用AI圖寫故仔: 十一．合體技
海莉喺馬克懷中漸漸甦醒，發現自己仲喺俾熟識嘅男人抱住，露出安心嘅表情。眼前見到嘅景物同王座室明顯唔同，亦唔似獸王城嘅建築，令佢不禁覺得奇怪。
「主人，我哋而家喺邊度？」
馬克對呢個問題無一個答案，只係輕輕搖頭答一句：「做緊任務。」海莉亦無再多問，深明作為一個性奴隸，無論主人去邊都只有跟隨。佢哋沿住遺跡之中唯一嘅通道行，無幾耐就去到一個類似祭壇嘅地方，兩邊有兩個高大嘅獸人戰士石像，中間一張石枱上面放咗一個深紅色嘅令牌。馬克望真石像個樣，雖然造型有多少出入，但係擺明就係獸人王個樣嚟。佢記得任務個名就叫「獸人王的試煉」，唔通就係要同時對付兩隻獸人王？
咁樣嘅佈置，係人都知係陷阱嚟，只要一攞個令牌，果兩隻石像應該都係會開始攻擊㗎喇。不過馬克心諗無理由吖，無論個玩家幾勁，都無可能單挑獸人王呢種副本首領。即使扑完嘢入嚟嘅係最高等級嘅一男一女玩家，如果要有可能完成到個任務，咁呢兩隻嘢應該只可以係獸人王嘅弱化版先啱。但係即使係弱化版，情況對自己都好不利。一來係自己只有四十幾級，實力同最高嘅六十級仲有好大距離；二來係任務設計應該係由一男一女兩個玩家完成，而今次同自己一齊入嚟嘅海莉根本唔可以算係戰力，即係自己要一打二。
咁危險嘅戰鬥，當然可免則免。於是馬克又將遺跡由頭到尾調查一次，確定並無其他出口，似乎要離開就只有完成呢個任務。既然無其他方法，咁馬克亦只可以硬住頭皮踩入去呢個陷阱。佢先將海莉放低喺離祭壇較遠嘅地方，希望佢唔會捲入戰鬥，然後慢慢走向石枱，一邊牛咁眼注意住兩個石像嘅動靜，一邊小心奕奕咁拎起個令牌。
一如馬克所料，當佢將令牌放入腰包，兩個石像就有所動靜，表面開始裂開，變成兩隻活生生嘅老翻獸人王。馬克要同時對付兩個高等級對手，當堂面如死灰，做好俾佢哋虐殺嘅準備，同時不禁回想由開始到而家嘅經歷。由殺死同行獸人、強姦新手任務女精靈、俾人追殺而跳入獸王城、殺死傷兵而火速升級、最後同海莉扑嘢同入咗嚟呢個遺跡，全部片段喺腦海入面火速飛過，唔通人就死就係會係咁出現回憶？佢死咗重生之後，就會以等級五再開始，可能係重覆之前做過嘅嘢再升過級，又或者有啲嘢根本無機會再做一次，例如撞啱救返衛兵長咁。所有做過嘅嘢前功盡廢，諗落都覺得可惜，搞到馬克不禁嘆咗一口氣。
但係當馬克再仔細睇清楚果兩隻嘢，竟然令佢有啲意外驚喜。兩隻老翻的確係比一般怪難纏嘅精英怪，不過等級就．．．只有五十級？咁如果係兩個六十級嘅玩家嚟解呢個任務，豈不是簡單過食生菜？
原來「獸人王的試煉」呢個任務係遊戲早期就已經開發嘅，當時遊戲中玩家最高等級只有五十級，而兩隻翻版獸人王亦設定做呢個等級。之後個任務被擱置咗，所有設定就無再更新，即使個遊戲不斷改版，直到而家最高等級升到六十級，呢兩隻老翻嘅等級都保持喺五十級。話雖如此，四十六級嘅馬克如果要單挑一隻五十級嘅精英怪，憑住佢出色嘅遊戲技巧，只要小心一啲應該係無問題。不過而家要同時面對兩隻精英怪，雖然唔似對住六十級咁實死無生，不過都係非常凶險。
就講就到，兩隻弱雞版獸人王來勢洶洶咁發起攻勢。馬克知道自己等級同基本數值輸蝕，避免硬碰，一邊閃避一邊乘機反擊，同時留意走位免得俾兩隻怪前後夾擊。雖然攻擊對敵人無做成太大傷害，但係馬克觀察到佢哋嘅行動同攻擊模式都同真正嘅獸人王大同少異，所以大致上都預測到佢哋嘅行動。全靠係咁，馬克邊戰邊走，總算無中過大招。但係知道還知道，要避開晒兩隻怪嘅所有攻擊係無可能，佢係堅持咗成半個鐘之後，身上已經傷痕累累，血量亦剩低一半。而兩隻弱雞版獸人王亦都受咗馬克唔少攻擊，剩低血量比馬克稍為多少少，但係都係一半左右。一打二有咁嘅戰果，其實都真係幾犀利㗎喇。更大鑊嘅係馬克一下唔小心，俾兩隻怪逼咗埋死角，再無退路，只可以同佢哋硬拼。
