情人節那天，我在衣櫃中找到我生命中的天使: 第十章：做人應該要大膽啲

 
  小櫻你係咪蹺錯人呀？比你蹺住嗰個應該叫阿敬，而唔係我呀！
 
  「唔洗咁急啦，慢…慢慢行咪得囉，你唔…唔…唔…好蹺住我啦。」
 
  嘩，估唔到我而都變到成個阿敬咁，講起野上嚟都變得口窒窒。
 
  「要我放手？點得呀，唔咁做既話阿傑你實會顧住同羨婷傾計行得好慢架啦，唔好講咁多啦，行快啲啦，嘻嘻。」
 
  你嘻乜鬼呀？！放手啦好唔好呀！死啦，而家比你蹺住行，我完全feel到身後面出咗一股好大既殺氣，不過唔洗諗都估到呢股殺氣應該係阿敬佢發出嚟。




 
  到底點做好呢……？有啦，我知道羨婷喺呢啲時候一定會幫我既，雖然我唔知你到底會點做，今次真係要靠你啦！
 
  可惜，乜野叫做「事與願違」，睇嚟……我就係好體會到呢句說話既人。
 
  正當我滿心歡喜擰轉頭望住羨婷，諗住佢會幫我嗰陣，我見到既，居然唔係平時可愛既佢，而係一隻魔鬼，而且而家既羨婷望起嚟比爆咗seed既佢更加恐怖，原來頭先感覺到既殺氣就係由佢發出嚟。
 
  「羨…羨婷……」
 
  嘩，我只係輕輕叫一叫你個名啫，洗唔洗咁樣睥住我呀，係唔係我又做錯咗啲乜野破壞咗你既完美既表白計劃呀？我同你道歉呀，但係你可唔可以救咗我先呀……




 
  雖然我唔係嗰個乜野俄國戲劇大師史坦尼斯乜乜乜既學生，但係我都盡我全力做出一個求救既表情。
 
  「哼！」
 
  ，羨婷佢「哼」完之後完我之後就刻意咁望向第二到，理都唔理下我，完全冇想幫我既意思。
 
  唔係既，羨婷身邊仲有阿敬呀嘛，搵佢幫手咪得囉…………大佬你洗唔洗睇落咁灰呀，好似戰敗到燃燒炲盡咁，我同小櫻佢冇野架喎，係佢無啦啦發神經拖我走啫，你快啲嚟救我啦。
 
  我再次做出一個求救既表情。




 
  可惜，佢完全冇理過我。
 
  就喺冇人肯救我既情況下，我帶住無奈既心情被小櫻佢帶到去附近既一間薩利呀餐廳。
 
  「你地好，請問你地係咪四位呀？」
 
  「係呀。」
 
  「但係我地而家冇曬四人位喎，又或者你地介唔介意分開坐呀？」
 
  「咁等我諗一諗先啦……」
 
  正當我諗住擰轉頭問下阿敬同羨婷有乜野意見既時候，羨婷佢已經行到個店員面前。
 




  「分開坐得啦。」
 
  羨婷講既時候語氣好明顯比平時變得好冷淡，睇嚟佢仲係嬲緊。
 
  講完之後，羨婷一手將我拉開，去到店入面一個雙人位，而我地坐既雙人位就係喺阿敬同埋小櫻佢地兩個坐既雙人位隔咗兩三張枱既旁邊。
 
  「做…做乜野呀羨婷？點解唔一齊坐呀？我地又唔係好急住食野，慢慢等張四人枱唔好咩？」
 
  「…………」
 
  我講完之後，羨婷佢一句野都冇講，而且望都唔望我。
 
  死啦，佢唔係仲嬲緊我破壞咗佢個計劃下話，我都唔想架。不過見佢嬲成咁又真係好少見，都係唔好理咩事，道歉咗先算。
 
  「其…其實我都唔係心有架，係…係…係小櫻佢無啦啦要蹺住我架喳，我真係冇心破壞你既計劃架……」




 
  今次講完之後，羨婷佢終於肯望住我，可惜呢件事絕對唔值得高興，因為咁只係惡夢既開始。
 
  「我…我唔想……」
 
  「你唔想乜野呀？」
 
  「我…我唔想主人你同小櫻佢行得咁埋呀。」
 
  「對…對唔住呀，咁……」
 
  老實講，除咗道歉之外我都唔知應該做乜野好。道歉之後，我地兩個都耷低頭，接住落嚟既就係一陣子既沉默。
 
  「其…其實我冇心咁惡同主人你講野架，之不過我自己都唔知點解，總之頭先我見到主人你同小櫻佢行得咁近既時候，我成個人就變得好唔舒服。」
 




  羨婷佢講完之後咬住下唇，對眼睛好似有啲淚光，好似就有啲想喊咁。
 
  「但係我都唔係有心既，我又點會諗到小櫻佢會無啦啦蹺住我先得架。」
 
  「咁主人你可以鬆開手架嘛……」
 
  「但係件事發生得咁突然，我…我……我都唔知應該點反應好……」
 
  羨婷聽完之後心情好似變得更差。
 
  「最多我以後大膽啲去拒絕人啦，你唔好嬲我啦好唔好？」
 
  「主人你…你係講真既……？」
 
  「嗯，我講真既。」




 
  羨婷聽完之後面上完再次出現返好耐冇見到既笑容。
 
  「咁好啦，見到主人你咁認真我就原諒你啦。」
 
  「我以後都會小心唔會阻住你既表白計劃架啦。」
 
  聽到羨婷佢話肯原諒我之後，我開心得滯口快快講咗呢句說話出嚟，羨婷佢聽到之後嘆咗一口氣，然後做出一臉無奈既感覺。
 
  「唉，我覺得主人你有時真係遲鈍到令人好嬲架。」
 
  「吓，唔係掛，我點遲鈍呀……」
 
  「不過呢……咁先至係主人呀嘛…嘻嘻……」
 
  「都…都唔知你講乜。睇下阿敬同小櫻佢地點樣仲好啦，你唔係話要幫阿敬佢表白架咩？」
 
  羨婷向我微笑之後就耷低頭，然後拎出佢部手機，身邊再次發出一股殺氣。
 
  「嚟啦，就等我地一齊幫阿敬手追到小櫻啦，哈哈哈……」

-----------------------------------------------------------------------------------------------------------------
我諗個故嚟到呢到都應該差唔多一半
大家覺得點?

記住覺得好睇既話就要share比朋友睇同埋追稿呀 :)