情人節那天，我在衣櫃中找到我生命中的天使: 第五章：高級餐廳？我唔想去囉……

 
  「咩…咩扮呀？你唔抵得我女朋友靚過你嗰個呀。」
 
  痴孖根，我一句聲都未出你就發現我揾人嚟扮女朋友，家豪你條死仔你到底有寫輪眼定白眼呀？得既話我真係想揾個螺旋丸一野車落你個頭到呀。
 
  「咁靚女既人點會去揾你呀，係都做左我女朋友先啦！你個樣咁薯，我係女都唔會揾你啦，呀……」
 
  聽到呢到，羨婷將我隻手蹺到愈嚟愈緊，我諗佢應該唔太中意聽到啲咁既說話。不過識左家豪咁耐又點會唔知佢係中意講笑嗰type人嚟呢。正當我諗住叫佢都講夠，係時候要停一停嗰陣，佢女朋友阿芝已經用左一招雷切揸住左佢下面，在場包括我在內既所有男仔真係見到都覺得痛。其餘啲女仔見到都忍唔住笑左出嚟，而羨婷蹺我隻手都冇再蹺得咁實。
 
  「我講…講…下笑…之嘛，點靚都…都唔夠你靚啦，我地…快啲…一齊去食自助餐啦，好唔好？」


 
  佢女朋友即刻鬆左手並且好開心咁抱住佢，個頭挨左落佢個膊頭到，sweet到不得了，而家豪就輕輕咁嘆左口氣。唉，呢啲就叫一物治一物啦……
 
  成個約會一共有四對情侶，除左我同家豪呢兩對之外，仲有呀軒仲有佢女朋友芷荺，加埋德仔同皓宜，咁當然其實得我呢對係假啦。
 
  聽講話家豪喺灣仔book 左一間好高級既餐廳，想我地有個好好既地方傾下計喎。我地由SOGO開始出發一路往灣仔方向行，中途有講有笑。
 
  咪住！高級餐廳？！我平時最多咪只係去下老麥食嗰啲廿一蚊餐，如果你話去大快樂食既我都覺得唔抵囉，宜家你仲要用我講高級餐廳？我只係個平凡大學生咋，你叫我點去呀？等我睇下個銀包先吓……兩…兩百蚊？！如果真係高級餐廳既我比小費都唔夠啦。死啦……嗰頭啱啱先諗掂方法唔洗比佢地笑，呢頭實比佢地串我連少少錢都比唔起啦。
 
  「主人……呀唔係，主人講過出到嚟要叫全名，咁……阿…阿傑，你做咩咁驚呀？係唔係有咩問題？我可以幫你架喎。」


 
  「我唔多夠錢呀，去到高級餐廳既我一定比唔起啦。如果可以轉第二間平少少既就好啦，一般百零蚊既我都OK既。唉，今次真係難搞。」
 
  「唔緊要喎，呢件事一於交比我。」
 
  「交比你？就算係你又可以做到啲咩呀？唔通你可以炸左間餐廳佢咩？咁做相比起取消今次既聚會需要改動更多人既記憶喎。」
 
  「嘻嘻……」
 
  之後羨婷佢好似口噏噏咁講左一埋野，但係太細聲我聽唔清楚，到底佢想做咩呢？喂天使呀天使，我真係好細膽架喳，你唔好淨係喺到笑啦。


 
  兩分鐘之後，家豪個電話響起，佢聽完之後成個人呆左咁望住我地全部人。
 
  「啱先嗰間餐廳既負責人打比我，話間餐廳頭先突然斷左電，所以我地今晚冇得去嗰到食野，要揾其他地方食啦……」
 
  唔係咁好彩下話，真係有得轉地方？！呢鋪真係天助我也。不過唔係喎，到底呢件事係單純既巧合定係同頭先羨婷口噏噏嗰埋野有關呢？
 
  我轉過頭望向羨婷，淨係見到佢打左個喊路，好似想訓咁，之後再次笑笑口咁望住我。
 
  「咁樣咪搞掂囉……嘻嘻。」
 
  喂……發生咩事呀……有冇人可以答下我呀？