神奇家族 -- 攪笑家庭小品小說

『青年人，夢與想飛翔』呢個節目決定要腰斬喇！死肥鬼監製Anthony一路吃著他的蛋牛麵早餐，滿口湯汁和蛋汁口沫橫飛地說。湯汁還噴到阿聲的恤衫上。阿聲真想一拳打向他的臭臉。三個月前就是這個死肥鬼一力承擔說會做好這個節目，說這個真人show節目多麼有意義，幫一班失業多時的年青人去找工作，阿聲信了他的鬼話，才會跟他幾個同事嘔心瀝血地去籌備和策劃這個節目，花了多少個通宵孤獨夜晚去搜集資料，公開招慕參予者，找廣告商和贊助商，終於整到十劃見到有兩三劃既時候，Anthony突然說上面要腰斬這個節目，大哥，這不是腰斬啊！這應該叫做胎死腹中。或者人工流產呀！天呀！多麼無陰功。阿聲好像感到自己的兒子被人強迫人工流產一樣，心裡說不出多麼的痛和難受。『前世做錯事，今世做電視！』這是他的死檔同事Roy經常掛在口邊的一句口頭禪，『咁我前世一定係一個連環殺手，所以我今世先會咁折墮！』阿聲自嘲，每逢遭遇唔開心既事，兩條友就會走去洒吧飲到不醒人事，試過一次兩條友實在飲得太醉，連企都企唔穩，結果最後要打九九九叫白車去醫院。「咁依家即係點？下個月搵咩節目出街先？」聲大叫。 「係囉！咁拍咩？拍手指呀？」Roy補刀。「咁唔使拍啦！影住個color bar出街咩得囉！」聲回應。這是一個行內的笑話，想當年某大台收視如日方中既時候，曾經因為技術故障，只係得個color bar出現在電視機前半小時，但竟然同時段收視都高過友台，可見當年的慣性收視有幾咁恐怖。後來行內人講笑咁話，拍咩鬼丫，人地影住個color bar都贏你九條街。Anthony飲完最後一啖湯，然後施施然咁講：「我既格言係咩？『節目不可以停 – The Show Must Go On」放心喎，我地偉大既高層，已經幫我地度左一個天下無敵，收視爆燈既節目，節目名都有埋，就係...就 係......咩呢？」Anthony打開他的Iphone翻看記錄，然後冷神秘咁話：「嘿嘿嘿...就係香港真實靈異檔案喇！點呀？係咪好爆呢？一定掂呀，除非唔掂！如果唔掂，一定係你o地既問題。」「香港真實靈異檔案？即係拍d咩呀？電視劇呀？」聲不禁疑惑一問。「No，No，No，依然係真人show，不過唔係拍人，係拍鬼！」Anthony開始吃他的菠蘿油，呢條友咁食法，遲早爆血管死，聲心裡正咀咒。「即係真鬼show啦！鬼喎！唔係鬼妹喎！去邊度搵咁多鬼拍？」Roy咆哮地說。Anthony用他那隻沾滿牛油的手打開電郵內的一個檔案，然後按enter鍵。「o岩o岩send左比你地喇！番去check下自己個mail box啦！好，無問題既話，散會！跟住好去開工喇！下星期一我要見到頭五集個故事大綱放係我台面，understand？」講完，Anthony已經自顧自地走去廁所。「唉！又中伏喇！今次仲唔舐曬嘢！」阿Roy無奈苦笑。「你話叫我拍鬼妹我就識啫，你叫我拍鬼，今次真係撞鬼喇！」「真實靈異檔案？ 點解個名好似咁熟嘅？我唔知好似喺邊度聽過！」阿聲一臉疑感。「係...,！咁啱喇，你熟，咁個故事大綱，你度掂佢啦！」Roy乘機卸膊。「你係咪咁呀，一世人兩兄弟你同我講啲咁嘅嘢！聽講你先係創作主任喎！最多一齊度啦」「度乜鬼丫度，度o下聽晚六合彩開咩number仲好啦！中o左o個幾千萬，我o地兩兄弟可以長醉諾士佛台啦！」兩人已經各自回到自己的座位。