情人節那天，我在衣櫃中找到我生命中的天使: 第十四章：今次唔係要我打下話？

 
  明明頭先同羨婷一齊行過嚟海邊既時候係話咁快就到，但係點解宜家我就算坐的士嚟啲時間都好似過得好慢咁既？呢種咁既反差真係今宜家既我愈嚟愈心急呀。
 
  落左車之後，我一路係咁跑返過去頭先同羨婷一齊坐底既長凳嗰到。今次返到嚟呢個海邊，一樣見到好多情侶好似頭先咁不停喺到親熱，宜今次我又再次成為左呢到既異類，就係得番自己一個人。
 
  喺我大約跑左十分鐘之後，估唔到我又見到頭先嗰班去死去死團喺到搞破壞。唉，就算你唔抵得人地有另一半都好都唔好咁無聊喺到騷擾人地啦，咁同啲小學雞又有乜野分別呀？簡直好似子華話齋，自己串魚蛋冇左一粒唔係問題，但係就要人地都要少一粒。情人時做埋啲咁既野，你地啲人生點數一定比我仲少，唔好講咩要高級啲既天使嚟幫你，就算係最低級既見習天使都唔會嚟揾你地囉。
 
  「大哥，佢咪頭先打到我地飛起既女人，佢宜家得番自己一個人喺張長凳到訓覺喎。不如……哼哼……」
 
  「你個死仔包真係中意一日到黑都諗埋啲衰野架喎。頭先嚇到我地冇曬面，我當然要用我個拳頭回返個禮比佢啦，今次就要你知味道。」




 
  又打人？！唉，今次呢對情侶都算可憐啦……唔係喎，佢地頭先講到話見到個打到佢地飛既女人，唔通就係講緊羨婷？！
 
  我轉個頭一睇，我的媽呀原來真係佢！點解你可以一日到黑都可以喺到訓覺架？唔通你係一個有渴睡症既天使嚟既？如果佢再唔走既話真係會比呢班呀叔打架啦，我宜家就立即嚟救你！唉，真係有冇搞錯，又話嚟幫我，點知成日都要我幫番轉頭。
 
  「停手呀你班呀叔！」
 
  「大哥你睇，係頭先嗰個後生仔喎。」
 
  「咩話，又係你？不過唔洗怕，其實佢根本一啲都唔打得，佢頭先都係因為佢女朋友先至冇事啫。唔洗理佢既，等我打完佢女朋友一身先至理佢啦，如果唔係我點都唔會下到啖氣。」




 
  「如果你真係想打佢既話就打我先啦。」
 
  「扮英雄下話，係咁等我一拳打到你訓底再打你女朋友啦。你精精地就唔好避開我呢拳，你接得住既我就當你真係英雄。」
 
  之後佢用力咁一拳打埋嚟，雖然我真係好想扮到英雄咁一手接住佢個拳頭，但係講到明我只係扮架喳，叫我點接呀？接唔住就係接唔住架啦！真正「精精地」既人一定會唔會聽你講硬食你個拳頭囉。
 
  「死仔，夠膽避開，可惡。我話你知你今晚死硬呀。」
 
  假如我望住你打傷羨婷既話我真係會後悔過比你打死呀！比你打又有咩好怕呀，最多咪同你死過！




 
  不過講就係咁講，你要我正面同你打過根本就冇可能，你個肚就六塊朱古力，我個肚就溶成一大塊朱古力，淨係睇個相都輸曬啦，所以我一定要智取。無錯你班呀叔個個都練到好大隻，但係唔好忘記每個男人都會有一個部位係點練都唔會練到既……哼。
 
  我首先吸左一大啖氣，然後一下就踢過去佢地大肶中間。你地嗰到可能喺床上面就大殺四方，但係我踢既呢下簡直係直搗黃龍，唔係，係直搗巨龍呀？
 
  點呀，你班呀叔怕未呀？但係…咦，感覺咁怪既？
 
  嘩，今鋪真係又要食屎啦，我一味顧住望佢下面嗰到，完全唔記得左佢對手既存在，結果佢喺我就快踢中嗰時兩隻手捉住我隻腳，然後將我成個人舉起左。不過唔緊要，你都唔好忘記我仲有第二隻腳可以用！我踢！喊出嚟，我又唔係長短腳，既然我比佢捉住嗰隻腳都踢唔到佢，第二隻又點會夠長踢到先得架…不過唔緊要，你都唔好忘記我仲有第三隻腳……算啦，我知自己宜家有啲急躁，一時衝動失去左理智，當我最後一句野冇講過。
 
  「後生仔，你頭先唔係好型架咩？反擊啦？做咩唔反擊呀？哈哈哈！」
 
  你估我唔想反擊咩？我打得中先得架！唔係喎，點解我要咁堅持要踢佢呢？打得中咪得囉！