小朋友，同一個身體健壯嘅老人家。」亞超開始享用她的午餐

「你地都辛苦，但都過咗，而家到我受喇！」

「未過曬！呢個考驗後，你嘅世界唔會自我毀滅，你都可以控制能力，但係一段時間後你要好似我地一樣到其他時空旅行，之後先算完全完成考驗。」辛坐在木糠抱著薯條





「吓？仲未完？」月琦頓時感到絕望

「雖然情況沒咁失控，但依然有事要做！」亞超喝著汽水道