捉伊因Z(實體書《3,2,1…捉伊因》已經出版): 鬼來了
鬼來了
「今次真係走咗啦啩？」性感少女擔憂的問，無他，畢竟暫時她是唯一一個兩次與鬼擦肩而過的參加者，如此擔憂也在所難免。
「等Maria媽媽去睇吓先。」Maria媽媽靜悄悄的走到門邊偷看，剛好目送鬼跑到二樓，於是放心淡定的跟性感少女說︰「放心，隻鬼落咗去下一層，我哋真係安全喇。啱啱如果你無叫咁大聲，我哋就可以安全啲揾錦囊。不過都好彩，隻鬼揾我哋唔到，我都話扮公仔有用㗎啦，你有無嚇親或者整親？我見隻鬼啱啱喺你嗰面踩嚟踩去。」
「收聲啦阿姑，口水多過茶，啱啱如果唔係你喺後面拍我，我點會嚇到大叫？」性感少女埋怨道。
「哈哈哈哈，唔好咁，而家咪無事囉，如果有咩事，Maria媽媽都會保護你㗎嘛，唔駛驚喎。你諗吓，啱啱唔係得我呢個扮公仔嘅計劃，我哋邊有機會仲可以喺度傾偈呢，一人一次，打和啦。」Maria媽媽繼續笑着說︰「咁耐都未知你咩名，話哂我救咗你，講我知都得啩？嚟，講畀Maria媽媽知，乖。」
性感少女白了她一眼，實在抵擋不住她的長氣，冷冷的拋下了兩個字︰「幽幽。」
「咩話？」Maria媽媽聽不清楚。
「幽幽！」幽幽走到Maria媽媽耳邊大聲說。
「哦，聽到聽到，唔駛咁埋咁大聲，Maria媽媽又唔係聾，一陣你又引返隻鬼上嚟就麻煩，我未必次次都諗到啲好方法去匿埋㗎。啱啱係因為隻鬼嚟過一次，所以正常都唔會再揾啲公仔，只會揾未揾過嘅密室，所以我哋扮公仔先可以過到骨。」Maria媽媽戲稱。
「你收聲就得喇，咁就唔會引隻鬼返上嚟。」幽幽不耐煩的說，然後繼續埋首玩偶埋尋找錦囊。
「你係咪想揾錦囊？我幫你啦，我揾嘢好叻㗎，阿仔阿女啲嘢成日唔知塞咗去邊都係我揾返，錦囊係點㗎？」Maria媽媽依然連珠砲發的問。
「好煩呀，你收聲得唔得？我點會知啲錦囊係咩樣？」幽幽煩厭的說。
「好好好，對唔住，對唔住，Maria媽媽唔講嘢，專心揾，專心揾。」Maria笑笑口說，絲毫沒有半點歉意。
幽幽沒有多加理會，只是專注於尋找錦囊，終於在其中一個玩偶身上，找到一張紙條，上面寫着「大的我，中的我，小的我」。
幽幽看着紙條百思不得其解，Maria媽媽見狀也走來參一腳。
「畀我望望，『大的我，中的我，小的我』？係咪即係有三個同樣但唔同大細嘅公仔咁解呀？」她望着紙條推測。
幽幽聽到後靈光一閃，立即尋找其他玩偶。在三百個玩偶內，要多找兩個一模一樣但尺寸不同的，確實不容易，但既然現在有了目標，找起上來總算有點頭緒，不再像「盲頭烏蠅」。
「阿姑，估唔到你都有啲用。」這是幽幽今日第一次說話不傷人。
Maria媽媽聽到後有點愕然，但還是接受了，可是依舊改不了長氣的性格︰「呵呵，駛乜講，我仲有好多好嘢你未知，遲吓你就會知咩叫好媽媽。我第一眼望到你就覺得你好似我個女咁，可能你哋都差唔多年紀，所以有咩事都可以同Maria媽媽講，我一定會幫你。」
「煩，咁你出少句聲當幫忙，專心揾。」幽幽始終接受不到Maria媽媽的長氣。
她們幾經辛苦，終於找齊扭蛋、洋娃娃和人體模型三個尺寸不同，但一模一樣的玩偶。
