不能愛上的星級女神2（下季待續）: 我只在乎妳（下）

我握住她有點冷的手給她溫暖，坐在床邊一直守候着她。
「若嵐，對唔住我頭先冇心咁話你。」我為剛才自己的脾氣道歉。她坐到我身邊，誠懇地跟我說：「我知道我成日都好依賴人，唔敢再倚賴你，所以我倚賴咗Candice。如果你當我係好朋友，你可唔可以都信埋我？」我正在思考，程心和貓仔便聞風而至。
「點啊？ Candice有冇事？」程心來到我身邊問候，「佢仲未醒。」我禁不住為Candice撥瀏海，心情很複雜，非常擔心她。
「我哋有冇嘢可以幫手？」「一係我上網睇吓有冇啲香港診所醫生？」…她們你一言我一語，雖然知道他們也是出於善意幫忙，但還是加劇了我心中的煩躁感。此時Hilary也來了，身邊還多了個人。
「頭先見到個人鬼鬼鼠鼠喺度偷望，我捉埋佢上嚟。」Hilary －手把李思晴推進來，順手關門。
「又係你呀李小姐？唔係跟我跟到嚟呢度呀嗎？」看到她我真的很無言。
「拿！今次係老總比經費我黎跟嵐婷cp，點知…」她有點奸笑地望向我和Candice，又說：「真係估唔到你咁唔信我同章樂言，原來你話關語芯系你女朋友，只不過係煙幕！你同朱浩婷先係真嘅！」若嵐望向我，有點吃驚：「向瑾瑜，你搵Hilary做你煙幕？你認真架？」看來，這次真的要六國大封相。

「好嘈啊你地…」
「咁多個女人喎！梗係嘈啦。」我剛打算苦笑，發現是Candice醒來了。




「Candice你醒拿？」「Candice你點呀？」我和若嵐問候她。我立刻拿來糖水坐到她身邊，溫柔又緊張地說：「你全日都冇食過嘢，應該係血糖低暈左。飲少少糖水先，暖暖地唔熱架。」Candice望了一圈我狹小的酒店房，卻容下了七個女人。她邊小口地呷邊挖苦地笑說：「真係好齊人喎…」
「係幾齊人架！全部都係向瑾瑜啲緋聞女友！我都真係想影返張合照…」李思晴這句差點令Candice嚇得噴水，我心也離一離。
「李思晴你講少句唔會死嘅！」我走到她身邊盯着她，她的眼神左右閃縮，我攤開手掌：「相機俾我！」她真的乖乖呈上。我把她剛才在餐廳拍到的相片刪除，又霸氣地問：「錄音筆呢？」她把手機掏出來給我，自動點開相關錄音由我去刪。
「向瑾瑜，我真係當你係朋友㗎。」她望向我的眼神，令我有點內疚。我追問：「咁今日件事？」
「冇啊我咩都冇見到。」她平靜地回答。
「去到巴黎請你食法國大餐，好唔好？」我放鬆了鋼起的刺，把手機還給她，她笑著說：「拿你話架！」她又拉起我手勾手指尾：「－言為定！」「當然。」

「向瑾瑜，你頭先都冇食過嘢，食啲嘢先啦？」Hilary在旁邊打開剛才的外賣，把叉遞給我。我坐下來，望向床上的Candice。她望向若嵐，彷彿有點刻意地說：「若嵐你坐近d，我有d凍。」
「下你凍呀？」若嵐在坐近之前猶豫地望向我：「瑾瑜，Candice話…」「你問佢做咩啫？」Candice打斷她的話，－手把她拉到身旁。若嵐坐近之後，Candice把被子也蓋到她身上，將若嵐的手像戴安全帶般放在她身前。
「若嵐，Candice之後就交返比你，冇我嘅事啦。」我冷冷地說，轉頭溫柔地對Hilary說：「啲嘢食凍晒唔好食，Hilary你山長水遠過到嚟，我而家同你去食好嘢。」我一手袋好房卡，另一手牽起關語芯的手，無視其他人的驚訝目光離開了自己房間。





我和關語芯來到酒店附近的酒吧餐廳，運河夜景盡入眼簾。
「你同朱浩婷…真係冇野？」第一次聽到她用這個語氣關心我。
「如果佢真係中意萬若嵐多過我，我唔會再加隻腳入去。」心中明明不是這樣想，但還是吃著炸魚薯條，喝著啤酒裝作淡然。
「其實一睇就知，佢當萬若嵐係好朋友。佢望你嘅眼神都唔同。」Hilary喝了幾口我的啤酒，吃著小食。
「你同貓仔一樣咁識睇人眼神。」我和她再次對望，她的眼神又添加了柔情和感性。每次跟她對望彷彿也有驚喜，而且有種上癮的微妙感覺。
「而家你都識，你有冇見到啲咩？」她這句溫柔，居然敲到我心門。

背景音樂播放著「Hopelessly devoted to you」，我和她沒有停止以眼神對望交流。
「咁你想我見到啲咩？」我輕輕問。




「你喺我心入面嘅位置。」她溫柔地說，慢慢地烘近我：「可唔可以唔好，再推開我？」她溫柔地吻下去。面對這個她，我欲拒還迎。