《末日綻放之愛》: 第二集-青梅竹馬（一）
「曦晨……曦晨我頂唔住喇！快啲閂門走，出面已經有一大班喪屍湧緊過嚟！」
「唔得啊！要走就一齊走，我唔可以冇咗你！」
「曦晨應承我，一定要好好生存落去，同埋你可唔可以做我女朋友？」
「由幼稚園第一日認識你，我已經係你女朋友，一直以嚟都等緊你嘅表白啦，正熙寶貝！」
「多謝你做我嘅女朋友，我愛你。」
「正熙，我都好愛你。」
「我哋來世再做情侶，我要正正式式成為你嘅另一半。」
「我哋一言為定！」
凝望住正熙為咗救我而將我推入升降機，由於舊式升降機冇紅外線感應器， 而直接關門，而正熙為咗確保我的安全，留低自己喺走廊出面擋住大批喪屍。佢趁著升降機關門時，將每一隻喪屍嘅手喺門縫中拉出來，確保唔會有喪屍阻擋升降機的關閉，目的就是俾我有一線生機。即使前路茫茫， 但只有堅持下去，先至知道結果係點 ……
呢一刻，正熙在我面前展露嘅幸福笑容，永遠銘刻喺我嘅心中。即使佢知道，喺幾秒鐘之後，他都會變成一個不再有感情同埋理性嘅行屍走肉，成為出面喪屍大軍嘅其中一員，漫無目的咁喺街上徘徊，尋找各種獵物，滿足正熙需要進食嘅生理需求。如果我繼續停留不前，相信我會成為正熙的第一餐「人肉宴」。然而，我唔甘心成為正熙的囊中物，更加不願浪費正熙為了拯救我而犧牲自己的生命。我一定要用我嘅生命嚟回報他。
我永遠唔會忘記，我對生存嘅決心，我一定會帶住正熙的意志生存落去，因為我是佢值得信任嘅女朋友－倪曦晨。
－－－－－－
「你係咪真係會救我㗎？」
「乜你覺得我會揼低你唔理咩？」隔離嘅男仔笑住咁答。
「唔知㗎，不過你都未表白啦，點樣做你女朋友喎。」
「呢個世界點會有喪屍呢，都唔知你驚乜，專心上堂啦你。」
這位男仔巧妙咁避開咗我們談論男朋友嘅話題，繼續專心聽老師講書，一路做住數學題。
大家係唔係以為我們置身於末日之中呢？完全唔係！呢個只係我喺上數學堂時，發嘅一個夢啫。現實中點可能會有喪屍存在呢！但呢個夢境卻感覺非常真實，我能夠感受到正熙對我嘅愛，為咗我而犧牲自己嘅性命，更喺他生命嘅最後時刻向我表白。呢一系列情節，喺現實中，機會幾乎係零。
當然夢可以隨意發生，但到現實生活中，每個人都會面臨各種挑戰同埋困難，有時甚至可能會感到絕望和無助。然而，唯有喺逆境中，我哋先可以發現自己嘅潛力同埋勇氣。在困難面前，我們應該保持信念，堅持下去，並為自己所在乎嘅人奮鬥。
正所謂：「人無事先做到世界冠軍！」
－－－－－－
「叮噹叮噹」，放學鐘聲響起，一班莘莘學子終於可以放低學業，奔向周末短假期嘅懷抱。
「曦晨，我哋放學去邊度玩啊？不如去飛機維修區睇日落啊？」正熙露出期待已久嘅笑容，因為今天終於是星期五，也是我們約好一齊去玩嘅一個短週末。
「好啊，半個鐘之後，屋企樓下等我。」我已經對呢個行程充滿期待，畢竟今次係我第一次去飛機維修區，可以近距離睇飛機升降，感受一下飛機引擎震耳慾聾嘅噪音。
－－－－－－
至於我同正熙點識呢？大家係咪覺得我哋好似嗰啲青春校園劇，因為機緣巧合之下坐埋一齊就開始熟呢？我哋嘅認識比青春校園劇更加青春，亦都係各大獨男幻想長期居於榜首－青梅竹馬。
其實我同正熙由幼稚園開始，已經一直係同班同學，同時正熙亦係我鄰居，正正住我樓上幾層嘅同一個單位，我哋幼稚園嘅時候，都係由屋企人接送，大家每日返學，搭同一班升降機返學，久而久之，雙方家長就逐漸變得熟絡，由最初傾嘅育兒心得，到之後嘅升小學、中學，可以話係無話不談。
可能兩邊家長年紀相若，啱嘴形又非常啱玩，所以兩家人成日約埋去玩、去旅行，所以我同正熙永遠都係糖黐豆，正所謂：「有正熙嘅地方就有我，有我嘅地方就有正熙」，同正熙相識十三年，大家熟到連身邊嘅人都話我哋係情侶關係，無論係幼稚園老師，相熟街坊，甚至去到中學都係，啲同學同老師都誤會我哋係情侶。不過我哋已經習以為常，甚至攞呢段關係作為笑話自嘲。
至於我哋係咩關係，我哋真係普通朋友關係，完全冇其他關係，我係認真的！但如果你問我，我到底鍾唔鍾意呢種撲朔迷離關係？我會答你，我唔會唔鍾意，我係好唔甘心停留喺呢段關係。我承認我係一個細膽嘅人，即使我好鍾意佢，但我都唔敢主動踏出表白嗰一步，我淨係敢不斷放暗示，令到正熙知道，我係好鍾意佢，我又細到大都好迷戀佢，唔知係正熙唔get我啲暗示，定係正熙唔想同我一齊，每當我放暗示嘅時候，正熙都會迴避問題，就好似今朝上數學堂嘅時候咁。
無論我點樣親近正熙，佢都係用盡千方百計咁迴避我嘅進攻，正如諺語所說：「男追女隔一座山，女追男隔一層紗。」唔知呢句諺語可唔可以應用喺我－呢個平凡少女身上呢？
（待續 To be continued）
IG：chingchingstory