《我愛上咗同我一夜情嘅女人》: 第二章

同佢分開後，我又搭巴士返番旺角搵林惠。

一星期循環咗五次嘅門鈴聲幾乎成為魔咒，林惠不情不願咁開咗門，靠喺門框邊冇好氣地抱怨：「周生，你而家係咪將呢度當做你第二個屋企啫？」

我自知理虧，隨即陪笑道：「惠姐呢度能量好嘛！風水寶地，係人都鍾意去啦！」

佢無奈咁翻咗個白眼：「入嚟啦。以前你同昕然一齊嗰陣都未有咁癡線，頂多搵我占吓卜咋。個十八歲𡃁妹到底灌咗乜嘢迷魂湯藥俾你？」





「昕然？」聽到呢個名，我有啲走神。

原來唔經唔覺，我已經好耐冇諗起方昕然。

唔知係咪喺經歷重大創傷之後大腦產生咗自我防衛機制，選擇性咁遺忘不堪回想嘅記憶呢？

「你個樣好似話緊俾我知你愛𡃁妹已經勝過昕然喎。」

林惠講嘢素來一語中的，我都明顯感覺得出自己重視Kama多過以往任何異性。





我坦然承認：「大概真係『得不到的永遠在騷動』吧，愛情就係喺將愛未愛嗰陣先最有吸引力。」

Kama話齋，處喺若即若離嘅階段會令人有無限趨向結果嘅感覺，即便係錯覺，即便係幻覺都無所謂。反正人對愛情嘅追求，向來都只係一種抽象嘅感覺，而冇具體嘅標準。

就好似方昕然本身都唔係我鍾意嘅嗰種「乖乖女」，但我地依然展開過一段為期四年嘅戀愛。

中學時期，我算得上品學兼優、名列前茅嘅好學生；而方昕然喺課堂上從來唔係訓覺就係偷食嘢。班主任喺開學前就早對佢有所耳聞，希望我以身作則做佢嘅榜樣再加「看」實佢，就安排佢坐左喺我隔離。

「近朱者赤，近墨者黑」固然有理；可惜佢冇赤到，我反而黑咗。





有時，佢食唔曬個麵包，會搣一半俾我，搞到我成為咗共犯。

有時，佢冇做到份功課，又唔想罰留堂，就會「參考」我嗰份。

有時，隨堂小測佢唔識，就會暗示我將張紙推埋過去佢嗰邊。

有時，佢僕喺檯上訓覺，我會擔心佢凍親，披自己件外套俾佢。

有時，我哋上完體育堂，佢直接攞我支水飲，我一啲都唔介意。

有時，察覺到佢聽唔明，落堂後我就會好有耐心地教多佢幾次。

雖然方昕然絕對稱不上乖學生，唔會係我鍾意嘅類型，但試問邊有男人會拒絕到明眸皓齒，短髮及肩，性格主動又帶點俏皮，略為強勢卻不失可愛嘅女仔同自己朝夕相處？

慢慢地，我哋之間日久生情，只係礙於唔敢捅破層窗戶紙所以心照不宣咁冇踏出嗰步。





直到嗰年學校旅行日，喺大家都忙住起爐同洗食材嘅時候，方昕然無端端拉住我跑咗去沙灘嗰頭。

銀礦灣相對偏僻，沙灘上幾乎見唔到人影，我跟住佢一路行到最入先停低。

我冇好氣咁問：「搞咩呀？你咪偷懶唔幫手又拉埋我落水啦。」

佢企係我面前，抬頭再趷高腳，面頰染上咗少少紅暈，喺陽光照耀下顯得白裡透紅，似足鮮嫩多汁嘅水蜜桃

忽然間，佢湊近我耳邊輕聲講：「周孟霖，做我條仔得唔得？」