𣎴能愛上的星級女神（完）: 正式出道

終於到了星期一，電視台的總經理Kevin約了我親自到他辦公室，市場部和藝員部的主管也在，而家姐和若嵐也跟我來看看合約上有什麼可以配合。

「向生，聽萬小姐提過，你哋以前有一齊玩drama同舞台劇？你本身對呢方面係咪都會有啲興趣？」果然和我以前的客戶一樣很直接，和做生意一樣不轉彎末角。
「我大學嘅時候都仲有玩舞台劇，不過都唔係做演員。」我也坦白相告。
「呢方面向生唔使擔心，如果向生你都有興趣拍劇拍廣告，我哋都可以簽一個部頭合約試吓市場反應。上次王監製應該有提到，因為廣告商想冠名贊助同搵你做代理人，我哋商量過之後決定直接開一套劇比你做男主角，Candice同若嵐會係女主角。我哋編劇部之前有一套新本，目前已經修改緊，應該好快會有初稿。廣告客戶嗰邊遲啲會再搵你傾傾。」Kevin補充：「另外雖然向生未係我哋旗下嘅藝人，不過另外仲有兩三個廣告客戶希望搵你做廣告宣傳代言，所以係marketing同PR方面如果向生仲未有經理人，我哋市場同公關部嘅同事可以幫你跟一跟。合約方面，我知道你目前係若嵐經理人，我哋呢邊會同詩姐商量吓你嘅schedule。你有冇咩問題？」居然已經有這麼周密的打算，果然是緊貼熱潮的娛樂圈。不過我相信最大的原因，應該還是要賺廣告商的錢才會找我，不然一定不會這麼大費周章。

「OK 我可以試下。」對我來說最吸引當然是廣告費，如果說工作不為金錢那就真的太脫俗了。而且，只需要拍一套劇就更合我心意，我還可以趁機了解娛樂圈的市場及公關工作。然後合約便交給家姐和他們商量，始終工作上時間會撞。

簽合約這個好消息，我把消息告訴程心。「程心！有個消息要話你知！」我傳訊息給她，她雖然在工作，但也立刻回覆：「點啊向瑾瑜？」
「電視台簽咗我拍一套劇集，仲有廣告。」




「你講真㗎？」她錄音的聲音比我更興奮。
「當然！你終於唔使再擔心我會財赤啦！」
「咁睇來你好快可以請我食大餐～」
「緊係啦！」
「我做埋嘢先遲啲再搵你。」
「好啊！」其實跟她報消息時說起財赤，我偏偏又想起那個名牌愛好者朱浩婷。這個女人買那麼多包包，她的廣告費和演出費一定很和味。

「瑾瑜～恭喜你出道！」若嵐和我吃午飯替我慶祝，但我還是有點不自在：「其實你都知我都係唔想轉行，而家無啦啦要我由PR轉做Artist，其實我真係一啲心理準備都冇…」
我一口氣把餐前酒喝下肚，她仿佛也看得出我的不自在。若嵐把椅子搬近我，拉開我手上的酒杯，有些懷疑自己地問我：「其實我嗰陣係咪唔應該搵你做經理人？」
我搖搖頭：「點會呢？同你一齊做嘢，我覺得好開心，而且你家姐教咗我好多嘢。」




「係咪架？」她依然笑得那麼可愛。主菜到了，是松露墨汁意粉。
「緊係啦！不過咁講，上次同你做Drama都成十年前，我都好期待同你再合作。」
「呢個又真，同過咁多男主角拍劇，我第一次咁期待呢條主線…」她邊吃邊偷笑，在我面前吃得那麼放肆，墨汁弄得臉上和胸前也有。雖然確實連我也很興奮，不過她真的特別誇張。