𣎴能愛上的星級女神（完）: 鴻門宴（下）

「Candice姐，你都要多多指教～」我也對Candice說，她立刻生氣了：「姐你個頭啊！」而程心在旁偷笑。

「程小姐，向生拍戲嘅時候你係咪都會全程跟喺身邊？」家姐忽然這樣問。
「我會盡量幫佢手。」
「咁程小姐會唔會介意向生拍激情戲？」May姐這句更加詭異，程心還一面迷惘地答：「冇咩啊？」反問我：「向瑾瑜你介唔介意？」我感到不對勁，立刻澄清：「其實…程小姐同我…」程心看見我向她打顏色，立刻打岔：「向瑾瑜同我其實係中學同學黎，我同佢係…」
「閨密…」我打岔，她立即反過來補充：「兄弟，好兄弟。」我點點頭，喝了幾口水。
「兄弟，你飲咗杯水。」程心拉住我手，我把口中的水噴了出來，不小心噴到她臉上。
「你哋真係冇嘢？」家姐一臉懷疑地望向我。
「冇呀。」我和她異口同聲。
「但你地…」




「事到如今，我唯有坦白…」程心擺起一副嚴肅的樣子，我一直忍著笑。「我…係les嘅。我…已經有老婆啦。」她坦白的神色，還有那個心虛的偷笑。只見Candice和若嵐彷彿也明白了什麼，Candice和若嵐也差點笑出聲音。

「唔好意思呀程小姐…」「Sorry啊程小姐。我哋會幫你保守秘密。」相信家姐和May姐因為信息量太大太震撼，已經成功「輕機」。始終他們不知道我其實是女生，但實在太好笑。

令人緊張的兩大經理人「鴻門宴」，差不多到尾聲，我上了個洗手間。剛從洗手間走出來，Candice在男廁門外等我，左右留意有沒有人，低聲告訴我：「有件事想同你講，一陣間方唔方便？」宴會完結，我把Candice邀請到我家商量。

「坐啦。我沖杯茶比你？」我到廚房沖茶給她，她坐在沙發，左顧右盼。「點呀Candice姐？我自己一個住，你唔會搵到d咩架喎。」我取笑她。
「可唔可以問你一個問題？」
「問啦。」
「你同程小姐真係好朋友咁簡單？」




「緊係啦！點解咁問？你覺得我哋似有嘢咩？」我把茶端到茶几，再回廚房拿切好的檸檬片給她。「可能係我多心，不過你好朋友唔止當你好朋友咁簡單。」她這句讓我有些招架不住。
「點解咁講？」我認真問。
「我唔係有心八卦架。係我去廁所嘅時候，聽到佢前男友定前女友同佢嘅對話…」她有點不好意思，但又認真地分析。
「咪住先…前男友？」我質疑著。
「有咩問題啊？」Candice邊呷茶邊問。
「咁你聽到啲咩啊？」
「你好朋友話：我同邊個一齊唔關你事，你唔好再打嚟搵我，我哋分咗手架啦。係呀，我係鍾意向瑾瑜咁又點？都唔關你事。Charles，你唔好再打比我啦。係咁啦！」她把對話告訴了我。Charles…正是她IG那個男生，也是上次他家中眼神對我非常不友善的那個男生。「唔會掛？」想起上次我受了傷她很緊張地來醫院找我，但聽到若嵐很快會過來，仿佛臉色也難看了。

「咁…佢既然冇同我講過，其實我應該當冇事？」我還是不敢相信，我再反問Candice。她仿佛不想回答我，但還是有點兒生氣：「向瑾瑜你成日拖拖拉拉，你知唔知女仔青春有限架。你唔上唔落、對個個都曖曖昧昧咁，你有冇諗過你好朋友點諗架？」訊息量真的太大，我實在消化不來。我當程心是最好朋友，程心居然分了手也沒告訴我，而且Candice居然會因為這件事發這麼發脾氣……我實在消化不良。





「我唔係想多管閑事。無論件事係點，我覺得你都應該同你好朋友傾吓。感情嘅嘢冇得勉強，所以更加唔應該拖。你對萬若嵐都係，真係想同人地一齊，就唔好拖泥帶水。如果唔係，你唔好怪我出手。」Candice的語氣變得冷淡，程心這件事可能令她想起什麼，她臉上還是藏不住有種失意感。