鏡像密語: 第三十章、敢不敢，以後都這般甜蜜？

自從呢通電話之後，兩個人又重新有交集，雖然冇一開始咁日傾夜傾，但係公司都仲會有講有笑。

直至公司黎左一個新既女同事，衣着打扮比較成熟性感，我地一開始連佢個名都唔知，只係知佢份人都幾冇禮貌，周圍叫人喂，連上司都係⋯⋯

後來其他同事八到佢叫吖姻，丫迪佢地幾個就開始撩佢傾計。

（知你地咩料啦我）

（見人着得少布少少就暈晒大浪）





（丫姐我未戰鬥格咋！）

（等等先，我係到比較啲咩？）

（人地着咩關我咩事？）

（唔關喎又真係⋯⋯）

（你擔心⋯⋯？）





（邊到有？擔咩心？）

（口是心非達人——梁洛妍）

（佢唔會係啲咁既人！）

（哈哈哈！邊個佢？）

（姓徐既人掛⋯⋯）





（聽講係仔都昅女嫁啦⋯⋯）

（所以我咪話佢唔係啲咁既人囉）

（驚人威脅到你咩？）

（唔驚）

（咁你依家做咩黑面？）

（唔笑唔等於黑面）

突然間洛妍既電話又響起左：

「閔哥話你塊面燶到可以煎雞蛋，哈哈！」





（仆街！咁都睇得出？）

於是洛妍九秒九戴返好個口罩⋯⋯

（做咩姐你？）

（費時比人見到我黑面，比人問長問短）

洛妍就咁行去廁所條路途中，好死唔死兜口兜而撞到徐亦言，洛妍一個轉身射個三分波既姿勢避開左徐亦言，點知徐亦言預判左洛妍既預判軌跡，洛妍一拎轉個頭就見到佢跟住自己，即刻笑左出聲。

