禁結之淚-BDSM真人真事改編: 7.第一次犯錯！
我望一望個鐘，時間已經差唔多，我要出門口返公司，再唔出門口又會遲到。
「我宜家出門口啦，你做曬教案未啊？」我send咗WhatsApp畀我女朋友。
小蕎冇即刻覆我，應該仲忙緊。
入夜嘅西洋菜街人潮擠得水洩不通，自己一個喺街上遊走硬係覺得格格不入，我隨便揀咗一間茶餐廳就入去坐低。
我依一刻嘅心情仲停留喺啱啱嘅調教之中。
嗌完晚餐之後，覺得有啲無聊，就打開Telegram問狗狗：「你食咗飯未呀？」
隔咗一陣，佢回覆：「我煮緊飯啊。」
「我？」
「對唔住主人。」佢立即回覆。
「上次已經畀咗次機會你，睇嚟今次要罰過你先記得。」我將手機放喺枱底下回覆，茶餐廳座無虛席，下意識驚人哋會睇到我哋嘅奇怪對話。
「平時屋企都係你負責煮飯？」
「係呀主人。」佢有補充：「阿媽係無飯主婦。」
突然手機一震，原來係小蕎send WhatsApp畀我：「我到旺角啦，你喺邊呀？」
「我喺公司附近。」我回覆。
「我未食嘢啊，陪我食呀。」
「好啊，我喺XX冰室坐低咗啦，你過嚟啦。」佢成日都咁突然。
「你偷偷地食唔等我。」佢扮嬲咁講。
「鬼叫你咁遲先覆我。」
我一邊等小蕎，一邊繼續同狗狗對話。就算啲嘢食嚟到我依家視若無睹，一嚟想等埋小蕎先食，二嚟我而家嘅心情就好似一個啱啱收到新玩具嘅小孩一樣，顧住玩新玩具，又點會有心情食飯。
「喂～」我抬頭見到小蕎企喺我前面，將手袋放喺對面張櫈度，佢着住一如既往嘅白色連身長裙，帶出佢成熟嘅風格。
我即刻熄咗個電話mon，「嗌嘢食先啦。」
「又唔嚟地鐵站接我。」佢嘟起個嘴。
「我叫咗嘢食嘛。」我搣咗一下佢塊臉。
「喂！痛啊。」她有啲嬲咁講：「都話唔好搣。」
「呵返呵返。」我笑住摸摸佢塊臉。
因為時間關迫要趕返公司，我哋就隨意嗌咗小食，兩個人share當晚餐，唔知點解小蕎永遠唔鍾意我喺公開場合對她做親暱嘅行為，佢雖然冇其他人對香港女性標籤嘅「港女性格」，佢成熟大方，但可能因為過於理性，我同小蕎好少親熱，多數係我做主動，佢從來冇試過主動抱我錫我。真係難以想像眼前嘅女朋友變成女M，對自己百般依順、小鳥依人嘅樣子。我又開始回想起狗狗嘅乖巧。
「喂，做咩發呆啊？」
「吓。」我回一回神，見到小蕎睥住我。
「冇呀，我諗緊野姐。」我笑。
我同小蕎一齊發展生意已經差唔多一年半，一開頭佢覺得處理公司事務好煩，認為工作複雜。不過佢為咗我付出咗好多，幫我打理大小事務，由開始嘅唔願意，到宜家嘅積極參與。雖然講唔上咩賺大錢，但總算可以支付生活日常開支，好大嘅功勞要歸功於小蕎。尤其宜家做咗學生會主席之後，大部份時間用嚟做學生會公務，好多時要小蕎幫手。即使佢讀書嘅課程繁複，依然會抽時間返嚟公司，我內心其實好感激。
送完小蕎返屋企之後，我搭上往尖沙咀嘅巴士返屋企。我鍾意搭車，坐喺巴士上望住路上嘅景色，聽住音樂，等自己沉醉於自己嘅小宇宙入面，都係一種獨處嘅享受。
經過頭先個網調，我嘅生活好似同之前唔同咗，實際上有啲咩唔同我又講唔出。可能係個感覺掛。話就話我已經研究咗BDSM好耐，真正實踐係幾個鐘頭之前嘅事。加上我有小喬呢個女朋友，內心明白情侶同主奴關係係有分別，不過感覺都好似出軌。
我真係一個仆街。我竟然對依種雙重關係一啲內疚都冇，有嘅只係刺激感。
唔知係咪淨係網調覺得冇乜嘢呢？如果有朝一日畀我實踐到實調，又會係咩心情呀？
一路望住街上嘅風景，唔同問題係我腦袋之中不斷反覆出現。
