【真人真事】冤冤相愛何時曉？: 後記.

隨文附上後記。

早晨咁多位，我諗大家一定無諗過個故會完得咁突然，只不過係我覺得，寫咗大半年咁耐，都差唔多係時候完結，當然要寫落去中間都實有嘢寫，不過寫出嚟都唔好睇啦係咪先。

最後完嘅呢個位呢，真係佢親口講嘅，所以我諗咁樣完都算係個好結尾。

畢竟，再寫落去就講分手，咁我又寫得唔開心你又睇得唔開心就唔好啦，既然現實我同佢行唔到落去，至少係個故到可以有個Happy ending啦。

好喇，入真．後記。





如果話呢個世界影響得我最多嘅人，一定係周楉童，因為我成個青春都係屬於佢。

我由中一開始識佢，去到中三慢慢同佢熟，開始鍾意佢，然後去到最後卒之可以拍到拖。

佢改變咗我好多好多嘢，甚至我之所以開始寫故都係因為佢，到後嚟都係佢教識我點去愛一個人，點樣做個成熟嘅人，點樣為其他人付出，亦都係佢先令我意識到自己嘅缺點。

同佢一齊，硬係一種好特別嘅感覺，我諗呢樣嘢就係叫chemistry，一同佢一齊就自自然然好多嘢講，好舒服好放鬆，係佢面前我總係可以做個細路仔，可以嗲下佢扮下可愛。

而家諗返起，呢件事都幾勵志，講真我自己外在內在都無乜可取之處，高唔係高大隻唔係大隻有型唔係有型可愛唔係可愛靚仔唔係，Oh Sorry我真係幾靚仔，講笑其實我都唔係靚仔，跟住個人又長期Hea下Hea下把口唔識收唔識氹女仔無內涵無專長，死剩個腦識得諗下嘢咁樣。所以咁撚樣都成功追到佢我覺得係件幾神奇嘅事嚟。





好多人話分手可惜，咁係幾可惜嘅咁多年感情，但係有時候唔適合就係唔適合，所以我其實好多謝佢主動離開呢段關係，如果唔係以我性格我應該點都唔會做主動。

我諗，如果我地停留係朋友關係嘅話，應該係可以做到好好，好好嘅朋友，不過世事無如果，唔拍都唔知原來唔適合。

Anyway，無論點都好，我都係好感激佢嘅，無佢就無而家嘅我。

講完佢就係時候講下個故。

其實我係有少少對唔住個故嘅，因為我寫到去中途，Like五六月嘅時候我已經無乜心機再繼續寫落去，一嚟個時又忙住拍拖，二嚟就係我自己都覺得我嘅經歷好拖，係咁拍拖分手拍拖分手，跟住又過多兩個月手都分埋就更加無心機寫。





但係，同時間我都好慶幸自己有寫到呢個故，因為佢完完全全咁紀錄咗我嘅青春，我嘅中學時代，我好多嘅回憶，都係呢個故先令我係連登見返好多熟悉嘅ID名。

所以好多謝大家，個故咁悶，我出得咁慢得願意繼續睇落去，唔係你地定期催下我，我應該2025都未寫完。

完埋呢個故，就係時候真真正正咁同我呢段感情呢段過去講聲再見。

有緣嘅，咪下個故見囉！

利申有啲想寫隻關於被困迪士尼嘅恐怖故，又或者係做返老本行講中學校園愛情，又或者係寫隻末日故，唉屌再講啦下。


得閒咪fol下我ig囉：maanyin05