迷途天堂 I -天上人間: 第六章

「天國嘅到來，係需要根據一定嘅日子而實現出嚟嘅！」楊祭司這樣說。「要根據一連串異像發生，根據呢個世代響起一連串嘅事件作為預警同警號……，當呢啲事件逐步發生之後，天上嘅國土先至會降臨人間！」
房裏面還站着一名負責學習小組的團長，他也附和楊祭司的話語說:「呢啲都係我哋全能嘅神，透過一本聖經咁樣寫落嚟同我哋人類溝通嘅說話！」
 
「人有罪性。」楊祭司這樣說，「所以我哋要守候住一個從天國帶來嘅救贖，呢個救贖，赦免我哋全人類一切嘅罪孽，然後獲得永生。」
 
團長:「所有都從聖經默示有提及過！」
 
楊祭司:「聖經提到，天國嘅到來，係神之子耶穌基督第二次嘅到來人間，呢一日亦將會係世界末日嘅日子。……但係耶穌基督到來之前，首先會有敵基督嘅出現。……所以呢啲日子裏面，我哋正喺度尋找呢位敵基督，而當中其實正預示着地球末日嘅日子快要到來！」
 
團長:「我哋人子就係神之子嘅轉世同化身，等候敵基督嘅出現。……當敵基督一出現，然後人子嘅真身就會現形！我哋嘅救世主自然會第二降臨，再顯神通，救贖人類！」




 
楊祭司:「我哋當中有可能出現害群之馬，阻礙咗救贖嘅進程。……喺我哋教會裏面，可能有二五仔，破壞人子嘅計劃！」
團長:「我哋知道有內鬼入咗我哋教會……，我哋懷疑佢係由所謂名門正派派入嚟調查我哋會社嘅臥底，亦有可能係差佬，我哋還未搞清楚。」
說到這裏，他們好像意會到什麼有關我與江sir之間的放蛇行動，我戰戰兢兢地盡量表現得自然而不心虛，我決不可暴露自己身份，因這有可能產生不可預料的後果，一來行動可能會徒勞無功，二來，以現在的情況來說，我有可能墮入危險境況，被祭司鎖入密室等候被宰的機率很大。
 
團長:「其實我哋揾咗好耐，發現擺街招收會員嘅時候，好似成日被監視住，每次出動都有其他教會嚟搶人，我哋成功收生率驟減，所以知道我哋當中一定有內鬼滲入。」
我要故作驚訝，做戲要做全套，不能有破綻，就算被拆穿了也要裝作鎮定，自己生命懸於一線，一切要謹慎行事。團長將這些事說出來給我知道，是否向我攤牌？……這時我手心再度冒汗，內心就像在行走在鋼線之上，稍一不小心便墮入無底深崖之中，永不超生。
我突然想起，那打入我體內的白色液體，不知是否有毒性？……除了讓我感到意識迷糊外，是否對身體做成一些傷害？我開始慌起來了……
 
楊祭司泛起淺淺笑意，透出陰寒的面目，說:「你唔駛怕……等我講清楚你知我哋有咩對策……你知嘛？……阿瑤其實係我哋條針，我哋安排佢負責調查邊個係內鬼……，結果，咁多個月來，我哋發現新加入嘅你同埋冼浩君，Holdan，係最可疑。……你哋私下係朋友？」




原來他們已發現你也是與我有往來，有私交的，如果他們知道了我是真正的臥底，他們會怎樣做呢？……他們是否會向我們逼供及施以嚴刑對待？
我:「冇錯，我哋私下成為咗朋友。」
楊祭司:「我諗你最好唔好太投入呢段友誼，……你最好同佢保持一段距離……。」
團長:「喺你同浩君之間，我哋反覆打量好一陣子，阿瑤話畀我知你常有去特定地方消費，嗰間雀仔園裏面嘅公仔記，你係佢嘅常客……係唔係？」
我心想:「糟糕！……被他們發現了……」
團長繼續說:「但係浩君去嘅地方卻係每次都係唔同嘅地點……用膳同買嘢、閒逛，冇一啲特定嘅消費模式可依循…好似有心避開嫌疑咁，……所以，我哋有理由相信，浩君就係我哋一路以嚟要揾出嚟嘅內鬼！」
楊祭司:「每次我會嘅教徒出嚟擺街傳道，同一時間必定會有其他教會 - 例如新教團福音組，出嚟搶人，而且每次擺檔我哋發覺必有一個人出現，而呢個人，我哋相信就係調查同監視我哋會社嘅主要人物。」
我:「咁佢係咩人？」
團長:「除咗我哋擺街，呢個人最多出現嘅地方，我哋發現就係浩君同時都會出現嘅地點。」
楊祭司在枱面上放下數張照片，讓我觀看，眼前見到的，那是顯示在浩君你坐着吃飯時背景中的另一個人的影像，背景中出現的那個人赫然是我的接洽人 - 江sir。




團長:「我哋希望你查下呢個人同浩君嘅關係！」
 
我曾從江sir口中聽說過，他要切查你的背景，我想，所以你所到過之處，他也形影不離的追踪着，這是最大的可能性。江sir和他的後勤支援部隊，在最近的日子裏，是在採取數據搜集的行動，你是他們收集材料的其中一條伏線，我也收到命令需要了解你的動靜，可能這樣便解釋到楊祭師他們手中的剛巧有江sir與你同時間同場的合照。
楊祭司的人也到處埋伏，加上阿瑤的協助，他們似乎也掌握了警方的動向……
 
他們看不見我與江sir在公仔記裏的接觸，這是可幸的事，卻相反，看到江sir在尾隨調查你身份時候的情形，誤會你和江sir之間有密切關係，這樣一來，便轉換視線在原本用來對付我……現在卻用來對付你的謀畧上面。此刻，我發現自己的另一個任務，除了自己，可能就是需要確保你的人身安全，你被誤認為藏在會社裏的臥底，可能教團內有人會對你不利，我要小心處理在你身上有可能發生的危險！
 
楊祭司再次陰陰笑了:「人子現在有個使命畀你去履行……，呢次係你表現你對人子忠心嘅大好機會。」
我:「點解你唔懷疑我係內鬼呢？……我遲遲都唔投入會社嘅活動裏面，唔通你唔懷疑我咩？」
團長:「我哋都有深思熟慮過，……一個臥底，斷估唔會咁坦白似你咁表達自己嘅不投入感。……但凡內鬼做嘅嘢，都係同流合污，先至掩人耳目，好似你咁唔投入，難以令我相信你假裝……，你嘅真實同埋老實，我哋無可厚非，……相信你唔會用唔投入嚟取信於我方……咁樣太冒險喇啩！」
就這樣，祭司他們竟坦然放心我進入他的會社小組裏，還叫我聯合阿瑤一起反調查敵方的線人 - 即Holdan浩君你……的確十分諷刺。