用AI圖寫故仔: 五．入魂
馬克嘅下一步計劃，好快就付諸實行。《堀起》嘅開發公司，九賽軟體嘅會議室之中幾乎聚集晒全公司嘅高層，多數人睇嚟都有啲慌張。主席位上面坐住一個金髮後生女，兩個堅挺嘅乳房喺半透明上衫之下若隱若現，戴住一副黑框眼鏡。佢一面唔耐煩，目光所到之處，每一個人都低頭避開同佢對視。後生女終於忍唔住開口：「有無人可以話俾我知，而家情況係點？」
其中一個似乎係技術部門嘅男職員頭耷耷咁答佢：「總經理，遊戲系統受到來源不明嘅攻擊，主要係系統監察、反作弊、仲有追蹤同記錄玩家活動嘅部分無辦法正常運作，但係對玩家玩遊戲應該係完全無影響。」
「咁幾時可以修理好？」
「修理需要停止成個遊戲運作，將最近一日嘅系統同資料備份覆蓋返上去，要進行大約十二個鐘嘅緊急維修。另外玩家喺今日之內嘅進度，亦都會完全消失，變返備份果一刻嘅狀態。至於最好嘅時間，我建議…」
無等男職員講完，被叫做總經理嘅金髮女仔已經對佢破口大鬧：「Fuck you！ 十二個鐘緊急維修，仲要玩家成日進度無晒？你哋技術部廢㗎？上個月先至因為個角色名嘅諧音同高官個名差唔多，公司俾人嚴厲警告，我又俾股東詐晒型。而家又爆單咁嘅嘢，我點同上面交代呀？」佢越講越激動，對波亦隨住身體嘅動作而上下跳動，實在係一幅誘人嘅美景。只係會議室之中人人自危，都無人有心情去欣賞喇。
「總經理，唔係我哋唔想修補，而係個遊戲系統之中果一個核心部份有好多都係… 你都知道啦，係無原本嘅編碼而改唔到。」
金髮女仔聽完，靜咗一陣，但係開始目露凶光，明顯唔會善罷甘休。好在喺佢要爆發之前，另一個年紀比較大，似乎高級啲嘅男人先開口對之前嘅男職員講：「吉米，唔好講果啲嘢住，傾咗而家個問題先。如果唔做緊急維修住，咁個遊戲行唔行到落去？」
吉米低頭諗咗一陣，答返男人：「好似之前咁講，玩家嘅體驗係無影響嘅，不過就無辦法防止到玩家作弊，亦記錄唔到玩家嘅行動。如果遊戲有異常情況發生，亦都偵測同改正唔到。」
男人聽完點一點頭，跟住轉向金髮女仔：「露茜，咁或者可以等到下次有大型修改先至…」
露茜都係無等男人講完：「就咁啦！暫時乜都唔駛做，等個遊戲繼續行落去。系統受到攻擊呢個消息，要絶對保密。邊個講咗出去，就等炒同收律師信啦！」佢最後向吉米狠狠望咗一眼，大聲對全部人講：「你哋醒啲啦！停停停，停你條命呀？成日停攞鬼玩呀？都唔係撈嘅！」
開完會離開會議室嘅路上面，之前年紀比較大嘅男人拍咗幾下吉米嘅膊頭，示意支持。吉米無俾反應佢，只係細細聲自言自語：「Fuck吖嗱，咁鍾意fuck，終有一日，真係fuck到你嗌救命！」
露茜嗌救命就未聽到，但係發動呢次攻擊嘅馬克就真係嗌緊救命。攻擊嘅過程好順利，亦如同馬克所料咁令偵測作弊同記錄玩家活動嘅系統失效，但係癱瘓呢啲功能，並唔係為咗要搞到間公司一鑊泡。佢真正要做嘅，係趁監察失效嘅機會，偷偷咁修改遊戲中角色嘅連結，變成連去遊戲中其中一個世界級首領，終極魔龍騎士身上。之後佢就可以控制住呢個強勁角色，喺遊戲中將成個世界搞到天翻地覆。但係人算不如天算，馬克嘅連結雖然成功咗，偏偏因為輸入角色代碼嘅時候打錯咗一個字，搞到而家連結咗嘅唔只唔係世界級大佬，仲要係最普通嘅超弱獸人。
馬克望住遊戲中一身綠色皮膚嘅自己，角色資料顯示個名叫大舊炳，等級五嘅獸人，真係哭笑不得。攻擊帶嚟嘅機會只有一次，無辦法重新連結去第二個角色。要放棄呢個連結嘅角色，白白浪費呢次攻擊成功嘅收獲，又有啲心有不甘。