「之後呢？揾齊三個，咁之後點？」幽幽仔細查看三個玩偶，期望找到更多線索。
「會唔會係嗰度？」Maria媽媽指着窗邊的三個由天花吊下的鈎子道。
幽幽走到窗邊查看鈎子，發覺三個鈎子分別貼了一張紙條，由左到右分別是「大的太大」、「中的太小」和「小的剛好」。
「即係點？咩意思先？即係仲有其他一樣嘅公仔要揾？」幽幽看着糊塗了，心中的煩躁值一路飆升，相反，Maria媽媽冷靜的拿着玩偶逐一掛在鈎子上。
「喂，你唔好亂嚟呀！」幽幽阻止道，但已經太遲了，Maria媽媽已經把三個玩偶都掛好。
「信Maria媽媽喇，無事嘅。」Maria媽媽冷靜道，大家都沉默了，等待接下來的事態發展。
「嚓」，窗台的暗格無預警打開了，錦囊靜靜的躺在裏面，是黃色的錦囊。幽幽十分驚喜，連忙問Maria媽媽為何知道答案，Maria媽媽耐心解釋道︰「其實都好易，『大的太大』，即係唔係掛大嗰個，咁即係掛中或者細﹔『中的太小』，即係中嗰個唔會掛呢個鈎，只可以掛個比中大嘅，即係大嗰個﹔最後『小的剛好』，即係細嘅啱啱，咁掛佢就無問題，最後就得返中嗰個未掛，就掛喺『大的太大』呢個鈎度，咁就解開咗呢個謎題，其實都係好簡單，算唔得上係謎題，平時睇推理動畫嗰啲仲複雜，我都可以解得到，所以呢啲濕濕碎。你知唔知呀，我睇過一個故仔……」
「得得得，知道知道，你講過喇。」幽幽預測到Maria媽媽將會長篇大論，連忙打斷她，並打開錦囊，內裏有一個屏幕顯示着「何，三」的電子手環。
「吓？『何，三』？」她不解，下意識的望向Maria媽媽，可是這次連Maria媽媽也毫無頭緒。
「點都好，攞咗先，等陣問吓其他人，佢地可能會知。」Maria媽媽提議。
「唓，我夠知，駛乜你講。」幽幽又回復了不屑Maria媽媽的態度，戴上手環便去另一間房繼續尋找。
而此時，樓下傳來了鬼的吼叫。
+×+×+×+×+×+×+×+×+×+×+
阿雲來到二樓，樓梯對住的第一間房是藏書閣，他直接便跳過，因為他剛才看到的身影並不在這排房間。他故意邊走邊吹口哨，使得整間大宅都充斥着《煞科》的旋律，同時也令到被捉的人更加心寒，尤其是同層的五人──KT、福伯、野仔、樂哥和Joyce，哨音就像在他們耳邊一樣。
「靜啲，」KT壓低嗓子提醒福伯道︰「隻鬼喺出面巡緊。」此刻的他們正身處藏書閣。
福伯立即停下動作，像定格一般，KT看到忍不住笑了，幸好聲音並非很大，否則便會把鬼引來。
在確認鬼遠去後，KT和福伯都鬆一口氣，但他們都不敢輕舉妄動。
此時福伯裝作勞氣道︰「不聽老人言，吃虧在眼前。我都話應該揾地方匿埋先，仲仲話有時間，可以揾埋呢間房先，之後再去遠離落嚟嘅樓梯，我哋差啲出事喇。」
KT也知錯，連忙道歉︰「Sor呀，我都唔知佢會咁快落嚟，差啲害咗你，下次我會聽你講。」
認錯後，KT直接放棄找錦囊的初衷，轉為與福伯一樣，尋找可以藏匿的地方，以免鬼使出一招回馬槍。
阿雲走到五間套房前停下，這就是他看到人影的地方。他首先打開了陶瓷房的門，裏面所有的東西都是以陶瓷製成，而且絕不馬虎，每一件都是妥妥的藝術品，出自當代和歷代大師之手，美輪美奐，價值連城。
