情人節那天，我在衣櫃中找到我生命中的天使: 第二十三章：講野要有牙力，同埋小心啲

 
  小櫻同阿敬佢地早過我地搭摩天輪，咁所以佢地比我地先落到地面，之後佢地就喺到等我地，而冇幾耐之後我阿羨婷都落到嚟。
 
  「羨婷你地有冇事呀？咦點解你個樣好似咁眼訓既？」
 
  羨婷佢捽一捽眼睛，然後打一個呵欠。
 
  「唔…冇…冇事呀。」
 
  「既然係咁不如我地行過去灣仔嗰邊好唔好呀，聽講嗰到有倒數既表演睇架！」




 
  我望一望手機，原來已經十一點半，行得過去睇陣表演之後呢一年就咁要過去啦，唔知點解人大咗就覺得一年既時間真係過得好快。
 
  「要睇表演就要快啲啦，如果唔係真係冇咩時間架啦。」
 
  「好，一齊行啦，好唔好呀阿敬？嘻嘻……」
 
  「好…好呀……」
 
  阿敬佢講得愈嚟愈細聲，不過後從佢既表情嚟睇就知佢真係好開心；而小櫻既表情都出現咗一啲變化，佢對住阿敬笑嗰陣個樣變得好自然，同頭先睇完戲嗰時完全唔同，嗰種生硬既感覺完全消失咗。




 
  我地四個就係咁慢慢行去灣仔，沿途用咗唔知幾多分鐘細心欣賞街上既人同事，居然發現倒數晚上所睇到既居然比平日見到既形態更美，冇幾耐之後我地就到咗灣仔一個舞台附近喺到睇表演。
 
