不能愛上的星級女神2（下季待續）: 信任危機（上）

「錢銀定女人呀？」Hilary喝著咖啡，「你煩咩，我煩咩囉…」我壓低聲線，詭秘地望向她。
「喂…唔可以咁比㗎喎…」她移開了目光，再呷了口咖啡，似乎有些心虛，但還是問我：「煩女朋友呀？」
「佢要同個佢以前中意過嘅人拍戲，尺度都…幾大。」我有點苦惱，她回應：「拍戲啫，你信唔過佢咩？」
「拍戲我信得過佢。但係我唔明個製作人係咩居心，點解要佢哋住埋同一間酒店房呢？」
「咁你即係信佢唔過？」她再反問我，我認真望向她：「係信佢哋唔過。嗰陣如果唔係我出現，佢哋都有機會一齊……」我拍拍自己額頭，壓低聲線：「我知…我知佢哋係好朋友。但係…可能係我以前唔係呢行，我從來冇諗過呢個問題會係一個問題。到呢個問題真係發生，我先知原來自己會好在意…」
「咁點解你唔同佢講？」她點出了重點。
「因為…我唔想佢覺得，我唔信佢。其實我信佢，但就係冇乜安全感…」我歎了口氣，Hilary正要回應我，但目光卻望向門口方向，對我露出了詭異的笑容。

「向瑾瑜！」是朱浩婷來了找我。
「Candice？你唔係話今日唔得閒咩？」我站了起來，很驚喜，心亦安定了。




「我諗住俾個驚喜你呀嘛！你開咗戲咁耐，我都未有時間過嚟睇你。」我正想上前牽她的手，她卻睨了我一眼，又偷看旁邊的Hilary的反應。關語芯淡然一笑，居然很通氣地走開了。雖然Hilary走開了，但Candice似乎還在留意走到遠處的她的舉動。
「喂！你而家你搵佢定搵我呀朱浩婷？」我有點醋意。她偷笑：「咁我驚佢唔知想點呀嘛！點呀你？拍咗一段時間，個角色難唔難捉摸啊？」
「呢方面Gary同Hilary幫咗我好多，我覺得我而家諗野都陰謀論咗～」我想牽她手，但她還是害怕。
「係囉，所以又要上人哋屋企係咪？」她壓低聲線向我迫宮。
「咁你信唔信我？」我問她，她點頭，又反問我：「你呢？你信唔信我？」我猶豫再三，告訴她：「如果我話你知，我信你，但係我…唔信你同萬若嵐呢？」她笑了笑：「做咩啊？你驚呀？」我當下也不知該點頭還是搖頭，亦不知應該說些什麼。

「Candice！」若嵐居然又會這個時候跳了出來，走到Candice身邊。我呆了瞪著她倆，問若嵐：「Candice黎搵我，你又點解喺度啊？」若嵐看著我，一邊眉戚起，疑惑地問：「哇，向瑾瑜，你呢個咩表情啊？」
我把Candice拉近我身邊，有點敵意地告訴若嵐：「萬若嵐我話你知！你同我女朋友拍戲嘅時候，唔准有劇本以外嘅多餘接觸！仲有，你同佢同一間房都好，唔准咁close！」Candice用手指輕點我臉，可愛地對我撅起口鼻：「你啊～使唔使跟埋嚟啊？」
「最好啦…」
「喔～咁你咪嚟囉！」她偷笑。




「雖然唔可以跟曬，不過我會突擊檢查架！」
「好啊～你過嚟～」Candice有點甜地含著笑。

「全世界預備埋位！」
我和Hilary去準備，若嵐離開了，Candice找了個位置坐下。今日開始會有激吻戲，也難怪Candice明明沒空，也會抽些少時間過來監場。
「原來你女朋友真係朱浩婷。」Hilary壓低聲線，奸笑着：「你未出現之前，佢同萬若嵐單野喺圈入面傳得都好勁。」我又坐不住了：「咁大膽？我以為佢追緊若嵐炸喎。」
「你話朱浩婷？佢當然有追，但萬若嵐受喎。」
「佢受？點受法呀？」我追問，Hilary望向我：「你問我？做咩唔問你女朋友呀？」
「你講你知嘅嘢俾我聽。」
「萬若嵐會去監朱浩婷場，同埋，你知唔知朱浩婷之前有車？」




「你話咩話？」我簡直不相信。
「佢成日接萬若嵐收工。」
「仲有呢？」
「再爆啲都見過。」怎麼可能？我想立即問清楚Candice，但我剎了車，這些都是過去的事，她現在是我女朋友。過去的事已經過去，就算真的假的，重要嗎？

關語芯望向我的眼神似乎又有點深藏不露，但想起她對著我在那天之後的一反常態，我還是選擇了相信她。