係同屋室友?定係同居密友?: (S3)60. 握手言和

某星期六，苗學翹跟佢自己習慣，早15分鐘到，肖翠君亦準時到達，呢個係苗學翹始料未及嘅事
 
幾日前，苗學翹坐係宿舍嘅梳化上輕嘆一口氣
 
「終於都解決哂D野」佢心中所講嘅，正正係解決左肖翠君一家嘅官司，亦順手解決埋村姑呢對母女
 
佢自己都有諗過，係唔係放過肖氏一家人，但係回想返起過去幾年受到肖家嘅壓迫就覺得呢家人一個都唔可以放過
 
「喂!叫你朋友安排下我地去迪士尼玩!」呢個係肖翠琴嘅要求
 




學翹個銀包係肖翠君手上俾佢打開，然後肖翠君拎走D錢就講左聲「我嘅!」，成個星期嘅飯錢就咁冇左
 
不過，肖翠君肚入邊果個，就真係無辜嘅
 
佢打開wts，unblock返肖翠君後，發現佢用自己電話Sent左好多wts黎，全部都係道歉，為屋企人求情之類
 
苗學翹將所有msg睇完之後，回覆左一句「星期六下晝兩點，旺角家樂Starbucks等」
 
兩個人面對面坐，肖翠君個肚明顯大左好多，應該有6個月
 




「上星期註冊?」 肖翠君微微點頭
 
「先生做咩工?」 「SF司機」
 
「佢返星期一至六，有時星期日都要返，點照顧妳兩個呀?而家妳又咁，要自己一個人去產檢」
 
「要維持生計，冇辦法。好在佢地間屋已經供完，同老爺奶奶一齊住，最多迫少少」肖翠君講
 
「妳阿媽單案，姐夫話個官會念在屋企情況，俾佢坐一碌，扣除假期同行為良好，好快放返出黎」
 




「嗯……」
 
「妳先生星期一至日都返工咁滯，唔需要陪妳同小朋友?」
 
「我都想佢多D時間留係屋企，始終做SF都會好攰又夜放工」
 
「先生有冇中五畢業?」
 
「都叫有嘅…」
 
苗學翹聽到肖翠君咁講之後，拎左一張其他大學嘅招聘出黎遞俾肖翠君
 
「呢到呢份工，都應該啱妳同妳先生。返星期一至五，休銀行假。主要係做實驗室雜務，雖然暫時冇SF人工咁高，但勝左穩定，如果妳地決定申請嘅話，我會同果邊講聲，叫佢地等妳」
 
「唔該哂你….我咁對你…你仲咁幫我…」




 
「肚入邊果個係無辜嘅，相識一場，我都唔想見妳個小朋友咁慘」
 
說罷，苗學翹拎出電話，payme左$30000俾肖翠君
 
「你做乜野…..」
 
收好電話後，苗學翹先講「就當係我俾小朋友嘅利是，如果妳先生問起，就話我退返d錢俾妳地，好來好去」
 
「但係….」 「唔好同我計較咁多，小朋友將來要用錢多，呢D就當係俾佢或者俾妳應急。用唔著就放係銀行做定期，雖然息唔多」
 
「唔該哂你….我而家…先識後悔…同埋好羨慕你女朋友」
 
苗學翹飲一啖野再講「每個人都有自己難處，妳睇佢好，佢睇妳好者」
 




佢地兩個飲完野，苗學翹送肖翠君返屋企，最後一次
 
「可能我地都冇咩機會再見面」肖翠君有D唔捨得咁講
 
「咁又唔會，共同朋友我地都有，總會有機會再見面嘅」
 
行到肖翠君夫家樓下，苗學翹亦不忘提醒佢
 
「記住生冷野唔好食，呢度出出入入要小心D，始終呢度人多車多，前邊果幾條街又….」
 
「得啦，我識照顧自己架啦。等個仔出世後，我再派彊醋俾你啦」
 
苗學翹笑一笑「一言為定」
 
說罷肖翠君轉身返入大廈，苗學翹亦轉身離開，佢唔知嘅係，肖翠君回頭望住佢背影，流下不捨得嘅眼淚。佢用手抹去眼淚，搭電梯去到住嘅層數，用鎖匙打開門，見到為自己肚中小朋友而努力安裝BB床嘅丈夫




 
「你唔洗咁快裝好哂張床喎，我話過會一齊整架嘛」
 
「妳而家粗身大細，唔好幫手啦，妳坐低休息下啦，呢D野我搞就得」
 
肖翠君望住佢己嘅丈夫，以前嘅佢總係煙酒不離手，份糧差唔多月月清，係名乎其實嘅月光光。自從知道自己即將成為爸爸後，所有壞習慣一下子全部改哂，同酒肉朋友斷哂來往，佢眼中只有肖翠君同肚中嘅小朋友
 
肖翠君見到咁樣，佢又再次流下眼淚，不過，今次係開心嘅眼淚。



第三季，完