愛自己還是愛他: 第六章
在開始交往的日子裏面，我並沒有告訴狄朗自己在與Melvin糾纏不清的事，我和Melvin初步有共識分手，但又藕斷絲連，我和狄朗決定走在一起時是我二十一歲生日那天。
那天……
我拿着電話發送信息成為了一種習慣，每隔十分鐘我便寄出一次，循環不息。那晚我特別急着性子，我性急是因為怕誤了時間，到秒針對準十二點時便是我二十一歲的生日！他那邊仍然沒反應，我便更加逼切，心裏浮燥不安，蛋糕也已經自備妥當，他衹需要來替我唱唱生日歌，互相親吻一下，我已心滿意足，可是Melvin他那邊還沒有動靜，沒有回覆。我一早已經跟他說好了不要去其他容易碰到熟人的地方，如夜店之類的，怕關係曝光，被Pat的朋友看見也就太麻煩了，但我又不想待在家中過生日，所以便約好十二點前在University吧會面，那裏過了十一時之後，不算太多人，適合約會。
我依舊坐在平日常來喝酒坐的那張桌子裏，但今天換了個方向坐。
狄朗走來與我聊起來:「妳今晚自己一個人對住個蛋糕嘅？……妳啲朋友呢？」
我:「我今晚冇約太多朋友嚟。」
狄朗:「妳約咗男朋友呢？」
我笑一笑回答:「唔係呃……朋友嚟之嘛！」
中午有時Pat會下來酒吧餐廳這裏用膳，可能從狄朗口中會收到我與男友約會的消息，為免關係被揭穿，盡可能不表露Melvin身份最好。
狄朗也笑了一笑說:「今晚妳幾好吖！……好睇過平時好多啊，……好過妳酗酒嗰個樣！……真架！」
我:「我平時係咩樣？」
狄朗:「妳平時一坐埋枱就飲好多酒……嘿嘿……計我話……就有啲恐怖嘞。」
我:「乜我平時真係咁恐怖咩？」
狄朗:「直情鬼都驚到走咗去！」
我:「呢度咁光猛，點會有鬼呢？」
狄朗:「我指鬼佬呀！」
我忍不住笑了出來，似乎我很久沒有這樣笑了……。
狄朗:「我見啲白鬼女生好少好似妳咁，飲到咁醉嘅，鬼頭仔見到妳都竪起手指公，叻女。」
我:「似乎喺你眼中我淨係得呢樣嘢叻。」
狄朗:「唔係！哈……妳仲有樣嘢叻……。」
我:「哦？係咩呀？」
狄朗:「媒人婆咯！」
我聽到後大聲發笑，不知何來的開心，我出盡所能開懷大笑着。
狄朗:「仲好笑？……妳嗰晚飲醉後問我名字再介紹畀妳嗰位女朋友我識，然後想拉住我哋隻手拖埋一齊，……妳都唔知嗰時我哋幾尷尬呀！」
我:「嘩……哈哈哈……我真係有做啲咁嘅嘢咩？……真係失禮晒……。」
聊下聊下，不知不覺間已過了十二點，狄朗說:「妳男朋友仲未嚟嘅？」
我竭盡力地裝作很不在乎，而且下定決心說:「我哋已經分咗手，佢嚟唔嚟我唔care!……我哋已經正式分手喇。」
狄朗說:「妳等我一陣……」然後走了進調酒枱那邊。
這時，很久不見的Bobby，那個遇到越南幫的晚上我們一起玩的同枱男生，碰巧剛走進University吧這裏，他坐在一個角落，叫了一杯酒，苦苦獨自喝着。
我招手叫他過來:「Bobby……Bobby!……嚟吖……過嚟吖！」
他呆呆的坐着，很不容易才見到我向他招呼，然後他便拿着酒杯，沒精打采地走過來坐下。
我對他說:「你一個人？……Johnny呢？」
Bobby:「我哋分咗手……唔好再提佢。」
我:「幾時嘅事呀？」
Bobby:「就喺前晚，佢搞人哋男朋友……」
我:「小夫妻少不免耍下花槍啫……。」
Bobby:「佢根本冇放我在佢眼內，我一氣之下，咪撇脫咁決定同佢講分手囉！」
我:「你哋嚟真架？」
Bobby:「佢平時對我已經冷冷淡淡，唔瞅唔睬……又成日沾花惹草，我忍無可忍！」
我:「唉……都唔知你哋搞咩？……一個十月芥菜，……一個醋埕狂，我冇你哋兩個咁好氣！」
Bobby:「一日佢唔改，我哋一日都會係鬧交收場，唔好提佢啦。……」
我:「有冇嘗試欣賞返女生？你點睇女仔架？」
Bobby:「女人好煩嘅……，又小心眼，挑挑剔剔咁，又似養寵物喎，成日要人pat，好叉麻煩，我冇興趣。」
我:「男人煩起上嚟咪一叉樣？……但女人細心噃。」
Bobby:「以前我都同女行埋過……」
我:「係咩？後尾點呀？」
Bobby:「起初好好地，但後尾覺得女人煩到一個地步冇晒romantic嘅感覺，佢哋好攻於心計，好醜陋……」
我:「你遇人不熟啫，可惜。」