返到屋企，我登入Telegram，見到狗狗上一個訊息已經係7:36pm ，係三個鐘之前嘅事，當然我同小蕎見面時會熄咗Telegram。呢個始終唔係可以見光嘅嘢。
「我返嚟啦，啱啱放工。」
「狗狗啱啱溫緊書。」
「溫成點啊？」
「OK啦，仲有好多未溫，怕溫唔切。」
「唔緊要，仲有半年時間。」
「唔得㗎，冇時間啦。」
「其實你唔好畀咁大壓力自己先。」
「我一定要入到U架。」
「其實宜家唔入U都大把出路。」我講述咗一啲自己嘅經歷。我唔明白點解而家嘅社會價值觀塑造到一定要讀大學先有前途。我識啲成功人士只係中學畢業，都可以打拼出自己嘅天地。
「我屋企人一定要我入U，入唔到就要出嚟做嘢。」唉！又係家庭問題，呢種扭曲嘅觀念簡直係荼毒下一代。
我真係非常反對啲人話一定要讀完大學先可以有好人生，就好似人生有一個既定嘅規則咁，可能我係S，係男主，更加介意畀人點嚟點去，又要框死自己。我細細個就唔畀屋企框死，為咗自己想去闖可以喺學校示威，可以同屋企人反面一年，社會唔可以框死我。就算全世界話嗰樣嘢係啱又點？一定係啱嘅咩？我就鍾意行自己條路，我係極反對「讀大學先有好人生」，只要聽到有人咁講，我就會好反感。
「你其實真正想做嘅係咩？」
「物理治療師。」佢講咗一個大眾嘅理想。
「咁唔一定要讀U啦，asso都有㗎。」
「唔得㗎，我阿爸唔會畀錢我讀asso。」
傳說中嘅怪獸家長……
有好多嘅女M有家庭困擾，可能因為生於破碎家庭，可能因為受家人壓迫，所以我都有心理準備，佢會遇上普遍中學生嘅難題，唯有好好開解佢。如果依句說話係出自我父母口中，下場就只有鬧交收場。幸運地我父母喺學業上都尊重我自己嘅意願。
身為主人嘅責任更加要好好開導奴嘅價值觀，帶領對方了解自己，我明白到生活中好多嘢可以自己話事，甚至解決原生家庭帶來嘅傷害。簡單來講，就係一個心理輔導員一樣嘅角色，除咗平時接收情緒，解決心事之外，成長之中出現嘅後遺症都係主人嘅需要解決嘅事項。做唔到，唔係一個好嘅主人。所以基本上所有奴都希望自己主人比自己更加成熟、有人生經歷，先可以喺重要關頭帶領自己
「你有冇諗過半工讀啊？」
「到時我阿爸一定會叫我養家。」
我到底喺度睇緊啲咩70年代設定。
「一定要？」
「嗯。」
我突然醒覺狗狗對自己嘅稱呼改變咗，不過宜家傾心事，我決定先放過佢，費事對佢咁殘忍，宜家最重要係開解佢。我心諗，佢如果無法解開家庭嘅枷鎖，一世只會係咁，「由你唔聽屋企說話嘅時候開始，你嘅人生先會真正開心。」
我身為一個主人，除咗調教之外，仲要好好陪伴同引導奴隸成長，雖然我同狗狗只不過係網調，都要盡一下責任，冇可能見到有問題，見住狗狗有煩惱唔理。隔住Mon依然要照講。
佢冇回應，只係已讀我，我繼續講：「我之前屋企係咁迫我，結果同屋企人反咗面，佢哋最後畀我去追夢。」
「狗狗冇主人咁勇敢。」
我正想講我唔勇敢，又覺得呢個講法唔太妥當，「請不要在捆綁別人之前，就被世界所束縛了。」呢個係我入圈之後嘅一個格言。「唔使驚啦，我會支持你嘅。」我安慰佢。
真係好矛盾，明明實際係幫唔到狗狗乜咁，又要係到大條道理…唔通教狗狗同屋企人反面咩？我可以咁去決定我嘅人生，唔代表狗狗行同一條路會開心。唯有講得幾多得幾多…
唯有慢慢嚟啦⋯⋯
「多謝主人。」
「摸頭。」
佢回覆一個「錫錫」嘅表情符號。
「你呀，犯咗規仲未罰你，頭先嗰啲就算啦。」
「主人想點罰…」
我諗咗一諗，忽然諗到一個邪惡主意，就回覆狗狗：「遲啲話畀你知。」，加咗個「恥笑」嘅表情符號。
令奴對調教內容有所期待係調教之一。