情人節那天，我在衣櫃中找到我生命中的天使: 第二章：呢個光脫脫既女人就係天使？

 
  「叮咚、叮咚、叮咚……」
 
  唔通真係今日真係黑成咁？萬一屋企人問點解有個女仔既唔通我真係答佢地係衣櫃認識架咩，講都冇人信啦。不過由得個門鐘係咁響都唔係辦法，到時屋企人入到嚟見到我實會問我點解喺屋企到都唔開門，之後又會煩我一大輪。唉，呢次真係開門又死，唔開門都死。
 
  無奈我最後都係揀左去開門，反正遲早都要解釋點解會有個女仔係到，早啲開門會冇咁麻煩。不過我平時開門都中意望下個防盜鏡先，就算有時明知係屋企人返嚟我都會咁做。唔知宜家係爸爸定媽媽返嚟呢，等我睇下先吓。咦，係個速遞員嚟喎，但點解個速遞公司好似咁少見既？
 
  「你好呀，請問羨婷係唔係到呀？佢訂既貨嚟左啦。」
 
  「羨婷？我地屋企冇個咁既人喎。」




 
  「冇…？冇可能架，佢明明同我講到左架喎，唔通……」
 
  「唔通？」
 
  之後呢個速遞員深深咁吸左一口氣，示意我要合埋耳仔，正當我剛剛將手放到係耳仔邊既時候，佢變到好似電視入面嗰啲收樓佬咁大叫：
 
  「羨婷！你仲想訓到幾時呀，你個主人都起左身啦！」
 
  主人？咩事呀？乜屋企嚟左一個新既女嫞咩？點解屋企人一啲都冇同我講架？定係爸爸臨老入花叢包左個女人係屋企到咁猖狂呀？救命呀，宜家成個腦塞滿曬形形色色既問題，有邊個可以打救我？




 
  「冇事既，主人尋晚係咁喺間屋入面行嚟行去，行到今朝八點先訓，邊有咁早起身呀？」
 
  唔係呀化，做咩有把咁萌既聲係我間房到傳出嚟既，唔通我開左唔知邉套H動唔記得熄？又唔會呀，上網下載嗰啲全部都係日版嚟，邊會有角色講廣東話呀，仲要講到咁純正添。我望向我間房個門口，頭先衣櫃入面嗰個女仔斯斯然咁行出嚟，好似仲未訓醒咁。佢睇到我企左係佢面前，當堂嚇到O左嘴，仲要碌大隻眼傻左咁望住我；而我望見一個光脫脫既女仔由自己間房行出嚟之餘仲要企正係我面前，我都一樣碌大隻眼傻左咁望住佢。我地倆個真係紅都面曬仲要一句聲都冇出，個氣氛真係尷尬都爆囉。
 
  「兩位青澀既少男少女，你地玩夠未鬥望未呢？羨婷你好同我快啲過嚟拎走你個包裹呀！」
 
  睇嚟連個速遞員都頂唔順我地咁尷尬既氣氛發左火……咪住先，睇見啲咁既場面你唔覺得驚訝架咩？話曬呢間屋入面得一個男仔同一個乜都冇著既女仔喎！
 
  「對唔住……」




 
  之後呢個應該係叫羨婷既人講左對唔住之後就走左去速遞員身邊拎左個包裹之後閂埋門。呢鋪真唔得掂啦，宜家孤男寡女共處一室，仲要唔知點解女方一開波就唔見左件衫，死啦死啦。到底呢個女仔邊到嚟架，點解我一啲印象都冇既？唔通我尋晚去左飲野飲大左結果斷曬片，連自己帶左個女仔返屋企都唔知？但我尋晚唔係只係喺屋入面不停咁行咩，邊有可能帶到女仔返嚟呀？唉唔理啦，都係直接問佢啦。
 
  「係呢，其實你係邊位呀？」
 
  「哎呀，我居然唔記得同主人你自我介紹添，我就係隸屬天使隊分部香港第二小隊既見習天使 -羨婷。」
 
  「吓，你就係天…天…天使……？！」