係同屋室友?定係同居密友?: 18. 實驗室

「嘩!乜Suki妳個部門咁爆架?」Rachel係lab入邊講
 
「有少少煩咁囉，係個分部門麻煩d」梁小祺係到幫緊Rachel做實驗，因為佢地約左今日食飯。而且今日仲係出糧日，再加上梁小祺過probation，所以Rachel話要同佢好好慶祝一番。不過依返梁小祺性格，佢地揀返實驗室附近嘅canteen食野
 
佢地兩個坐係biosafety cabinet前，一邊做lab一邊傾計
 
「照妳咁講，有個老屎忽郁手打人，咁佢應該係咁先啦喎」
 
「我果日都聽到老闆話唔會容忍，已經通知左副校長要開刀炒人」
 




“啪”一聲，一枝pipette tube又係梁小祺手上嘅pipette飛走，再裝上一枝新嘅
 
「咁郁手打人，間間公司都唔容許架啦，而且仲報埋警。不過你俾人打果個同事點呀?」
 
「聽老闆講，佢留院72小時，之後兩星期病假，佢都應該就返工架啦」
 
「係喎，妳咪講過，成個分部門得佢同妳兩個人係未婚嘅?」Rachel眼中有少少奸奸地嘅眼神傳出
 
梁小祺用一個反白眼嘅眼神回覆佢「唔會發生妳個腦所諗嘅野啦!」
 




「真係唔會?」
 
「咁有時間諗野，不如諗下妳份paper點寫仲好啦」
 
「呀!!!!唔好提paper啦!!!真係諗到頭都大，睇paper都睇到想嘔」
 
「咁係妳自己揀讀PhD嘅」
 
「我真係痴左線」
 




講起PhD，Suki又諗起學翹
 
「原來…我果個同事，佢同我地一樣，係呢到UG PG」
 
「佢都係PG呀?」
 
梁小祺點一點頭「係呀，佢仲係PhD添」
 
「嘩嘩嘩，咁快咁瞭解人地啦」
 
「妳咪再亂諗野呀!!!唔幫妳做lab架!!!!!」此時此刻，小祺塊面紅過紅蘋果
 
「咦?妳怕羞呀?」
 
「唔係呀!!!」話佢唔怕羞就真係呃人嘅




 
不過梁小祺又諗一諗，佢自己都好似未問候過學翹，不過見佢平時好似好少同人講野，自己又唔鍾意同同事有深交，所以好快打消左呢個念頭。一黎問候同事呢D野，老闆會代表同事去做，二黎可能會阻住人地休息
 
梁小祺繼續轉心咁幫Rachel做佢個實驗。讀PhD同讀M. Phil完全係兩碼子嘅事，讀PhD要自己定research topic，再寫proposal都足夠玩半年以上，再加埋做lab，分分鐘做到命都冇，仲要寫埋paper，仲要defend，所以小祺佢都係決定唔讀PhD。但一諗起苗學翹竟然半工讀埋PhD，心中對佢有少少佩服
 
苗學翹面前放低左佢自己屋企嘅樓契，佢將所有文件都照游律師嘅指示咁檢查一次。正如佢姐夫黎大狀咁講，只要家姐唔簽名，對方就冇任何權力或者方法加名上樓契
 
到左學翹病假前完結最後果幾日，肖翠君奇蹟地好溫柔咁約佢去街，而去嘅地方係佢基本上唔會去嘅地方，仲千叮萬囑咁提佢帶文件
 
苗學翹聽到去香港果一刻心中就叫到「揀香港好丫，好呀，姐夫果間Chamber就係中環核心地段，佢黎支援我應該好快，不過首先要佢唔洗上庭先」
 
苗學翹個姐夫，係法律界近年來開始有人氣，特別佢好擅長打刑事案，而且有時幫政府做外聘，之前又做過檢控官，所以當佢一離開律政署出黎掛牌果時，有好多間Chamber都搵佢。而黎大狀間Chamber亦都高手雲集，加上佢同學間firm亦都係業界有名firm，所以學翹係呢件「爭產」案之中，可以叫爭產啦，將所有事交俾姐夫同佢同學處理。