不過，這些在阿雲眼裏都是一文不值的垃圾。他看了一眼房間，看到物件擺放整齊，沒有移動過的痕跡，已經能夠確定尚未有人來過這房間。除此之外，一個大大的錦囊就這樣完整的放在陶土中，要使用拉坯機把陶泥製成碗，才能順利拿到錦囊。
「錦囊係畀參加者。」Sigmund Freud這句話突然在阿雲腦中響起，他嘴角揚起奸笑，用蠻力強行把錦囊抽出，得到的是一個紅色的錦囊，裏面裝着一枝AA膠。
「AA膠？有咩用？不過都唔重要，我攞到一個錦囊即係佢哋就少咗一個，對我嚟講點都係好事，而且我仲可以用嚟做餌引佢哋上釣。」阿雲心想，同時已經開始計劃着該如何利用它。
離開陶瓷房後，他走到隔壁的蠟燭房。這間房用了長短粗幼形狀不一的蠟燭裝飾，當中更有一些是蠟像，造得栩栩如生，加上鬼斧神工的上色，很難分辨出它究竟是真人還是蠟像。
經過之前的玩偶房經驗，這次阿雲對蠟像格外認真查看，他深信其中一定會有真人混入其中，而這次，他猜對了。根據剛剛由三樓往下看的記憶，那個身影是比較肥胖的，換言之，只要仔細查看豐滿的蠟像即可。
阿雲逐步逼近，Joyce越發緊張，她意識到阿雲是衝着她而來。一時之間，各種念頭均在這短短的數十秒間誕生︰繼續扮？逃走？反抗？求饒？會死？屋企人會如何？死後的世界是怎樣？有人會出手救助嗎？自己還有很多事情未做啊……
在這瞬間，她決定放手一搏。
現場大概有六個體積比較大的蠟像，分左右兩排，各三個排在房內，由Joyce所扮的是左排離房門第二近的，而鬼正在檢查右排最後一個蠟像。
「如果我而家跑走，利用同佢嘅距離、佢嘅反應時間、佢嘅轉身時間，應該我可以跑得走，仲可以順手關門阻一阻佢。」Joyce計算過後，拔腿就跑完全沒有回頭。
可是，她偏偏計漏了一樣東西──她的移動速度。
的確，一切都如她所料，鬼的起步時間比她遲了兩秒有多，兩人拉開了約十米的距離，但這時間差距和兩人距離，鬼只用了一個箭步便把它們消弭了，在Joyce離開房間之前，鬼已經捉到她。
此刻，時間彷彿凝住了。
Joyce手握着房門手把，房門半開；鬼左手放在Joyce的背上，露出勝利者的笑容；樂哥和野仔站在蠟像群中，看着這一幕，雖然很想出手幫助，但卻無能為力，而緊張和害怕的感覺纏繞着他們，呼吸亦漸漸變得急促沉重起來，若不是阿雲把注意力全放在Joyce身上，他倆定必會被發現，到時便會被一網打盡。
此刻，身處同一空間內的四人，都靜心等待着事情的發展，各有自己會知道的事情。
真的會沒命嗎？
捉到人之後有甚麼錦囊？
會發現我嗎？
是何種死法？痛快還是折磨？
而這些問題的答案，下一秒便出現了。
Joyce突然整個人一震，然後失去了支撐般重重的倒下，呼吸停止了，紅色和白色的液體由耳朵流出，直直的流向野仔，就像向他追問為甚麼見死不救。
而阿雲也後退兩步，被眼前的景像所嚇到，他從來不知道這場捉伊因會喪命，一時間情緒也湧上心頭，跪下立即對Joyce施展心外壓試圖救他，同時對着大宅無目標的大喊︰「Sigmund Freud，究竟發生咩事？點解會咁？點解你一開始無講？」可是他的呼喊並沒有得到任何回應，反而嚇到其他參加者。