正當馬克準備要殊死一戰主動進攻嘅時候，一塊石頭飛向其中一隻怪嘅膊頭，然後俾堅硬嘅皮膚彈開，雖然無做成任何傷害，但係吸引咗所有人嘅注意力。攻擊嚟自祭壇一角啱啱企返起身，身無寸縷嘅海莉。佢作為一個低等級奴隸角色，身上並無乜嘢攻擊技能，僅有嘅正正就係「投石」呢一招，當然無乜威力，只係夾硬叫做有一種遠距離攻擊。以海莉嘅等級，發出嘅攻擊對隻怪係完全唔會扣到血，佢自己都明白呢一點，只係見到馬克俾敵人逼到埋死角，情急之下忍唔住出手，希望幫自己主人逃過一劫。以佢嘅實力，如果真係引咗隻怪去攻擊自己，完全係等於自殺。咁喺情况下海莉居然仲肯出手相救，可謂有情有義，令馬克有啲感動。
事實上海莉嘅攻擊雖然稱唔上有乜嘢威脅，但係又真係幫咗馬克一把。趁住俾石頭打中果隻怪轉頭望向海莉嘅一刻，馬克發起獸人嘅「獸性猛擊」招式，全力劈向敵人。另一邊，海莉向隻怪掟出嘅另一塊石頭亦已經到達。兩面夾擊，會唔會殺隻怪一個措手不及？可惜呢隻怪雖然係弱化版，但係始終都係獸人王，並非一般嘍囉。佢好清楚海莉嘅投石根本就唔駛理，專注返同馬克嘅戰鬥，及時交叉雙手護喺胸前做出防禦姿勢。
眼見呢一招就要俾隻怪就咁化解，事情嘅發展又出乎所有人嘅意料。石頭同馬克手上嘅戰斧同時擊中隻怪，然後馬克面前出現「合體技：發動」嘅訊息，之前喺完成「無國界畜生」成就嘅時候習得嘅「？？？」技能，顯示就變成咗「合體技」。原本平平無奇嘅戰斧突然俾藍光包圍，砍擊嘅威力變得非常強勁，簡直就好似啲首領級怪嘅大招咁，喺斬斷隻怪雙手之後，仲發出一道帶住妖異紫光嘅氣勁，將隻怪嘅身體劈開兩半。紫光繼續向前直撲，將另一隻怪嘅一隻手都斬咗落嚟，扣咗佢大量血。
連馬克都俾攻擊嘅威力嚇咗一跳，乜呢招咁勁嘅咩？照計招式就算再強，以自己嘅等級都無可能會勁得咁緊要啩？不過諗點解可以慢慢嚟，而家都係解決咗眼前嘅敵人先，對手剩返一隻，血量又大減，戰況即時逆轉。馬克亦唔急於進攻，同隻怪保持一定距離，等到招式嘅冷卻時間完結，即刻再使出「獸性猛擊」，心諗呢次可以直接完場。
攻擊確實咁打中咗隻怪，但係無好似預期中咁一擊斃命，而係俾佢嘅護腕擋住咗，只做成少少傷害，威力同之前可謂差天共地。「點解呢？」失望之餘，馬克一邊拉返開距離，一邊思考點解攻擊力不似預期。最可能嘅原因，應該就係合體技喺第二次攻擊並無發動到，但係睇返個技能嘅介紹，又無講點樣先會發動到。根據字面嘅意思，合體技就係要同時攻擊？咁即係要同海莉一齊攻擊先可以？
呢啲問題唔會突然有人跳出嚟解答，得到答案嘅唯一方法就係試佢一試。馬克再等到招式冷卻完，大叫：「海莉，投石！」呢一下太突然，海莉先係呆咗一呆，先至反應到執起石頭掟向隻怪。馬克睇準石頭擊中隻怪嘅時間，先至向佢出招攻擊。果然，合體技發動嘅訊息又再出現，呢一擊亦化為強勁嘅大招，順利將隻怪一分為二。戰鬥正式終結，馬克亦得到相應嘅經驗值，又再升咗幾級，連海莉都因為有參加戰鬥，雖然貢獻比較少，但係都升到去三十級。
「完成任務『獸人王的試煉』」
「獲得重要物品『獸人王的印記』」
打低兩隻怪之後，完成任務同得到物品嘅系統訊就出現，而一陣紅光就由馬克嘅腰包之中散發出嚟，打開一睇，就係啱啱攞到嘅令牌所發出。當馬克想拎起個令牌，四周又再出現強烈嘅金光，消散之後，佢同海莉已經被傳送咗返到去原本嘅王座室。