  到底個表演係咩單位主辦既我一啲都冇留意到，之不過見到台上面有班<超級大聲>既大聲幫成員喺到唱歌，我諗我大約都估到發生緊啲咩事。
 
  就喺呢個時候羨婷佢拉住我隻手。
 
  「阿傑，我好急呀，你可唔可以同我一齊去廁所呀？」
 
  吓？要我同你一齊去廁所？做咩呀？Gathering呀？你要搵都搵小櫻去啦，你要我呢個男仔去陪你把鬼咩？




 
  「但係我地就嚟倒數啦喎。」
 
  「但係我真係好急呀，嚟啦，陪我去啦。」
 
  呢個時候小櫻佢擰轉頭望過嚟。
 
  「一係咁啦，我陪你去好唔好？反正我都係女仔，我地一齊去會方便啲呀嘛。」
 
  小櫻就識Do啦，都唔知羨婷佢喺到諗咩既。
 
  但係點知羨婷好快向小櫻佢伸出五隻手指，扮到成個metalic man咁。
 
  「唔洗啦，呢到咁多人，萬一你同阿敬走散就大件事啦……」
 




  「點解我同阿敬走散就大件事呀？你地都唔可以走散架。」
 
  小櫻唔知我地今日嚟係幫阿敬表白架，唉，你呢個羨婷又再次口多多講錯野啦。
 
  「咁…呀…呀……總之我唔要你呀，我要同阿傑一齊去！」
 
  小櫻聽完羨婷咁拒絕之後唔單止冇唔開心，反而嘴角好似有一絲上揚既動靜，不過咁又係既，唔洗陪羨婷佢傻有邊個會唔開心先得呢。
 
  「咁…好啦，你同阿傑都要小心啲呀，記住要快啲返………」
 
  「好呀，我去廁所啦，拜拜。」
 
  就喺小櫻都未講完句野既時候，我就比羨婷佢拎走咗，冇錯係「拎」走咗，我完全冇反抗既地步。
 
  羨婷佢一路拎住我，隨住人流咁行下行下…行到去一個花槽後面。




 
  「喂，羨婷你唔係諗住喺花槽到解決下話？」
 
  羨婷佢摸一摸我個頭。
 
  「我又邊有可能會咁做喎，主人你又喺到講笑啦，嘻嘻。」
 
  「咁你嚟呢到做咩呀？」
 
  「哎呀，點解主人你咁都要諗架，如果你要同……同你中意既人表白嗰時會唔會希望比識既人喺旁邊望住呀？」
 
  「咁又唔會……但係咁又關你嚟咩事呀。」
 
  羨婷佢冇再摸我個頭，之不過佢就用手指細細力彈咗一下我個額頭，然後嘟長個嘴望住我。
 




  「點解你要彈我呀。」
 
  「主人你咁遲鈍真係要罰下你先得呀！如果我地兩個喺阿敬身邊，佢又點可以表白呀？」
 
  呀……聽完之後我都不得不佩服自己居然可以咁遲鈍…………
 
  「咁，我地而家喺到有咩可以做呀？」
 
  「冇架啦，我地一於喺到睇下事情會發展成點囉，呢個時候我地幫唔到幾多架啦。」
 
  呢一刻我同羨婷兩個就好似班狗仔隊咁企咗喺花槽後要，沿途唔少人都用好奇怪既眼光望住我地兩個。不過咁又係既，好地地唔企喺舞台附近，反而要企喺呢到，我地比人既感覺絕對係相當有嫌疑。
 
  隔咗一陣之後，大聲幫既人都唱完歌，主持人就喺舞台既旁邊慢慢行出嚟。
 
  「各位朋友大家好，我地今晚既表演都係時候告一段落啦，咁有請我地既嘉賓上一上台，一齊主持我地今晚既個倒數儀式。」




 
  講完之後小櫻睇落有少少驚，然後捉住阿敬隻手。
 
  「點算呀，我地就快要倒數啦，羨婷佢地仲未返嚟喎，佢地會唔會發生咗咩事架？」
 
  「冇事掛，有阿傑佢陪住羨婷呀嘛。」
 
  「咁又係，真係點都估唔到最後就得返我地兩個人喺到倒數添。」
 
  「係…係呀，倒…倒數………」
 
  「你做咩紅都面曬呀？倒數啫，有咩好緊張呀？定係……你有咩陰謀？」
 
  「陰…陰…冇…我…我……我冇陰毛……」
 
  講完之後，今次到小櫻佢面紅。
 
  「阿敬你好衰架，講埋啲咁既野，我識錯咗你呀！」
 
  「唔係呀，我係想講…我…我冇陰謀喳，真係冇架。」
 
  「嘻嘻，我講笑喳，你唔洗咁緊張架喎。」
 
  呢個時候，啲嘉賓已經全部迫曬上個台到，準備倒數。
 
  阿敬佢轉身面對住小櫻，然後用手捉住佢兩邊既膀頭，小櫻面對阿敬既突然既行為明顯有少少被嚇親。
 
  「小櫻，其實我在啲說話想同你講。」
 
  嘩，估唔到準備咗成晚，終於到咗呢個最重要既時刻啦！
 
  「咩…咩事呀？」
 
  「就係呢……呀…呀……」
 
  『各位準備好啦嘛，咁倒數啦喎，十！』
 
  「我想講既係……」
 
  『九！』
 
  「即…即係……」
 
  『八！』
 
  阿敬佢個樣睇落真係好緊張，成個人震曬不特止仲要仲好似開始喺到流汗，不知不覺間連喺旁邊睇既我都緊張埋一份。
 
  『七！』
 
  『加油呀阿敬，比啲自信自己，你得架！』我同羨婷send咗呢句說話鼓勵阿敬。
 
  『六！』
 
  阿敬佢聽到之後深呼吸，之後明顯變得冷靜返落嚟，然後再次望向小櫻。
 
  『五！』
 
  『小櫻……』
 
  『四！』
 
  「其實我……」
 
  『三！』
 
  「一直以嚟都……」
 
  『二！』
 
  「好中…中……」
 
  『一！』
 
  「中意……好痛呀，我咬到條脷……」
 
  『零！ Wow…………好開心呀…… Happy New……』
 
  唔係掛？！點解表白咁大件事會因為咬到條脷而失敗架？！


-----------------------------------------------------------------------------------------------------------------------------------------

下一章就大結局啦, 唔知大家覺得呢次呢個外傳寫成點呢? 比啲意見或者有冇想睇到咩劇情呢？
如果我再寫外傳既話大家記住要支持我呀
中意呢個故就share比朋友睇啦, 記住要like 我facebook page呀:)