捉伊因Z(實體書《3,2,1…捉伊因》已經出版): 實驗？遊戲？
實驗？遊戲？
「嗞……叮……」燈亮起，漆黑的房間頓時變得光猛，房間內的九個人同時瞇上了眼，有人甚至以手擋着燈光。
「搞乜鬼？」一把粗魯的男聲首先開腔︰「做咩叉嘢捉我嚟呢度？快啲放我走！」
「冷靜啲冷靜啲冷靜啲，唔駛咁激動，最起碼我哋仲可以自由活動，無畀人斬手斬腳先。」一位頭髮有部份已變白的中年男性微笑着安撫粗魯男。
「笑笑笑，笑乜Q？你係咪有份捉我嚟嘅？」粗魯男指罵着白髮中年男，而他只是無奈的笑，並搖着頭轉身繼續查看四周。
「喂……喂，你……你哋呢班人唔駛做戲，係咪我之前唔應承接你哋多P，而家夾埋想禁室培育我？我好打得㗎，跆拳道黑帶，唔好……唔好埋嚟呀！」一位妝容妖艷、衣着性感的少女獨自躲在牆角架起雙拳大喝道，但任誰都聽得出她是故作鎮定，實際上怕得要死。
「夾埋？禁室培育？我先唔會做啲咁變態嘅事，作為律師我係唔會犯法，而且就算真係要咁做，我自己一個都足夠，唔駛呢班蝦兵蟹將阻頭阻勢。而且你仲話自己跆拳道黑帶，睇你姿勢就知假。計我話，與其講咁多廢話，倒不如我哋一齊揾吓有無機關開到門走仲好。」說話的是一位穿着筆挺西裝、一副成功人士模樣的清秀男生，他正在四處敲打牆身，試圖尋找隱藏的機關，而性感少女被一語道破後，立即面紅耳赤，沒有反駁。
「好喇，一人少句，大家被困喺度都係緣份，好應該相親相愛、共渡時艱先至啱㗎嘛，係咪？如果大家一直嘈，咁我哋又點會有機會好好相處好好溝通，互相認識，發掘大家嘅優點，之後一齊做好朋友呢？你哋話啱唔啱先？靚女，你着得咁少布，呢度男人多，畀人睇蝕哂囉。嚟嚟嚟，等Maria媽媽畀件外套你褸住先。」中年婦人Maria媽媽脫下一件手織羊毛外套，等待性感少女過來，可是她不為所動，而在場的人都對長氣兼囉唆的Maria媽媽露出厭惡的眼神，Maria媽媽見狀，只好打圓場道︰「唔緊要，等你想着嗰時再嚟問我借，我幾時都會借畀你，女人實幫女人。」
然後，便是很長的安靜時間，各人都在觀察，有的觀察其他人，有的觀察環境，有的觀察自己身體有沒有異樣，直到一位年青人再度開腔打破靜寂，大家又才再次說話。
「我哋……係咪互相介紹吓，講吓自己點解會喺度會好啲？」年青人羞澀的問。
「好啊好啊，我睇啲戲都係咁，一班陌生人無啦啦畀人捉咗玩啲變態遊戲，玩之前通常都會自介，之後揾到啲共通點呀、過錯咁，呢啲通常都係最後要懺悔嘅嘢，亦都係逃生嘅關鍵。」一位胖胖的女生高興的說。
「而家又唔係做戲，而且睇親呢啲戲，到最後都係得女仔先會生存到，我先無興趣。定其實你係工作人員，呢度有啲隱藏鏡頭，而家係喺度拍緊真人show，所以你要推動劇情呀？」一位高大帥哥不屑的說。
「係啦係啦，就係咁，通常都會有一個人咁講，然後佢會無視所有規則，第一個死。」胖女生拍着手興奮的說，高大帥哥白了她一眼。
「啋！快啲吐口水講過，呢度無人會死。」戴着鴨舌帽的滄桑老人說︰「就算真係有人要死，都肯定係我先，我都咁大年紀，點計都係我嗰頭最近。」
「吱……」刺耳的咪高峰聲從房的四周傳來，打斷眾人的對話。
「Testing，one，two，three，OK，用得，咪無問題。」
接着，咪高峰的對面傳來人聲︰「多謝咁多位嚟參加今次嘅實驗，我係主持人Sigmund Freud。大家唔駛估估吓，你哋都係成功通過咗一個人性實驗先會被揀選咗嚟呢度，所以大家應該為被選中而高興先係，因為最少證明咗你哋係好心地嘅人。」
「實驗？」眾人異口同聲。
