係同屋室友?定係同居密友?: 56. 兩位配角

由於Rachel屋企，應該係佢哥哥一家人屋企距離大學比較近，所以佢一直都係同哥哥、阿嫂同姪仔仲有佢地個工人姐姐住係間三房兩廁加工人房嘅單位入邊。

因為住得近嘅關係，所以Rachel就可以係學校做lab做夜d先走。而Vincent佢就住係研究生宿舍，果間係一間有獨立洗手間浴室嘅房，都叫做比住劏房要好，而且租金非常平。Vincent用一用腦，就將間房變到好似間屋咁，必要時可以俾多一至兩個朋友黎瞓或者住都得

晚上9點，佢地兩個一齊離開實驗室，基於男士風度，Vincent主動提出送Rachel去搭車，而Rachel亦冇拒絕，因為佢地都想用多d時間傾下project嘅野

係等車期間，Vincent仍然拎住I pad係到同Rachel分析緊d method，例如用咩medium，點樣去分析DNA等等

「如果妳係想做海中嘅cynobacteria，咁妳就要搵埋海邊幫手喎」





「唔緊要呀，我係跟兩個老細架嘛」

「點解妳一次過要跟兩個呀?」

「唔….我舊老細話想幫下新老細拎多d資源，咪將我撥俾新老細囉」

「呵呵，錢教授果然好幫人」

「咁你postdoc研究d咩呀?」





「我咪繼續做cynobacteria研究囉，同妳差唔多」

「咁我地兩個都可以互相幫到大家喎」

「好少人會做呢個Topic，點解妳會揀嘅?」

Rachel微笑保持神秘「有興趣囉」

說時那時快，Rachel搭嘅小巴到左





「咁妳早d休息啦」Vincent禮貌上咁同Rachel道別

「你都係啦，聽日見啦」Rachel亦禮貌地回應

係研究生宿舍內，Vincent繼續係到睇緊最近Lab嘅result，雖然已經拎左Ph.D，但係因為佢自己鍾意做研究，好細個開始就想做科學家關係，佢不惜唔理家人反對，由澳門過黎香港讀M.phil同Ph.D，因為佢知道如果佢自己留係澳門，發展嘅空間一定唔大，除左做賭場同做政府工外，澳門嘅機會真係好少。一個人留係香港，不免自己會悶。

自從Rachel係UG果時發現男朋友出軌後，佢都已經3年冇拍過拖，呢3年佢全心全意透過M.phil研究黎麻醉自己。果時佢發現自己好鍾意研究，唔單止係實驗室中識左Suki同埋其他朋友，一大班人柴娃娃笑得好開心，而且仲有機會去同世界各地嘅大學交流，可以擴充視野。不過佢自己都係女仔，想有人錫有人氹，奈何自己仲未遇到心儀對象，所以而家Suki嘅情況，佢自己好樂意食花生

「點呀?妳呢個準人妻嘅生活如何呀?」Rachel又係wts到潤緊小祺

「呀…郭曉昕小姐，我邊忽係準人妻呀?」

「妳咁早返去宿舍，唔係要煮飯咩?」

「煮咩呀?我邊識煮咁多野喎。妳有時間就睇多d paper啦」





「切!妳理得我丫」

放低電話後，Rachel一如小祺所講，拎左d paper出黎睇

讀Ph.D真係比起讀M.phil更辛苦更難，有時佢會羨慕下Suki可以有份工養活自己，而唔洗成日對住d paper

睇左60分鐘左右，Rachel同Vincent都各自關上Notebook，因為佢地都已經好攰