Bobby:「我從女人身上得來嘅傷害，呢一世真係唔敢再諗！」
我:「所以你就轉投男人懷抱……」
Bobby:「除非我揾到個我願意為佢犧牲嘅女人啦，如果唔係，我呢一世都注定愛男人架啦！」
我:「咁我呢？……你點睇我？」
Bobby:「話時話，妳幾好噃，……或者有日我會嚟溝妳！……哈哈……」
我:「或者到時我變咗做基婆呢？……唉……感情事呢家嘢，真係好難觸摸！」
Bobby:「係呢，妳又點呀？……妳一個人對住個生日蛋糕？……冇人陪妳咩？」
我:「冇呀，所以你嚟得啱，有你嚟陪我慶祝生日就得喇！」
就在這時，狄朗端着一杯飲料和一件小小東西走過來，本來是興致勃勃的來，但看見Bobby後，他突然回頭折返了，好像很失落的樣子。
我叫着他:「張狄朗！你做咩唔過嚟傾計呀？……佢係我朋友嚟咋！……唔係情人。」
Bobby:「情人？……哈哈，我都唔好女嘅……。」
我:「佢鐘意男人架，我哋兩個好friend架，……你唔係怕醜下話？」
看起來狄朗還是不好意思過來，我走上前強行把他拉過來:「怕咩喎，我朋友又唔會食人嘅！……咁怕醜，你又唔係基……。」
Bobby:「妳又知人哋唔係我哋啲 brother?」
狄朗正被我強行拉過去桌子時，Bobby望了一望他所拿着的東西一眼，Bobby陰陰笑:「得啦，……佢唔係基架啦！」
我:「你點解咁肯定呀？……你哋識架？」
Bobby:「唔係……，不過妳睇下……。」
Bobby示意我看看狄朗。
剛才我沒有留意，原來狄朗左手拿住一杯凍飲，有塊紙牌陳設於上，上面用奶油寫着文字:「Happy B-day, Chloe Ying」，而狄朗右手更拿着一隻像手掌大小的布袋熊娃娃。
Bobby對我說:「妳宜家明啦……。」
我呼叫:「張狄朗！……你搞乜呀？」
狄朗:「我見冇人同妳慶祝生日，咪諗住……原來妳有朋友嚟咗。」
我:「多謝你呀，狄朗……我真心多謝你。……你點解預備到咁多嘢嘅？……你點知我生日架？」
狄朗:「Sorry，我唔小心喺妳醉咗嘅時候睇到妳證件上嘅資料，所以預備咗小禮物……，但係我諗唔到妳今日會上嚟！」
Bobby:「呢啲咪叫緣份囉。」
我對着Bobby:「唔好亂咁噏啦！……我宜家唔會想感情嘅嘢住，我要專心讀好啲書，男朋友我唔諗咁多……」
對着狄朗我說:「你專心一意追阿Pat啦！……我唔適合你架！」
Bobby:「噢，原來玩三角戀。」
我:「狄朗，好多謝你嘅錯愛，但我未預備好。」
狄朗面容沮喪，勉強苦笑地說:「好吖，等妳預備好，再話畀我聽吖。」說完便離開我的桌子遠去。
Bobby:「琳，我想問一個問題，……點解妳未見到佢啲生日預備品，妳就知道佢唔係基嘅呢？」
我:「我點知呀？」
Bobby:「除非……」
我:「除非咩呀？」
Bobby:「除非妳一早感應到佢like妳啦，如果唔係妳點會咁肯定？」
我:「……」
Bobby:「做咩唔畀個機會人啫？……妳又唔係討厭佢，係唔係？」
我:「我唔討厭佢，仲覺得佢可愛添！」
Bobby:「你哋幾襯呃，……叫佢埋嚟一齊慶祝妳生日啦！」
然後我們三個坐在一起，大家輕輕鬆鬆地為我的二十一歲迎來一個難忘的生日。狄朗他頗為開朗，對我的拒絕很看得開，我也十分欣賞他的厚度，這晚我們等他收工，下班一同去吃消夜，有說有笑，過了一個不是十分浪漫但極為開心的夜晚。到了清晨，他駛車送我回到我家門口時，他問我:「……可以錫妳嘛？」
我沒有應承，也沒有婉拒，我心在跳動。我問自己為何又為另一個男人心動？我好懷疑自己的感覺。
那個早晨，我們接吻了。
Melvin那日堅決不來為我共度生日，奠定了我與他三年瓜葛到了分手的落幕，我無法恨他，這些都怪我一廂情願，在我需要他時，他永遠不會在我身邊安慰和鼓勵，每當我需要陪伴時，也不敢傳信息給他要求他出現，因為我知道他一定會大發雷霆，嚷着叫我不要阻礙他日常的辦公和家庭生活。
自從二十一歲生日那天，他的不出現成為我對他心死的確據，我決定不再留戀他的溫柔，決定釋放寄存在一段無結果緣分的愛意，重新找尋那自己值得花心思的愛情上。但我傷痕累累，走出這陰暗幽谷不是件容易的事，究竟，我應該與狄朗開始嗎？那Patricia她會怎樣想我呢？