亦言主動行近洛妍：「煎完雞蛋未？」

洛妍笑到見牙唔見眼。





（我係呷醋丫！）

（呷醋你地會有工作既交流）

（但我點承認？）

（唔係我唔想承認，而係我冇身份之下呷，邊有得認？）

（冇身份呷既醋，好Q酸）

（不過就算酸都好，同你玩，係我返工最大既樂趣⋯⋯）

（我知你一定有方法氹返我笑）

（我都唔會嬲得太過火⋯⋯因為氹人個個會好辛苦好攰）





（所以梁洛妍我笑返就算）

（邊捨得嬲你咁耐）

（逗你玩的⋯⋯）

⋯⋯⋯⋯
「喂！你今晚OT?」洛妍臨收工問亦言。

「諗緊。」

「冇丫，我一陣都冇野做，想問你⋯⋯夠唔夠膽放工去打機？」

（見在你朝早主動約我食早餐份上，禮尚往來呢下野我都識啲既）





（比你日對夜對下我囉，反正我都可能⋯⋯）

「一定係夠膽嫁啦！」

（收到你！）

「咁行啦！不過食咩好？」

「你中意啦，我就得人⋯⋯」

（我唔中意你話「就」其實，用得「就」姐係唔情願啦）

（不過都費時同你拗）

「喂其實你同佢點丫？」洛妍主動問起亦言同佢女朋友。

「嘈左」

「下」

（唉，既然都揀左、揀返、可唔可以珍惜下，畢竟係犧牲左我喎）

（懶得理你地⋯⋯我專心諗食咩好過）

「我想食⋯⋯pizza!我最中意既食物黎！」

「好」

如是者食完飯，洛妍同亦言去左掃街，因為洛妍唔夠飽⋯⋯

（唔好意思，大胃女王是也！）

洛妍每行過一間鋪都有好多野想食，都停一停睇住menu或者玻璃櫃吞一吞口水⋯⋯

就係洛妍每次吞一下口水，亦言就行左出去比錢買比洛妍食：小丸子、雪糕雞蛋仔、豆腐花、朱古力蛋糕⋯⋯

亦言一接到食物就好順手投餵洛妍，成個過程好自然⋯⋯

（你終於肯對我好啦⋯⋯）

（一直以來既堅持好似有少少回報⋯⋯？）

（我好想時間就停係呢一刻）

（直到呢一刻我都仲等緊可以拖住手去掃街）

（可惜⋯⋯）

（不過咁都夠啦！好心足啦你梁洛妍）

（嗯嗯，但今日唔想同你客氣啦！比我借多你幾個鐘啦好唔好？）

洛妍繼續保持傻下傻下既作風，包括食野唔理儀態食到成個嘴都污糟晒、溶左既雪糕滴晒係件衫到、食小丸子辣親條俐呢啲基本野。

洛妍倒啲雞蛋仔落口個時唔記得左杯底有溶左既雪糕，所以一野倒左落自己個身到⋯⋯直到亦言一抬頭見到既洛妍第一個反應係企定、扁嘴、懊惱叫。

（仆街⋯⋯佢會唔會覺得我好麻煩好kick好論盡？）

（我都唔想嫁⋯⋯嗚嗚）

（我依家成身都係啦⋯⋯死啦，會唔會比人嫌棄蠢？）

只見亦言又一副「真拿你沒有辦法」既樣子，默默咁拎紙巾幫洛妍抹頭髮同手：「係咪呢，論盡妹」

（嘻嘻⋯⋯好野！有人照顧返我轉頭，真好）

「我仲想繼續食丫⋯⋯」

「下？你仲食得落？」

「嗯嗯！」

「你刷新左我對你胃容量既理解！」

（同你一齊，特別好胃口！）

（起碼食多一樣野就有多一次投餵，值回票價！）

洛妍記返起大學同學話過有一個為食既女朋友其實好幸福，因為為食女朋友好易氹，嬲個下只要買佢中意既野食，佢即刻就會唔嬲。

（我開始理解⋯⋯）

（佢見到我食野開心笑，佢都會跟住開心笑）

（不過我開心享受緊既其實唔係食物，而同徐亦言一齊既時光、比佢照顧下既時光、比佢見住我可愛為食既時光）

（老天爺，我好耐都冇笑得咁開心啦，你比我笑多一陣啦好唔好，我以後會乖乖嫁啦）

（唔知佢點諗呢？）

（同我一齊既時光，佢係咪都同我一樣咁開心？）

⋯⋯⋯
終於去左平時去開既網吧，洛妍好熟手咁開電腦同埋禁主頁。

（你地唔會想我到底黎左呢到幾多次，學左幾耐）

（不過今日係黎補習既，哈哈！）

亦言開始同洛妍詳盡解釋每個制點用，分析作戰技巧等等⋯⋯洛妍感覺亦言可以出一本書教人。

（嘩，打個機姐，你洗唔洗咁有心得）

「係時候實踐下啦洛妍姐姐」

「OK!睇我表演！跟上我既速度喔」洛妍挑眉奸笑。

途中洛妍有嘗試用亦言學過既技巧，雖然都係死傷慘重，但起碼死得冇咁快。

「進步左喎洛妍姐姐」

「我有用心記住你既教導嫁」

「啊！」洛妍一時分心就比人秒左⋯⋯激動到佢又拍keyboard

亦言見到呢個情景只係係到笑：「睇住你玩原來開心過自己玩，拍keyboard 好可愛⋯⋯」

「哼！你唔撩我講野我一定唔洗死！」

「哈哈！」

「唔得！覆桌！」

結果下一鋪因為有徐老師既加持下，終於迎來勝利局。

洛妍想拎轉面讚亦言既時候，咁啱亦言又望向後面⋯⋯

洛妍個嘴差啲就⋯⋯錫左落亦言塊面到。

（太近啦⋯⋯）

洛妍感覺到自己面上染上兩片緋紅，正在失神之際，亦言突然捧起左洛妍塊面：「你好叻丫！」

洛妍報以一笑。

「我好想睇下你會唔會有打嬴我既一日」

「我努力下囉⋯⋯努力『家暴』你」

兩人大笑左，然後拎袋離場搭車。

因為亦言聽日仲要返工，所以洛妍送左佢去搭車先，仲陪佢等埋架小巴黎。

係佢上車前一步，洛妍踮腳，輕輕錫左亦言塊面一下就走左。

（羞死人了！）

（想知企我地後面個乘客有咩感受）

（呼⋯⋯好彩着左高踭鞋，踮高都錫到佢塊面）

（徐亦言，個一晚我真係好開心⋯⋯）

（夠唔夠膽，以後都⋯⋯）