OT臨收工先發現走唔出個office 仲要比野追殺點部署: #β423-0001【代號：OT】
d 同事都已經走曬，得返我同阿帆兩個仲係度做。
距坐我後面兩排，係我同期入職既同事，同條team。我地兩個都對左五年架啦，又因為係同期入職所以早就熟到乜咁。但係依家呢一刻我地兩個都只係𥄫實個mon，對手機械式咁係個鍵盤同個滑鼠之間不停遊走，一句話都無同對方講。原因好簡單，deadline大限將至。
做做下我個腦早就漫遊太空。我不禁係度諗，其實我到底係度做乜，為左嗰兩個臭錢，日日對住個死人excel d死人graph出賣自己時間出賣自己人生，d 數字對我黎講都無意義既？
咪為左生存，得淡笑。鬼叫我窮咩？認命啦！
我越做越頹，越頹越逼自己做，跟住眼皮開始愈來愈重，慢慢咁合埋左......
夢入面，我見到萬年毒撚既自己終於拖到女女手仔，個樣仲要好撚純，同公司d馬騮屎忽老妖婆一d都唔同。
我將距輕輕扶左埋床邊，比距順住我既動作慢慢攤上床，跟住......
「喂，傻屌，又訓撚著左啊？」
一把刺耳既聲打斷左我既美夢，我艱難咁擘大對眼，係檯面爬起身，將我塊面同個鍵盤分離。
勉強坐直個身，我茫然咁望著個電腦mon，嘴角仲流緊口水，睇住眼前既景象慢慢由模糊變得清晰。
係我連一半都未打完既report，又係呢堆無意義既數字。唉，屌，真係唔想醒。
「我訓左幾耐？」我問身後既阿帆。
「點知你阿？不過依家成十一點啦，要訓返去訓啦。」
十一點？
我望望窗外面對面office。
What the fuck？黑鳩曬既，好似連路燈都無咁。
收撚曬工？有無咁撚爽阿？
不過都係，話唔定係得我地公司先會咁樣糟質d員工。
「你傻撚左阿？我d野有排都未做曬阿！」
我揞住塊面用力捽左幾下，嘗試比自己清醒d。塊面熱辣辣咁，感覺到個鍵盤d制都已經印撚曬落我塊面度。印象中好似好耐無訓得咁淋過。
「返去先做啦！你方距真係會補水比你咩，次次都借d意側側膊架啦。」
比距講兩講好似又真係。係呢度做五年都係intern，點都唔比我地坐正，思疑分分鐘一早犯撚埋勞工法，真係距不仁我不義。
過deadline 最多咪又係照肺？第一次咩。
「你啱！渣埋個水就撇！」我一不做二不休，起身伸個懶腰。
「咪打埋個飛機先出黎囉！頭先梗係發緊春夢啦？又係Daisy 阿？」
Daisy係我地team既一位女同事，除左reception姐姐之外我唯一覺得叫正既女仔。我諗二字尾啦，但係keep得幾好，主要係戈對腿真係長撚過長腳蟹，成日著住對黑絲周圍fing真係頂唔緊。人地未有仔架，老就老d，不過要食都食得落口架，重點人地未有仔阿嘛！
唉，不過幾時輪到我阿？
「收爹啦死淫蟲，有口話人無口話自己。」
我隨口唐塞左一句。
的確係春夢，不過今次唔係Daisy，係純情小妹妹。
「關我咩事阿，我收心養性左好耐啦！家庭和睦。」距雙手交叉，笑淫淫咁講。
「收啦，del 左你部腦d av先講啦，拎公司機睇鹹片！」
我穿過距兜去廁所，順便一掌打落距心口。
兜過幾個一模一樣既走廊，我走左入廁所。
放緊水既時候，我係度諗條走廊好似長過平時，平時好似都唔使咁樣九曲十三彎，唔知係我錯覺定係已經做野做到short 左。
走出廁所門，走入會議室，穿過木檯，打開會議室大門，走出走廊。
正打算行返埋位，我突然間停低左腳步，呆左係原地。
等陣，傻左啊？公司廁所幾時係聯通會議室架？同埋會議室幾時有兩道門架？唔通我真係訓到傻左？
我另返轉身，手震震地咁打返開會議室道門，打開燈入去睇。果然，得一道門。
應該係我訓到懵懵地貢左入會議室唔知姐？我咁樣說服自己。
但係依家我一刻都唔想再留係呢個地方，我抹抹額頭既冷汗，即刻熄燈打翻開門走出去。
抬起頭，係另一間會議室。
我地公司並沒有兩件聯通既會議室。再講，幾多公司會將兩間大會議室駁埋一齊？貪好玩？
呢一刻我清醒曬。我已經說服唔到自己，點都唔可以講我出廁所之後懵盛盛行錯公司掛？更何況會議室既setting 同我地公司既一模一樣。
我對手既溫度降到冰點，震曬咁打開聯通會議室既門，僥倖心態咁想做最後確認。
果然，我依家企左係兩間大會議室既中間。鐵證如山，我無法逃避。
係幻覺？我伸手打左自己一巴，痛既。所以依家究竟發生緊咩事？返左五年公司既結構我邊有可能唔知。
我個心亂曬，背脊滲曬汗。我唔知點解開始跑左起來，開始見門就衝出去，詭異咁穿過一件又一間房：經理房、茶水間、檔案室......
「阿帆！阿帆！」
我無理依家發生緊咩事，淨係不停跑，希望咁樣可以擺脫依家既狀況，翻翻走廊返去自己個位度，即刻拎野走。同時個口不停嗌住我腦海入面唯一一個人名：唯一一個同我一齊係office既人，我既救命稻草。
但係情況一路無改善，我依舊不停係各個房間之間穿梭，直到一個點我懷疑自己係咪已經精神錯亂。
唔知過左幾耐，我又翻翻黎會議室。係有冷氣既情況下，呢個時候我已經滿頭大汗，d汗浸濕曬我額頭。但係我停低左腳步，因為係會議室既角落我終於見到一個人影。
「阿帆？」本能驅使下，唔知點解我無開燈，淨係拎出手機打開左個電筒。我慢慢靠近，感覺眼前既黑影睇落大過阿帆，甚至大得有d唔合理。
距踎低左，背對住我，不停郁動唔知做緊d咩。直覺話我知距唔係阿帆，但係我都係試探性咁叫多次阿帆個名，因為suppose依家office唔應該有第三個人。
「阿帆？」眼前呢隻野依舊無理我。我小心翼翼咁再行緊d，隻野猛然回頭，我一下子同距慘白、無神既雙瞳對視。
呢個時候我先終於睇清楚呢隻野個樣。距個頭係人頭咁既樣，但係生左一對雞翼咁既扭曲異肢，條頸無來由地長，全身無毛白雪雪鞋烚烚咁，活脫脫就係一隻生左個人頭既巨型雞。
距滿口滿身血跡，而身下面既，係我同事阿帆條屍。
距心口比開左個大窿，肋骨已經露左出黎，全身既血混合住一種乳白色似痰既奇怪黏液。
點解我知係距？因為距係橫訓，個頭係對住我呢邊。距對眼已經無左生機，個口微微擘大，用緊前所未有幽怨既眼神望住我。