現在他總算知道，這是一場以命相搏的生存大戰，他擁有掌控別人生死的大權，他亦終於明白為甚麼他會當選做鬼，因為他的職業是魚類分割員，即「賣魚佬」，每日都有無數的生命死於他的刀下，或許就是這樣，贊助人便認為他做鬼可以接受到殺生，而且也不介意和不抗拒殺生。
而野仔看到這一幕，整個人也失去了反應，縱然在流浪街頭時已經見識過多次不同死法的屍體，但這次是唯一一次有生命在他面前消逝，他很想大叫，但受驚過度的他張開喉嚨也發不出半點聲音，亦幸好他啞口無言，才不至於被阿雲發現，能夠幸免於難、逃過一劫。但這一幕，將永遠刻在他的腦內，伴隨他一生，成為一個揮之不去的陰影。
至於樂哥，看到眼前這一幕也不自覺的顫抖起來、寒毛直豎。他確認了這場遊戲真的會出人命，亦確認了死狀雖然恐怖，但總算痛快，不會受太多的苦。不過與這些相比，他得到了一個更有用的情報──鬼是不知道會出人命，這個情報是影響到遊戲會否繼續進行的關鍵。
一輪搶救過後，Joyce還是返魂乏術，阿雲縱然還未從悲痛和殺人的陰霾中恢復過來，但也只能放棄，轉移將自己的怒氣發洩到主辦單位身上。他把Joyce搬上床，用被蓋好，鞠了三個躬後，便怒氣沖沖的衝出房間，消失在樓梯盡頭。
+×+×+×+×+×+×+×+×+×+×+
「終於都走咗。」樂哥鬆一口氣，拍了一下野仔，希望能招回他的三魂七魄，但他還是神情呆滯，於是樂哥搖了他數下，還賞了他兩記耳光，總算回復正常。
但野仔的第一個反應是哭，大哭，他哭着對樂哥說︰「樂哥，真係會死人㗎……Joyce喺我面前死咗，佢明明幾分鐘之前仲同我哋傾緊偈㗎……我唔得喇，我想退出……」
樂哥也身同感受，但他深知無法退出，要保命只能勝出遊戲，於是他鼓勵野仔道︰「我好明白你嘅諗法、老實講，我都想退出，不過我哋都知無可能，與其諗逃避，不如諗面對同取勝，你同我實掂，掂呀掂呀掂呀！」
「我哋邊有勝算？隻鬼捉到我哋就會死，好似Joyce咁死呀……」野仔別個頭，避免看到Joyce的屍體。
「但你有無留意到隻鬼嘅反應？」樂哥問，但他都幾乎肯定野仔會回答「無」。
野仔搖搖頭，果然不出樂哥所料，他接着解釋︰「隻鬼見到死人，佢自己都好驚訝，甚至仲喺度一邊大叫一邊救人，最後仲好體面咁將Joyce嘅屍體放喺床上面，然之後先離開。」
「咁又點？」野仔不解的問。
「咁又點？咁即係掂哂囉！即係話，隻鬼有可能會企喺我哋呢面，唔會再捉人，而係諗辦法一齊去完咗隻game，咁我哋就可以專心揾錦囊，大家都無人需要再犧牲。」樂哥興奮的說。
「但係……」野仔欲言又止。
「我知你想但係啲咩。」此時有第三把聲插話，是KT，他不疾不徐的說︰「你想講但係Sigmund Freud會唔會咁輕易畀我哋咁做。」
雖然是突然加入的人，但野仔並無感到不安。
福伯也道出自己的見解︰「我認為佢哋唔會干擾我哋，如果呢個真係一個學術實驗的話。」
「無錯無錯無錯，講得啱，佢哋搞咁大壇嘢做場實驗，就係想有個公平公正公開嘅實驗結果，所以絕對唔會加以干擾。」樂哥也說出自己的想法，亦不忘介紹自己︰「我叫阿樂，佢叫野仔。」
「你好，我係福伯。」、「叫我KT得啦。」福伯和KT分別回答。