「今次嘅實驗，大家當一場遊戲咁玩會更適合。」Sigmund Freud續說︰「不過為咗實驗嘅結果更準確，恕我暫時唔可以透露實驗嘅目的係咩，如果想知嘅話，你哋可以留意日後嘅發表。但可以講嘅係，參加者只要可以留到最後，我哋都會畀車馬費，或者你哋可以稱之為獎金。而呢啲獎金絕對係天價，所以希望大家可以表現好啲，認真盡力咁去玩呢場遊戲。」
「遊戲？」大家又再次神同步。
「喺度我會簡單介紹吓遊戲內容，今次大家玩嘅係捉伊因，即係大家小朋友時期玩嗰隻，只要唔好畀鬼捉到就得。當然，一般捉伊因其實只要夠耐，做鬼最後都一定會贏，除非佢自己投降，所以為咗平衡呢個設定，喺今次嘅遊戲場地，即係你哋身處嘅鄉郊大宅入面，我哋準備咗各式各樣嘅錦囊幫大家，希望大家可以留到最後，成為勝利者。我可以透露嘅係得咁多，其餘嘅就要大家喺遊戲入面慢慢發掘喇！而家遊戲正式開始，鬼會數二十聲，之後就會行動，大家記住快啲匿好啦。」Sigmund Freud說完，咪高峰的嘈雜聲也戛然而止。
一時之間，房間只餘下九人沉重的呼吸聲，眾人都在消化剛才Sigmund Freud的說話。
「鬼會數廿聲……即係鬼係我哋其中一個？」高大帥哥頓時警戒着在場所有人。
年青人冷靜的說︰「我睇未必，我哋呢度都無人數緊，應該有其他人做捉，但問題係究竟做捉嘅有幾多人？而家可以肯定嘅係我哋咁多個都係隊友，應該要互相幫助，咁贏面先會大。」
此時，房間的門自動打開了，整棟大宅都迴響着數數字聲。
「一、二、三……」
「死喇，已經數緊，要快啲匿埋先得。」性感少女驚慌得奪門而去，無視了年青人組隊的建議。
「唔好意思，我認為同你哋一齊行動會更加易畀鬼發現，到時你哋盞佗手褦腳，我拒絕，係咁先。」西裝筆挺的青秀男說完也獨自離開了。
「玩捉伊因大家互相幫助？你係咪食懵咗呀細路？點幫？幫我擋隻鬼呀？一大班人一齊行動，咪更難匿埋，即係會一鑊熟呀！你識唔識玩㗎？我都係靠自己好啲。」粗魯男炮轟完年青人後亦跑離房間。
「八、九、十……」
「我都係。」、「等埋我。」、「我都行先。」……陸陸續續，各人也獨自離開了，只餘下失望的年青人和白髮中年男。
「十三、十四、十五……」
「後生仔，我buy你，我都覺得人多好辦事。」白髮中年男微笑着伸出右手，並道︰「自我介紹先，我叫阿樂，做鐘錶生意嘅。」他倆無視了數數字的聲音。
年青人被這突如其來的友善弄得有點手足無措，呆了數秒才反應過來，同樣伸出手回答︰「你好，多謝你信我，我叫……」他本想說出自己的名字，但頓了一頓後，還是說了一個家人對他的稱呼──「野仔」。
「我叫野仔，人人都咁叫我嘅，我已經十六歲，但無返工無讀書，係一個以天為幕，以地為席嘅旅人。」野仔驕傲的說，音量還不自覺的提高了，阿樂立即做一個安靜的手勢，他才意識到自己得意忘形了。
「二十。」
「唔好意思，」野仔壓低聲線道︰「不如我叫你樂哥，咁樣會親切啲，而且好似無咁有距離。」
「OK OK OK，不過我諗我哋要認真玩呢場遊戲，要揾啱啱Sigmund Freud所講嘅錦囊，同埋唔好畀鬼捉到，我覺得件事唔係咁簡單，我有啲不祥嘅預感。」樂哥凝重的說，同時指着安裝在房間內四角的攝錄鏡頭，野仔這才發現原來自己的一舉一動正被監視。
「仲有，鬼已經數完廿聲，而家應該開始揾緊人，我哋唔知鬼有幾多隻，我哋在明鬼在暗，所以要格外小心。我哋而家快啲揾地方匿埋先，順便留意吓沿路有無錦囊。」樂哥發號司令，帶着十六歲的野仔潛行。
他們甫走出房間，便立即被眼前的景物所震懾了。
樓高三層的鄉郊大宅是典型的超級豪宅設計，每層最少三千呎，而且裝修金碧輝煌。至於他們身處的是一樓，為甚麼會知道？因為大宅設計中間是中空的，可以看到每層的分佈，直到屋頂，而屋頂吊了一盞超巨型水晶吊燈，是每一層的主要光源。而他們身處的這層除了有一個大廳外，還有數間房間，二樓和三樓佈局大致相同。至於地下則是一個超級巨廳，還有廚房、洗手間之類，廳的左側是一堂有氣派的偽轉彎樓梯，即是頭和尾較闊，中間則較窄，而每層的左面都有一堂樓梯，是普通的那種。換言之，要上落不同層數，必定要繞一個大圈，走完全層，走經全部房間才可以。
