OT臨收工先發現走唔出個office 仲要比野追殺點部署: #β423-0003【代號：異空間】
我坐喺地下唔知頹廢左幾耐，眼角仲係兩行清晰既淚痕。
印象中好似好耐無咁樣喊過。
與其咁講，不如話好耐都無情緒咁大波動過，好似啱啱先醒起自己係個會有七情六慾既人。
阿帆咁樣就無左，連條屍都唔知去左邊，明明尋日仲一齊食緊lunch，一齊o緊t，距仲show緊自己個女啱啱識行嗰時d片比我睇，成個弱智咁喺度幻想個女未來嫁人要著咩樣既婚紗。
對唔住啊珠女，係你契爺無用，無睇住你阿爸，距以後都無辦法睇到你著婚紗既樣啦......
不過有睇住有點阿？我真係保護到距咩？
話唔定同距一齊比怪物撘左。
其實咁樣可能仲好......
我再次消沈咁低下頭，呆滯咁望住地下。
平時返工已經夠攰，仲要比我遇到d咁既事，其實係咪想逼死我？
如果係咁既話，不如就咁算啦，反正我一直到依家都唔知自己做緊咩。
我有氣無力咁打側趴左落地板度，喺度做咩？唔知啊？等死掛？
反正呢種有怪物出沒又完全唔知出口喺邊既異空間，本來生存既機率就渺茫。
眼前一隻蛋郁左一下，我完全無反應，就咁再次慢慢合埋對眼......
突然一對強大有力既手憑空出現，緊緊咁叉住我條頸，用力向下壓，將我釘實左喺地下。
「乜撚嘢啊！」 我瞬間清醒用力掙扎，同時睇清左眼前人個樣：係一個滿身皺皮，卻係體型巨大壯碩既老妖公，正係騎跨左喺我身上。
「屌又係你！你死左架啦！咪再搞我好無啊！」我一邊掙扎一邊情緒失控咁大叫，空盪既辦公室迴盪住我既叫聲。
「你咪以為你可以咁輕易死阿！你仲有排還阿！」距對手愈叉愈緊，發出妖異既既沙啞又高亢既叫聲。
我一手捉住距既手嘗試扒開，一手一野榨落距塊巢到好似提子乾既面嗰度，兩隻手指用力扣落距空無一物既眼窩入面，想嘗試拉住距塊面扯開距。
「如果唔係你，我使咁折墮？」我歇斯底里咁大叫。 我加重掙扎，但距完全不為所動，甚至對手愈來愈用力，直到佈滿青筋。
我塊面紅過紅燒豬頭，大腦開始充血變得唔清醒。
喺生存本能既驅使下，我終於叫出呢句話： 「好啦好啦我唔諗死啦得未阿！我受！繼續受落去直到你滿意為止阿仆街！」
此話一出，眼前既妖公即刻兩手一鬆，擠出滿懷嘲諷既表情，喺我面前化為一縷煙消失左。
「死仆街！死左都要纏住我！」我嫌棄咁拍左拍身上既灰塵。
「篤！」呢個時候，我見到我腳邊既蛋再郁左一下。
我望住隻蛋，不禁思索左一陣。
我拎起部手機，打開螢幕：凌晨一點幾。
我已經差唔多十個鐘無食過野。
其實都係少少餓姐......但飯都要食既......
但係...... 我努力壓抑自己腦內恐怖而荒謬既諗法，懶係淡定咁起返起身。
我環顧左一下四周，結構同自己原本office走廊差唔多，咁照道理......
