係同屋室友?定係同居密友?: 2. 準備M.Phil畢業嘅女仔

同一所大學，一座實驗室大樓之內，有一位PG研究生，係Macbook中對住自己份paper聚精會神
 
因為呢一份係佢PG嘅畢業project
 
佢手指一撳個掣，save低份paper，再將佢send俾教授
 
「呼」佢伸起一個懶腰，辛苦左兩年，終於完成左呢篇Paper，而家只剩低過唔過到教授果關
 
「唔該，有化學品簽收」有一名著住白色實驗袍嘅職員，將佢同組組員所需要嘅化學品送到
 




佢拎起枝筆，係簽名欄上簽左佢自己嘅名後，就代為收左件化學品
 
「Rachel，妳訂果件野到左啦」
 
「唔該哂Suki，妳份paper點呀?」
 
「打好哂，已經俾左老細，畢唔畢到業就係佢話事」
 
「仲讀唔讀PhD?」Rachel抬起頭問Suki
 




Suki佢諗一諗「都係未必啦，始終讀上去學費會好貴，studentship又唔係多」
 
「咁妳打算出黎搵野做??」
 
「嗯….都應該會啦」
 
「定係打算搵返個男朋友，然後嫁人呢?」
 
梁小祺聽到同學咁講後，都打左個突，而Rachel見到小祺個表情，都忍唔住笑一笑
 




「妳到而家仲係A0喎，打算一世唔嫁人?」
 
「下…嫁人呀…咁呢就…」梁小祺一臉尷尬
 
放學/工後，梁小祺返到自己所住嘅小小單位，應該係話小劏房內，慢慢整理自己嘅CV
 
正係到諗緊搵份咩工適合自己，又可以儘快還清過去果六年UG加埋PG嘅學債，係佢嘅煩惱之一
 
回心一想Rachel所講過嘅說話，搵個男仔拍拖嫁人，算唔算係一個人生?
 
佢自己皮膚還叫白，因為自己少運動，身高147cm左右，體重又唔重，不過拉開衫睇一睇自己，完全冇身材可言，身上只有一對小小嘅小籠包，同Rachel果種D cup導彈相差得遠
 
再望望鏡中嘅自己，個樣係一般，都叫做正常人樣，不過左邊臉蛋上，有一個淡淡非常淺色嘅胎記
 
如果戴左口罩，其他人就唔會易察覺到




 
就係因為呢個胎記，令梁小祺由細到大，只可以偷偷地係暗中暗戀男仔，廿多年黎，仍然係A0，讀中學時，一對對同學組成一Pair人，讀大學時，見到人出pool嘅佢，心中滿是羡慕
 
但係就係因為瞼上嘅淺色胎記，令佢對心儀嘅男仔卻步
 
由小學時，係背後偷戀同學，幻想有一天自己可以成為王子身邊嘅公主。可惜嘅係，直到UG畢業、PG畢業時，都好似命中只剩下佢一個人一般
 
繼續係搵工網上瀏覽，忽然間，佢見到一個熟悉嘅地方正招聘職員
 
就係佢而家所讀嘅大學
 
雖然教授可以請自己做研究助理，但相對大學內部正規職員，薪金都相差一大截，而且教授都未能確保自己有足夠funding，再加上正規員工係兩年約，有約滿酬金，而且被裁員嘅機會接近0，所以通常都好多人去爭
 
梁小祺望住自己所欠下嘅三十多萬學債，其中仲有「大耳窿」嘅「免入息資助貸款」之後，佢就將自己CV send返大學人事部
 




梁小祺雙手合十
 
「一定要成功呀」
 
眼望住自己一個人所住嘅劏房，諗起自己唔開心嘅回憶，眼淚又再一次慢慢地由眼中流下
 
大家都係同一父母所生，點解自己係女仔，就完全唔受屋企注視
 
除左基本生活上嘅開支，梁小祺大部份野都係自己努力儲錢同幫人補習兼職所賺返黎
 
關上電腦，自己係床上偷偷飲泣
 
「叮」一聲，人事部顯示又有一封求職mail送到