「嘩！」野仔不自覺的流露出驚嘆聲，忘了自己的處境，一旁的樂哥立即把他拉回現實，他才回過神，尋找可以藏身的地方。
樂哥左右查看，眉頭也皺起來，但還是下了決定︰「向上走。」
+×+×+×+×+×+×+×+×+×+×+
另一邊廂，作為鬼的第十人，在數完二十聲後，已經步出了房間，逐間房去尋找獵物。
「又要捉人，又要戴住條唔識着嘅電子手環、又要戴住個遮啲唔遮啲嘅面具，真係好麻煩，點解偏偏要揀我做捉？」低沉穩重的聲線散發着冷靜沉着、深謀遠慮的氛圍，雖然一直在發牢騷，但還是敬業樂業的逐處搜尋。
「你只要捉哂咁多人就贏。」、「遊戲嘅全部規則就係咁。」、「唔好除面具畀人睇到，唔係你就即刻輸。」、「佢哋錦囊越少對你越有利，記住，錦囊係畀參加者，唔係淨係畀被捉嘅人。」、「你每捉到一個人都會有一個錦囊。」
Sigmund Freud的聲音一直在他耳邊縈繞、揮之不去，特別是最後一句︰「贊助人一致推薦你做鬼，唔好令佢哋失望，阿雲。」
「班人知我叫咩名，絕對唔係普通人咁簡單，又實驗又贊助人，再加上呢個場咁靚，睇嚟一定係好大型嘅實驗，班贊助人實好有米。」想着想着，阿雲突然得出一個結論︰「或者已經唔係第一次搞咁嘅實驗遊戲。」
邊行邊想的阿雲，放慢腳步巡邏，經過其中一間房間的時候，聽覺敏銳的他隱約聽到入面傳出物件移動的聲音，於是二話不說便用力踢開門，希望可以借此氣勢嚇倒房內的人，可是事與願違，沒有半個人在房內被嚇倒。
這是一間放滿洋娃娃，毛公仔和人偶的房間，小至扭蛋尺寸，大至等身大小的都有，整間房間目測擺放了不下三百個玩偶，堆得密密麻麻，要鑽進房內也有一定難度。
「匿喺間咁眼花繚亂嘅房，要揾都真係傷眼。」阿雲埋怨道，同時雙手拍臉幫自己提神。
雖然他口裏說不，但身體還是很誠實的去尋找。他用強而有力的臂彎將玩偶推倒在兩邊，毫不客氣的在玩偶上盡情踐踏。
「喂，我知你匿埋喺度㗎，快啲出嚟啦，唔好嘥大家時間，畀我捉咗就可以走人，唔駛再擔驚受怕。」阿雲對房內未知的藏匿者喊話，不過想當而然是沒有人回答。
他眼見未有回應，便繼續在玩偶上狂踩猛踏，經過一番蹂躪之後，始終沒有發現參加者。
「唔通我聽錯？無理由㗎，明明間房得四面牆同埋啲公仔，無理由咁都揾唔到。」他心裏納悶，但也不想浪費太多時間在一個人身上，於是便離開房間，到其他地方繼續搜尋。
+×+×+×+×+×+×+×+×+×+×+
「實驗終於開始，你預測個結果最後會點？你嘅hypothesis會唔會成立？」一個身穿實驗室袍的人問Sigmund Freud。
Sigmund Freud──一個三十出頭的男子，鼻樑筆挺，雙眼深遂，皮膚白皙的混血兒──微笑着回答︰「Who knows？不過Erik Erikson，我一定希望係significant㗎，但就係因為唔可以單憑我哋空口講白話，所以先要做實驗。Anyway，我哋都已經將所有varieties計算同控制好，無論最後個hypothesis係唔係significant，我哋都要喺實驗入面揾證據去support，所以實驗完之後我哋會仲忙，而家睇到啲咩有用就記低，到時就可以快啲搞掂。」
「Yes，sir！」監測室內的工作人員整齊回應。
Sigmund Freud笑一笑後，再次全神貫注在螢幕前，這裏有着整間大宅所有隱藏鏡頭的畫面，他邊看邊敲打鍵盤；而Erik Erikson也回到自己的座位上整理文件，同時還唸唸有詞說着些甚麼。