我行去本身應該係茶水間既位置，打開度門，我見到一個開曬燈既兒童圖書館。
入面一個人都無，counter 當然都無人。
真係佛心，呢d時候仲提供呢種娛樂比我。
我苦笑住閂埋左道門。
黎到檔案室既門前，我再打開道門：入面係間gym room。
鬼得閒同你做gym咩？我要食飯阿師兄。
輾轉再三，我又翻翻黎呢堆蛋既面前。
我踎喺地下，拎起左其中一隻蛋，放喺耳邊搖左幾下：入面係流質？
咁......應該同雞蛋差唔多？
我盡力無視內心喝止自己既想法，隨手喺同事既檯面拎左幾疊檔案紙，散放喺地下。
見地下既紙層有d薄，我一不做二不休，拎曬同事檯面所有既檔案，揼曬落地下。
我走左去走廊既另一面，拎多左張防火墊過黎，墊左喺眼前呢堆「廢紙」既底。
我拎起個打火機，點火，點著堆廢紙，然後隨手將幾隻蛋揼左入火堆度。
房間瞬間煙霧瀰漫，嗆到我差啲窒息。 屌！頂唔住！我衝去窗邊打開左度窗。
一打開，我將個頭伸出去用力呼吸氧氣。恢復視野之後，我再次呆左。
邊有咩對面office，出面有既只係無盡既黑暗，黑過我個屎忽窿入面，唔好問我點知。
伸隻手出去，我都差唔多要見唔到自己隻手。 乜撚嘢啊！
都唔等我停低抖下消化下，office入面又傳黎動靜。
「虢礫緙嘞！」好似係好細微既、有d咩碎裂既聲。 我用力撥開煙霧，眯起對眼盡力窺視火堆入面既情況。
下一秒！有啲野飛左出黎！距帶住火光，一野咬落我隻腳度！
我睇清楚：距係一個六、七歲細路既無頭髮既頭，連落一個生住雞翼、肥腫難分既身體同一對幼嫩既腳，滿身皺摺，一個小朋友既身型，全身黏住半透明既黏液同一忽一忽仲未熄滅既火種。
係一隻啱啱出細既無毛雞怪物幼體！
「屌阿！」 我一腳踢開距，但係腳上已經多左個顯眼既血痕！
距睜住嗰對無邪既蛋白色瞳孔、斜住頭望住我，個口不停開合敲動牙關，令我一陣心寒。
咁都未夠，煙幕後面傳來更密集既碎裂聲，連綿不斷，令我寒到頭髮棟起埋。
「仆街......」我咬實嘴唇，諗都唔諗，衝去拎起自己個背囊，一個百米衝刺跨過火堆，黎到火堆既另一面。
「喀啦喀啦！喀啦喀啦！」 穿過隨地可見既蛋，我故意眯住自己對眼唔睇地下，但係密集既牙關敲動聲，都令我好清楚知道已經有一大堆幼體破卵而出。
我完全無回頭，徑直就衝左入去啱啱戈間兒童圖書館。
入到去，我鎖埋道門，衝去一個書櫃前面將櫃入面既書倒出黎，然後吃力咁將基本已經空左既鐵櫃推去門前塞住。
唔放心，又清空多個櫃塞埋過去。
完成呢一切既我虛脫咁跌坐喺地下。
仲話食野，差d自己變埋食糧。
聽住門外面微弱既撞擊聲，我稍微放心。
睇黎呢班幼體仲未有力氣撞開道門，啱啱都無咩意識追我，所以都應該基本安全。
跟住落黎，d火應該可以好快燒死距地？
其實呢度我犯左個好大既錯誤。如果火可以孵化距地，真係可以燒死距地？
但係好快，我就發現撞擊聲開始變得愈來愈大，甚至連成間圖書館都開始微微咁震。
顯然唔係距地既體型能夠發生既衝擊。
wtf？唔通黎左其他怪物？定係......距地既體型迅速長大左......
同埋距地點解可以咁有共同目的性咁想撞開我道門，唔通聞到我既氣味？聽到我既聲音？
我無辦法再淡定落黎，我即刻喺圖書館遊走，睇下有無其他出口。
圖書館好細，好快就比我搵到另一個出口：係一道睇落有啲古老既木門，門身有好多划痕同腐蝕既痕跡，門柄甚至係個銅製拉環。
我無理太多，畢竟我已經無得揀。
我打開道門，一道強光襲來，我迎住強光走左出去。
出到去，我眼光光咁望住眼前既景象，隻手慢慢合埋左身後既門。
我身處一個一望無際既荒野，蔚藍既天空，岩質既地面，目光所及皆是虛無，唯有七支只有盜墓電影入面先可以睇到既雕刻住古文明浮雕既巨大石柱。