正當馬克猶疑不決嘅時候，遠處有兩隻同佢差唔多嘅獸人向佢大叫：「大舊炳，返去喇！」睇嚟係同馬克控制嘅大舊炳一齊出嚟打獵嘅獸人。馬克苦笑咗一下，心諗既來之則安之，一於就用呢隻獸人繼續玩，睇吓之後會發生乜嘢事啦。佢應咗一聲，就跟住果兩隻獸人走。
遊戲中嘅每一個非玩家角色，都有獨立嘅人工智能模組，所以可以對周圍嘅事作出反應，亦可以同其他角色對話。不過獸人嘅設定一般就唔算聰明，大概只係小學生程度嘅智能，不過每隻之間多少都有差異，而一啲首領級嘅獸人就會係同正常人類差唔多。馬克從兩隻獸人口中旁敲側擊，知道佢哋叫做大隻雄同大頭偉，而佢哋身處嘅地方係其中一個新手區嘅獸人村莊附近。馬克對呢一區並唔陌生，佢練各個角色嘅時候都探索過呢個地區好多次。不過作為一隻獸人去經歷，感覺又完全唔同。
今次佢哋三個係出嚟打獵，雖然遊戲中嘅角色係唔會餓亦唔需要食嘢，不過呢個係遊戲嘅設定，啲遊戲角色都係會跟住每日去打獵。馬克嘅角色並唔受呢啲設定影響，完全依照佢嘅控制行動，但係打獵對佢都有一個好處，就係殺死獵物可以累積經驗值，假以時日仲可以升級。呢個遊戲之中，不論係玩家定非玩家角色，都可以透過殺死怪物或者非玩家角色得到經驗值。最唔同嘅係，非玩家角色死咗之後復活，雖然會有少量嘅懲罰，但係等級同裝備都會保持返。而好似獸人呢類非玩家角色，俾人殺死之後，就會以起初嘅等級同裝備重生，例如變返等級五。所以玩家角色一般係越玩等級越高，而非玩家角色就唔會升到太多級。當然間中都會出現一啲特殊嘅情況，啲怪生存咗好耐未死過，升到超過果個地區應有嘅等級，不過通常最後會有高等級嘅玩家嚟消滅咗佢哋。
馬克一邊跟住大隻雄同大頭偉打獵，一邊開住角色介面睇大舊炳嘅資料。佢哋殺嘅都係啲等級一二嘅動物，經驗只有一滴一滴咁加少少。馬克好清楚，呢個遊戲要升級同儲裝備，最快一定係靠做任務同打副本。但係作為一個非玩家角色嘅佢，既無任務可接，又無得組隊打副本。唯一可以做嘅，就係不經殺怪賺經驗。
即使係用咁無效率嘅方法，遊戲中幾日落嚟，馬克都升咗一級，去到等級六。馬克以佢對遊戲嘅豐富經驗，每次見到有高等級嘅玩家同怪物出現，就趁早走為上著，一直都無死到。而佢身邊嘅大隻雄同大頭偉就無咁好彩，俾唔同玩家殺死又重生過無數次。每次重生之後，佢哋都變返等級五，亦無晒之前嘅記憶，又再開開心心咁去打獵，再俾人殺過。畢竟佢哋呢度係低等級玩家經常嚟儲經驗嘅地方，大隻雄同大頭偉真係死得幾密吓，好彩佢哋亦重生得好快。
去到六級嘅馬克，再殺周圍嘅動物已經幾乎攞唔到任何經驗。最適合獵殺嘅對象，恐怕係喺周圍出沒嘅新手玩家，但係去攻擊其他玩家風險實在太高，隨時會引嚟大批人馬圍攻。左望右望，都無適合嘅目標，馬克嘅目光突然落咗喺大隻雄同大頭偉嘅背後。兩隻等級五嘅獸人，正正係最好嘅目標，而佢哋對馬克又毫無戒備，要偷襲簡直易如反掌。根據遊戲嘅設定，馬克同呢兩隻獸人係屬於相同陣營，可以互相施加強化效果，而使出嘅範圍攻擊係唔會打到同陣營角色。但係咁並唔代表絶對唔可以打同陣營嘅人，只要選定對方作為目標，咁用單體嘅攻擊同技能係可以打到佢哋，有啲玩家有時亦會咁樣去攻擊相同陣營嘅遊戲角色。
「嘩！」大隻雄突然慘叫一聲，心口已經俾馬克嘅長矛刺穿。而一把短劍，就清脆俐落咁割斷大驚回頭嘅大頭偉喉嚨。毫不費力就解決咗兩隻同行獸人嘅馬克，感覺到力量由身體湧出，再打開角色介面，等級已經一下升到六。兩條屍已經消失咗，留低嘅只有少量銅幣同埋一啲補血用嘅初級草藥。收起戰利品之後，馬克要做嘅，就只有等佢哋重生。反正重生咗之後佢哋乜都唔記得，又可以輕而易舉咁偷襲佢哋，繼續升級。