【真人真事】冤冤相愛何時曉？: 67.

到了約定時間，我如常的在她家樓下等她，她如常的遲到了十分鐘，我如常的牽著她的手跟她走到海旁。

「我地聽日去邊度玩好呀？」周楉童在走去海旁的路途上問。

「聽日呀？我地一陣傾完個問題再諗下啦好唔好？」

「坐呢度好唔好？」我指著一張可以看到整個維港的椅子問。

「是但啦。」周楉童想也不想便坐了下來。





「好喇，你可以開始講你想講嘅嘢喇。」待我們都坐好後，周楉童便開口說。

「我想講嘅嘢呀...其實我到而家都未諗好想講咩，或者應該話，我未諗好點去表達。」於是我們便陷入了沉默之中，誰也沒有主動開口打破這片寧靜。

我看著大海，看著坐在我身旁的周楉童，隨著記憶回到去數個月前看日出時的畫面，然後再慢慢回味著一直以來的經歷，有過開心的，有過不開心的，但過去這麼多次發生爭執，關係出現問題我們也解決得了，這次也一定可以的，只要我現在開口道出心裏話，再一起想解決方法，那我們就一定可以修補好關係，回復以前那樣。

我狠下決心，深吸一口氣後，開口道出這一個月以來心中的問題。

「其實，你係咪已經唔想再同我拍拖？」





我忍著內心的波動，強裝作沒事，微笑地看著她等待她的答案。

「點解你會咁問？」她想了三秒後反問我。

「因為，我覺得有啲嘢係我地之間變咗。」

「例如呢？」

「就好似我上個月咁講，你唔再好似以前咁晚晚打俾我，唔再好似以前咁成日話想同我出街，甚至我係你身上面唔係好感受到愛。」我吞了吞口水後繼續說：「尤其是我咁了解你，你一定係有啲嘢所以先至會變到而家咁。」





「咁我地無可能一世都係熱戀期，每日都痴住對方咁㗎嘛。」

「的確我地無可能一世都係熱戀期，但係而家嘅我地，連戀緊都唔似，我感覺我地嘅關係好似日漸疏離，變到好似...有層隔閡咁。」

「咁你咁講係咪想分手？」周楉童直盯著我問。

「我緊係唔係想分手，我講出嚟就係想講清楚而家我地之間有嘅問題，然後試下好似以前咁一齊去解決佢。」

「我只係覺得，我真係好攰，我做唔到好似以前咁樣同你拍拖，我唔想再放心機去經營呢一段關係，我超級超級愛你...但係我真係唔識再點樣去愛人...」

聽罷，我們二人又回復沉默，我看著大海消化著她的說話，心跳驀地加速，因為我已經能預視到我心中的最壞情況即將發生，而我很可能已經無力挽救這一段我珍惜至極的感情。








得閒咪fol下我ig囉：maanyin05