一覺睡醒，發現阿爸變成女人: Ch.14

「宗仔。」 

 我望向阿媽，她凝望我雙眸，欲言又止般，但還是吞出那一句話。 

「阿媽差唔多要走啦。」 

我瞄向時鐘一眼，嘗試扮傻：「都未夠12點。」

 就算只能挽留多一秒，至少可以多看幾眼。 





自與阿媽相認，我都把握每分每秒，捉緊每個當下，珍惜與她相處時刻，能補償過去遺憾。 

但有相遇，就有離別。 

是次一別，便是永別。 

「而家做戲咩，一到12點就要走。」阿媽紅着眼笑着，「唉笑到流眼水。」她轉身別過臉，用力揉搓雙眼、抹去眼角淚痕。 

我強忍淚水，故作鎮定問：「真係唔可以留多陣？」 





「⋯⋯有得揀嘅話，我都唔想走。」阿媽背對我回答，「但我唔再屬於呢度。」

 「邊個話？我話你係屬於呢度。 

你知唔知呢兩年，我每日收工，就係諗要買咩外賣，一餐半餐就話好食，但日日食真係好悶。試過買餸自己煮，但本身放工已經好攰，煮飯更加攰，一煮就無咗幾個鐘，去到後來，已經求其食、填飽個肚就算。 

同埋做家務真係好曬時間，我而家先明，點解你要成日吸塵、用漂白水拖地，因為一唔吸塵，地下就好污糟，真係會睇唔順眼。 

仲有洗衫，你成日叫我check褲袋、拎紙巾出嚟，又話染色嘅要分開，每次聽都覺得你好煩、好多規矩要跟，但原來紙巾碎痴住啲衫，係整極都整唔甩，上次搞咗我成個鐘咁濟。」我一口氣、胡言亂語說着，內容幾乎毫無組織，僅將所想的說出口。 





「你唔喺度，我先知我哋唔可以⋯⋯」但我真正想表達的，就只有這句：「⋯⋯我唔可以無咗你。」 

「我唔比你走，你唔可以走！」我無賴說着。 

聽罷，阿媽似笑非笑般，托頭歎息：「你幼稚園坐校巴嗰時，都有咁講過，仲喊到嘔話唔想翻學，要永遠同媽咪一齊，當時見你喊到咁悽涼，我真係有諗過，等多一年先比你翻學，咁就可以陪你耐啲。 

但我又同自己講，如果你永遠痴住我，就唔會學識大個，所以最後扮睇唔到你喊，等保母拉你上車，就急急腳走。 

雖然講係咁講，但轉身嗰刻，我就好驚你會因為咁憎我、唔會睬我，驚咗半日咁濟，飯都無心機食，點知一到放學，你又笑又跑咁落車，好似咩事無發生，唔記得曬朝早嘅事。」 

我低下頭，默不作聲。 

「宗仔，望住我。」她語氣強硬，卻帶一絲温柔，令我不得不屈服。 

我不情不願、以極慢速度，緩緩抬起頭。 





「所以我知道，就算我唔喺度，你哋都可以生活得好好。 

當時閻羅王問我，係咪就算咩都無曬，都一定要翻嚟，要我講理由說服佢。

 有一刻，我諗過唔翻嚟揾你哋，一嚟我驚，二嚟怕你會唔捨得，比之前唔開心。 

我亦諗到好多原因，可以叫你唔好自責、想你關心阿爸、擔心你睇唔開，但諗嚟諗去，呢啲未算最主要，原來我好自私，淨係識諗自己。 最後我答，決定翻嚟，係想好似以前咁，幫你煮餐飯、喺側邊靜靜地陪住你、聽多次你我做『媽咪』。 

我唔想你每次諗起我，都係怪自己，因為我而內疚一世。 

我想你記住我開心健康、無病無痛個樣，而唔係訓喺病床、插曬喉，無曬血氣嘅病樣。」

 「所以今日對我嚟講，已經好滿足，真係死而無憾。」她感觸道。 
媽咪理由，簡單直接，卻又令我心酸，心痛未有及時盡孝，醒覺之際，竟為時已晚。 





「媽咪，我應承你。」 

這心願，她獻上一切許下，這承諾，我用上一生遵守。 

儘管難度高，但快樂回憶，確實數之不盡，比痛心後悔的，多上百倍。