陌陌習慣

凱宜搭緊巴士既時候拎左一本記事簿出黎，拎起左枝原子筆寫低左兩個字——齋啡。

「你好丫，我做緊社會研究，想訪問下你，你平日有咩習慣？」

「我？我平日⋯⋯一起身就會飲一杯咖啡」

凱宜聽到咖啡兩個字不禁皺一皺眉，跟住再問：「你指齋啡定？」

「係齋啡」





「呢個習慣維持左幾耐？」

「3年」

「啊⋯⋯唔苦咩？」

「我接受到」

「多謝你接受訪問」





⋯⋯⋯⋯
第一日

凱宜一起身就行入廚房，打開雪櫃門拎起左琴日新買既罐裝咖啡。

空肚灌左一罐，再如常返工。

「好凍⋯⋯」

「好苦⋯⋯」





凱宜從來都唔飲咖啡，因為⋯⋯

第一佢好討厭苦澀既味道

第二佢飲即使係一啖都會失眠

⋯⋯⋯⋯
第七日

凱宜樓下既便利店罐裝咖啡售罄，所以佢焗住去starbucks 買杯black coffee

「小姐，想要咩？」

「比杯black coffee 我，tall size, thanks 」





「請問⋯⋯」

凱宜正想打開電話個starbucks app，下一秒發現自己電話早係半年前delete 左個app：
「我冇會員，唔好意思」

（我原來一早已經唔係會員，唔好意思）

「小姐貴姓？」

「姓林！啊！唔係，我姓⋯⋯算啦，係林」

「OK，請等等，林小姐呢杯black coffee有啦」

「嗯，好苦，點解⋯⋯？」





（點解你會咁中意飲？）

呢個研究對平時去starbucks 只係飲chocolate chip既凱宜明顯係有啲為難。

唔係有啲吧？係十分為難。

⋯⋯⋯⋯
第十三日

凱宜去左旺角既無印買咖啡濾紙、大創既咖啡過濾杯、starbucks 既咖啡粉

呢啲地方都係凱宜以前去過，不過唔係自己一個去，亦都唔係買黎自用⋯⋯

無論係咖啡濾紙同濾杯係咩size，定係咖啡粉係邊隻，凱宜都記得清清楚楚。





「佢中意呢隻，苦得黎回甘⋯⋯」

「佢屋企個飲水杯只可以fit到呢個size」

「佢話呢款⋯⋯」

（點解既？）

「呢隻都好苦⋯⋯」凱宜放低左個杯，望一望櫃櫥入面既砂糖，想伸手個下又停止左動作。

⋯⋯⋯⋯
第二十日

凱宜慢慢接受到自己因為飲太多咖啡而失眠呢個事實。





（係咩？）

（確定唔係因為其他野失眠？）

（確定）

（仲苦唔苦？）

（唔⋯？嗯⋯？苦）

（你指杯野定？）

（杯野其實唔苦，冇左佢人生先苦）

（因為我行過每一個地方、飲齋啡既第一啖我都諗起佢）

（諗起唔痛苦丫，諗起完發現佢唔係我身邊先係痛苦）

（佢⋯⋯有分離焦慮症）

（以前一直都係佢追住要見我、痴住我）

（佢話見到我會覺得好心安）

（我一直唔明）

（依家既我明明地）

（因為我依家經歷緊佢經歷過既野）

⋯⋯⋯
第二十一日

凱宜望住杯中最後一啖齋啡笑左一笑，轉個頭再加水沖淡

唔係沖淡，而係續杯⋯⋯

一個行為重複做二十一日會變成習慣

冇左你既我原來一直都唔習慣

因為習慣有得戒有得改

但需要冇

呢個就係你愛左我咁多年既原因

可惜我係離開左你先明呢個道理

我係離開左你先發覺我離開唔到你

點解咁苦你都飲得落？

你話，中意係冇得解嫁⋯⋯