Before18: 第一章 插班生？

「喂！未見過你嘅？你新轉入嚟㗎？」坐我前面嗰個突然轉過嚟問我。如果你要我搵一個人物嚟形容佢個樣,我一定會話係蠟筆小新,因為佢條眉真係好粗,同時隻眼又好細。我窒咗一窒,跟住答佢：「唔係呀純粹係我個人比較內向同低調,所以冇咩人識我係好正常。」佢望咗我一陣,跟住話：「冇理由呀,正常你咁高又咁靚仔,我應該唔會唔識嘅。」

真係唔撚講笑,我低form嗰陣嘅髮型係剷曬隔離同埋後面嘅頭髮淨係留前面少少陰,仲要帶住個黑色粗框眼鏡,咁平時就戇鳩鳩咁擘大個口得個窿。係去到疫情開始喺屋企上網課啲頭髮開始留返長,本身我個底又唔差,一對大雙眼皮再加高鼻樑,我又唔戴眼鏡轉戴con,呢度少少嘅轉變根本令我脫胎換骨,所以佢哋覺得冇見過我係好正常嘅事。

「係呢,我叫文傲揚,你叫咩名？」

「我叫周子樂,你叫我阿Lok就得喇。大家以後呢就叫做隔離鄰舍,有嘢要幫手就開聲,始終我上年冧咗,都熟曬中四啲嘢。」

「咁就勞煩Lok哥錫住小弟,有咩嘢得罪嘅地方唔好見怪,有嘢都請即管吩咐細佬。」我一路喺度賣笑個心一路佩服自己：咁撚樣嘅嘢都講得出,都唔知係咪近排啲港產片睇得太多,講啲嘢真係好似讀對白咁樣。





佢笑笑口拍住膊頭同我講：「你個人都幾得意㗎喎,幾好,我like你,以後喺呢間學校有人搞你你就躂我個朵。」
我又窒咗一窒,心諗：呢條友係鳩噏定係真係有料呢？就係中四嘅第一日開始,我先發現到呢間學校嘅另一面。

一路同佢吹住水,啲同學都陸陸續續到齊,我望一望佢哋個樣(主要係啲女嘅樣啦),仆街！唔係話豬扒嘅,只能夠話係不堪入目。
喺嗰一刻我已經心灰意冷,忽然覺得我嘅校園生活變毫無意義。
阿Lok見我咁嘅死樣,就問我：「屌你使唔使望完一圈就死死氣咁樣呀,係冇靚女㗎喇,靚嗰啲喺曬精英班呀嘛！」由於我真係毒咗好耐,同埋好大段時間都係網課,所以唔係好清楚學校有啲咩人。「得啦小息帶你去［點兵］,睇下有邊個啱你咪介紹畀你囉。」

咁阿Lok又有佢本事嘅,基本上全校可能除咗Form one Form 2
之外比較出名嘅人佢都識曬,社交能力一定係一流,呢一方面嗰陣時我呢個毒撚真係有排學。





「安靜啦同學！」門口一個好似矮冬瓜嘅miss同一個好似巫婆嘅miss行咗入嚟