「不過，我啱啱講嗰個只係其中一個最理想嘅畫面，亦有可能會完全相反。」樂哥沉重的說。
「有可能佢會愛上咗殺人嘅快感，之後不斷殺人。」福伯立即搶答。
「咁嘅話，我哋咪變咗被困嘅白老鼠，點都難逃一死？」野仔驚恐起來。
「我哋只有祈禱隻鬼係第一個情況，同埋趁而家盡快揾多啲錦囊。」KT有建設性的提議道︰「一齊行動、分享情報係現階段最好嘅辦法。」
+×+×+×+×+×+×+×+×+×+×+
「哈，果然係有人喺度，仲唔畀我捕到你？」老鬼在廚房外守株待兔，終於等到青秀男出來。
「嘖，竟然喺度捕我，與其嘥時間做呢啲無聊嘢，不如早啲去揾錦囊揾方法逃生仲好。」青秀男不屑的說。
老鬼猙獰的奸笑起來，心懷不軌的走近青秀男並說︰「揾錦囊交畀你哋去做就得，揾到之後將錦囊交畀我，等我嚟統一分派，帶大家走向勝利！」
「荒謬！」青秀男不從並作出反抗，老鬼一怒之下抓着青秀男的衣領，異常忿怒的說︰「你唔好敬酒唔飲飲罰酒，唔好以為你青靚白淨、斯斯文文我就唔會郁你！」語畢便捉起他，施展了一招背負投，把青秀男重重的摔在地上。
「你呢啲人真係死不足惜，哈哈哈哈……」青秀男躺在地上，卻失聲大笑。
「做咩？畀我撻傻咗呀？」老鬼恥笑道，並走近他，想從他身上搶走錦囊。
「你呢種人，正正就係我最憎嗰種。講唔掂就郁手，以為用武力就可以解決一切！抵你做監躉坐監，睇嚟喺入面你仲未悔改，所以話而家嘅司法制度真係錯漏百出，只有靠我去懲治你哋呢種垃圾！」青秀男雖然躺在地上，但依然氣勢凌人。
老鬼被他的說話惹怒了，尤其是「監躉」這個詞語更是挑動他的神經，他立刻破口大罵︰「仆你個街，你呢啲書蟲扮乜人格高尚？我監躉？你知啲乜？你呢條廢柴恃住讀多幾年書就喺度扮大袋？我忍你好耐，第一眼見到你已經睇你唔順眼，而家啱哂，可以好好教訓你，等你學吓點做人！」
老鬼走近青秀男，一腳便踏在他的頭上，力量大得仿佛能把他的頭踏爆，但他還是沒有退讓，反而氣定神閒的道︰「踩住我就啱，咁我先可以捉到你！」
語畢，青秀男緊緊的抓住老鬼的腳，然後腰用力一擺，雙腳鉗着他的頸，向下用力，把他整個人也拉倒，接着立即使出關節技把他牢牢鎖實，動彈不得。
「打架之前都要睇對手，你揀着我算你唔好彩，你覺得我憑咩可以懲治到你呢班垃圾？」青秀男輕鬆道︰「記住我，我係專治你呢班廢物嘅天敵，網上嘅人都叫我阿月，阿月就係我！你呢個垃圾，由畀差佬捉嗰時我已經留意住你，點知判得咁輕，我本身都想收你，而家仲好，有呢隻game幫我，唔駛我自己郁手。」
阿月說完後雙手用力一扭，「啪」的一聲，老鬼的腿應聲截斷，他痛苦的大叫，但卻被阿月摀住他的嘴使他的叫聲沒有傳開去。
「唔好叫得咁大聲，」阿月用令人心寒的聲小聲說︰「咁會引隻鬼嚟，到時你就會死，精精哋自己爬埋一邊匿埋，咁你都仲有機會生存耐啲。」
阿月和老鬼的爭執完結之後，便再出發尋找錦囊，而此時大宅上層傳來大喊。
「而家先真正死第一個？進度比我想像中慢，同埋隻鬼似乎畀啲道德枷鎖鎖住咗，正廢物，由我做鬼就無啲咁嘅問題。Anyway，佢崩潰即係證明我呢面仲好安全，可以繼續安心行動。」阿月心想，然後走進洗衣房開始尋找第二個錦囊。